- 1
- Kei hangā e koutou etahi whakapakoko, he mea whaowhao ranei, kaua hoki e whakaarahia ake he poukarakiatanga, kaua ano hoki tetahi kohatu e whakawhaiahuatia e meatia ki to koutou whenua hei koropikotanga atu: no te mea ko Ihowa ahau ko to koutou Atua.
- 2
- Kia mau ki aku hapati, kia hopohopo ano hoki ki taku wahi tapu: ko Ihowa ahau.
- 3
- Ki te haere koutou i runga i aku tikanga, a ka pupuri i aku whakahaunga, ka mahi hoki;
- 4
- Na ka hoatu he ua e ahau ki a koutou i tona po ano, a ka tukua mai ona hua e te whenua, a ka hua nga hua o nga rakau o te parae:
- 5
- A tutuki noa ta koutou patunga witi ki te whawhakinga waina, me te whawhakinga waina ki te ruinga; a ka kai koutou i ta koutou taro, a ka makona, ka noho humarie ano hoki ki to koutou whenua.
- 6
- A ka tukua iho e ahau te ata-noho ki te whenua, a ka takoto iho koutou, kahore ano hoki he tangata hei mea i a koutou kia wehi: ka whakakahoretia atu ano hoki e ahau nga kirehe kino i te whenua, e kore ano hoki te hoari e tika na waenga o to koutou whenua.
- 7
- A ka whaia e koutou o koutou hoa riri, a ka hinga ratou i te hoari ki to koutou aroaro.
- 8
- Ka whaia hoki te rau kotahi e te tokorima o koutou, a ka whati nga mano kotahi tekau i te rau kotahi o koutou: na, ka hinga o koutou hoa riri i te hoari ki to koutou aroaro.
- 9
- No te mea hoki ka whai whakaaro mai ahau ki a koutou, a ka meinga koutou kia hua, kia tini, ka whakapumautia taku kawenata ki a koutou.
- 10
- A ka kainga nga mea pakoko e koutou, ka maua mai ki waho ano hoki e koutou nga mea pakoko, no te mea kua taea te mea hou.
- 11
- A ka whakaturia e ahau taku tapenakara ki waenganui i a koutou, e kore ano hoki toku wairua e whakarihariha atu ki a koutou.
- 12
- Ka haereere ano hoki ahau i roto i a koutou, a hei Atua ahau mo koutou, ko koutou hoki hei iwi maku.
- 13
- Ko Ihowa ahau ko to koutou Atua nana koutou i whakaputa mai i te whenua o Ihipa, kei waiho hei pononga ma ratou; motu pu hoki i a au nga here o to koutou ioka, a meinga ana koutou kia haere tu.
- 14
- Tena ko tenei, ka kore koutou e whakarongo ki a au, e kore ano hoki e mahi i enei whakahaunga katoa;
- 15
- A ka whakahawea ki aku tikanga, ka whakarihariha ranei o koutou wairua ki aku whakariteritenga, a e kore e mahia aku whakahaunga katoa, a ka whakatakā e koutou taku kawenata:
- 16
- Na, ko tenei ano hoki taku e mea ai ki a koutou; ka meinga e ahau hei rangatira mo koutou te pawera, te kohi, me te kirika, hei ngau i nga kanohi, hei whakapouri i te ngakau ka ruia kautia ta koutou purapura; no te mea ka kainga e o koutou hoa riri.
- 17
- A ka u atu toku mata ki a koutou, a ka patua koutou i te aroaro o o koutou hoa riri, ka meinga hei kingi mo koutou te hunga e kino ana ki a koutou, a, ahakoa kahore he tangata hei whai i a koutou, ka rere koutou.
- 18
- A ki te kahore koutou e rongo ki a au i enei meatanga, na ka tapiritia atu e ahau kia whitu atu te nui o te pakinga i a koutou mo o koutou hara.
- 19
- Ka whati ano i a au te whakapehapehatanga o to koutou kaha; a ka meinga to koutou rangi kia whakarino, to koutou whenua hoki kia whakaparahi:
- 20
- A ka poto kau o koutou uaua: no te mea e kore to koutou whenua e tuku i ona hua, e kore ano hoki e hua nga hua o nga rakau o te whenua.
- 21
- A ki te whakatupu hoa riri koutou ki a au, a e kore koutou e whakarongo ki a au, na ka tapiritia atu ano e ahau kia whitu atu te nui o nga whiu mo koutou, ka rite ki o koutou hara.
- 22
- Ka tukua ano hoki e ahau nga kirehe koraha ki roto i a koutou, hei kawhaki atu i a koutou tamariki, hei whakamoti i a koutou kararehe, hei mea i a koutou kia tokotorutoru, a ka ururuatia o koutou huanui.
- 23
- A ki te kahore koutou e hoki ake ki te pai i enei meatanga aku, a ka whakatupu hoa riri ano koutou ki a au;
- 24
- Ka whakatupu hoa riri ano ahau ki a koutou, a ka whitu atu ano te nui o taku whiu i a koutou mo o koutou hara.
- 25
- A ka kawea mai e ahau te hoari ki a koutou, hei tohe i te utu mo taku kawenata: a ka huihui koutou ki roto ki o koutou pa, na, ka tukua e ahau te mate uruta ki roto i a koutou; a ka hoatu koutou ki te ringaringa o te hoa riri.
- 26
- A ka whati i a au ta koutou tokotoko, ara, te taro, ka tunua ai ta koutou taro e nga wahine kotahi tekau ki te oumu kotahi, a ka whakahokia mai e ratou ta koutou taro, he mea pauna: ka kai koutou, e kore e makona.
- 27
- A ki te kahore koutou e rongo ki a au i enei meatanga, a ka whakatupu hoa riri ano koutou ki a au;
- 28
- Ka whakatupu hoa riri ano ahau ki a koutou, ka aritarita; a ka pakia koutou e ahau, ae ra, e ahau ano, kia whitu atu ano hoki te nui, mo o koutou hara.
- 29
- A e kai koutou i te kikokiko o a koutou tama, ka kainga hoki e koutou te kikokiko o a koutou tamahine.
- 30
- A ka ngaro i a au a koutou wahi teitei, ka tapahia ano hoki e ahau a koutou whakapakoko, a ka makā e ahau o koutou tinana ki runga ki nga tinana o a koutou whakapakoko, ka whakarihariha atu ano hoki toku wairua ki a koutou.
- 31
- Ka ururua ano hoki i a au o koutou pa, ka tuheatia hoki o koutou wahi tapu, e kore ano hoki ahau e hongi mai ki a koutou kakara reka.
- 32
- A ka tuhea i a au te whenua, e miharotia ai e o koutou hoa riri e noho ana i reira.
- 33
- A ka whakamararatia atu koutou e ahau ki roto ki nga tauiwi, ka maunu hoki i a au te hoari hei whai i a koutou: a ka tuheatia to koutou whenua, ka ururuatia hoki o koutou pa.
- 34
- Ko reira koa ai te whenua i ona hapati, i nga ra katoa ona e takoto tuhea ana, i a koutou hoki i te whenua o o koutou hoa riri; ko reira hoki te whenua okioki ai, koa ai hoki i ona hapati.
- 35
- Ka okioki i nga ra katoa o tona tuheatanga; no te mea kihai i okioki i o koutou hapati, i a koutou e noho ana i reira.
- 36
- A ko nga oranga o koutou, ka ungā e ahau he whakangohe ki roto ki o ratou ngakau i nga whenua o o ratou hoa riri; a ka whati ratou i te ngaehetanga o te rau rakau i whakaoraorangia, a ka rere ratou, me te mea e rere atu ana i te hoari; ka hinga hoki i te mea kahore e whaia e tetahi.
- 37
- A ka tutetute ratou tetahi ki tetahi, me te mea e whaia ana e te hoari, i te mea kahore i whaia e tetahi: a ka kore he turanga ake ma koutou ki te aroaro o o koutou hoa riri.
- 38
- A ka whakangaromia koutou i roto i nga tauiwi, ka pau ano hoki koutou i te whenua o o koutou hoa riri.
- 39
- Ko nga toenga hoki o koutou, ka memeha haere ratou i roto i to ratou kino i nga whenua o o koutou hoa riri; ae ra, ka memeha haere ratou i roto i nga kino o ratou tahi ko o ratou mātua.
- 40
- Ki te whakina e ratou to ratou kino, me te kino a o ratou mātua, me to ratou hara i hara ai ratou ki a au, me ta ratou whakatupu hoa riri ki a au;
- 41
- Me taku whakatupu hoa riri ano ki a ratou, me taku kawenga ano i a ratou ki te whenua o o ratou hoa riri; ki te iro i reira o ratou ngakau kokotikore, a ka whakaae mai ratou ki te pakinga mo to ratou kino:
- 42
- Katahi au ka mahara ki taku kawenata ki a Hakopa, ki taku kawenata hoki ki a Ihaka, ka mahara ano hoki ki taku kawenata ki a Aperahama; a ka mahara ano ahau ki te whenua.
- 43
- Ka mahue ano te whenua i a ratou, a ka whakaahuareka ki ona hapati, i a ia e takoto tuhea ana, i te mea kahore nei ratou: me ratou hoki, ka whakaae ano ratou ki te whiunga mo to ratou kino: mo tenei hoki, ae ra, mo tenei, i whakahawea ratou ki aku whakariteritenga, a i whakarihariha mai to ratou wairua ki aku tikanga.
- 44
- Otiia ahakoa ko enei mea katoa, e kore ahau e whakakahore ki a ratou, i te mea kei te whenua nei ratou o o ratou hoa riri, e kore ano hoki ahau e whakarihariha atu ki a ratou, e huna rawa i a ratou, e whakataka ranei i taku kawenata ki a ratou: ko Ihowa hoki ahau, ko to ratou Atua.
- 45
- Engari ka mahara ahau ki a ratou ki te kawenata hoki o o ratou matua, i whakaputaina mai e ahau i te whenua o Ihipa i te tirohanga a nga tauiwi, kia waiho ai ahau hei Atua mo ratou: ko Ihowa ahau.
- 46
- Ko nga tikanga enei, me nga whakariteritenga, me nga ture i whakatakotoria e Ihowa ki te takiwa ona o nga tamariki a Iharaira ki Maunga Hinai, a i korerotia mai e Mohi.
Address: 
Phone: 
Email: