Luke Chapter 12 - Paipera Tapu 1868 | Te Paipera Tapu 1868

Luke Chapter 12 - Paipera Tapu 1868

1
Na, kei te huihui ano tera nga mano, tona tini, no ka takatakahi i a ratou ano, a ka anga ia ka mea ki ana akonga, Ko tenei ta koutou e tupato wawe ai, ko te rewena a nga Parihi, ara, te tinihanga.
2
Kahore hoki he mea i hipokina e mahue te hura; kahore hoki tetahi mea ngaro e mahue te mohio.
3
Mo konei ko ta koutou e korero ai i te pouri, ka rangona i te māramatanga; a ko ta koutou e ki ai ki te taringa i nga ruma i roto rawa, ka kauwhautia i runga i nga whare.
4
Na, ko taku kupu tenei ki a koutou, e oku hoa, Kaua e wehingia te hunga e whakamate nei i te tinana, a, muri iho kahore ake ā ratou e mea ai.
5
Engari maku e whakaatu ki a koutou ta koutou e wehi ai: Wehingia ia kei a ia nei te tikanga mo te maka ki te reinga, i muri iho o tana whakamatenga; ae ra hoki, ko taku kupu tenei ki a koutou, Kia wehi ki a ia.
6
E kore ianei e hokona nga pihoihoi e rima ki nga patene e rua? a e kore tetahi o ratou e wareware i te Atua.
7
Heoi ko nga makawe nei ano o o koutou mātenga oti katoa te tatau. Kaua ra koutou e wehi: erangi koutou i nga pihoihoi maha.
8
Ko taku kupu tenei ki a koutou, Ki te whakaae tetahi ki a au ki te aroaro o nga tāngata, ka whakaaetia ano ia e te Tama a te tangata ki te aroaro o nga anahera a te Atua:
9
A ki te whakakahore tetahi ki a au ki te aroaro o nga tāngata, ka whakakahoretia ano ia ki te aroaro o nga anahera a te Atua.
10
A ki te korero tetahi he whakahe mo te Tama a te tangata, ka murua tona hara: tena ko te tangata e kohukohua ai te Wairua Tapu, e kore tana e murua.
11
A ka kawea koutou ki nga whare karakia, ki nga rangatira, ki te hunga whai mana; kaua e manukanuka ki te peheatanga ki te aha ranei e whakahoki atu ai koutou, ki ta koutou ranei e korero ai.
12
Ma te Wairua Tapu hoki koutou e ako i taua haora ano ki nga mea e tika ana kia korerotia e koutou.
13
Na, ka mea tetahi i roto i te mano ki a ia, E te Kai whakaako, mea atu ki toku tuakana, kia kotia mai moku tetahi wahi o te kāinga.
14
Na, ko tana meatanga mai ki a ia, E te tangata nei, na wai ahau i mea hei kai whakarite whakawa hei kai kokoti mo koutou?
15
A i mea ano ia ki a ratou, Kia mahara kia tupato ki te apo: ehara hoki te hua o ona taonga i te mea e ora ai te tangata.
16
Na, ka korerotia e ia tetahi kupu whakarite ki a ratou, ka mea, Hua rawa te whenua o tetahi tangata taonga:
17
Na, ka whakaaroaro ia i roto i a ia, ka mea, Me pehea ahau? kahore hoki aku wahi e kohikohi ai ahau i aku hua.
18
A ka mea ia, Tenei taku e mea ai: ka wawāhia e ahau aku whare witi, a ka hangā ano kia nui: a ka kohikohia ki reira aku hua katoa, me aku mea papai:
19
Katahi ahau ka mea ki toku wairua, E toku wairua, ka maha o mea papai kei te rongoa mo nga tau e maha; noho noa iho, e kai, e inu, kia koa te ngakau.
20
Otiia ka mea te Atua ki a ia, Kuare, ko a tenei po ano tangohia ai tou wairua i a koe: a ma wai nga mea kua pae na i a koe?
21
Ka penei ano hoki te tangata mona ake ano nga taonga e meatia ana e ia, a e kore e hua nga taonga whaka-te-Atua.
22
Na, ka mea ia ki ana akonga, Koia ahau ka mea nei ki a koutou, Kaua e manukanuka ki to koutou oranga, ki ta koutou e kai ai; ki te tinana ano hoki, ki ta koutou e kakahu ai.
23
Rahi atu te oranga i te kai, me te tinana i te kakahu.
24
Whakaaroa nga pukeko: e kore nei e whakato, e kore ano hoki e kokoti; kahore a ratou toa, kahore he whare witi; heoi e whangainga ana ratou e te Atua: tera noa ake to koutou nui i to nga manu.
25
Ko wai o koutou e taea e ia te whakaaro iho te hono atu tetahi wahi ki tona roa, kia kotahi te whatianga?
26
A ki te kore e taea e koutou te mea nohinohi rawa, he aha i manukanuka ai ki tetahi atu?
27
Maharatia nga rengarenga, to ratou tupu: e kore nei e mahi, e kore e miro; na, ko taku kupu tenei ki a koutou, Kihai a Horomona me tona kororia katoa i rite ki tetahi o enei te whai kakahu.
28
Na, ki te penei ta te Atua whakakakahuranga i te tarutaru, kei te parae nei i naianei, a apopo ka makā ki roto ki te oumu; tera noa ake tana i a koutou, e te hunga whakapono iti.
29
Kaua ra e rapu ki ta koutou e kai ai, ki ta koutou e inu ai, kaua e tirengi noa te whakaaro.
30
E rapu ana hoki nga iwi o te ao ki enei mea katoa: a e mahara ana to koutou Matua e matea ana e koutou enei mea.
31
Engari rapua te rangatiratanga o te Atua; a ka tapiritia mai enei mea katoa ma koutou.
32
Kaua e mataku, e te kahui nohinohi; kua pai hoki to koutou Matua ki te homai i te rangatiratanga ki a koutou.
33
Hokona o koutou taonga, hoatu he mea ma te hunga rawa-kore; hanga ma koutou he peke moni e kore e tawhitotia, he taonga ki te rangi e kore e memeha, ki te wahi e kore nei e tata atu te tahae, e kore ano hoki te huhu e kai.
34
Ko te wahi hoki i to koutou taonga, ko reira ano hoki o koutou ngakau.
35
Kia whitikiria o koutou hope, kia kā nga rama;
36
A, te rite mo koutou hei nga tāngata e tatari ana ki to ratou rangatira, ina hoki mai i te marenatanga; mo tona tae rawa mai patukituki ai, na, uaki tonu mai ratou ki a ia.
37
Ka koa nga pononga e rokohina mai e to ratou rangatira e mataara ana ina tae mai: he pono taku e mea nei ki a koutou, ka whitiki ia i a ia, a ka mea i a ratou kia noho, ka haere mai ki te mahi mea ma ratou.
38
A ki te haere mai ia i te rua o nga mataaratanga, ki te haere mai i te toru o nga mataaratanga, a ka rokohina e penei ana ano, ka koa aua pononga.
39
Otira kia mohio koutou ki tenei, me i mātau te tangata i te whare, ki te wa e haere mai ai te tahae, kua mataara ia, a kahore i tukua kia pokaia tona whare.
40
Kia tatanga ra koutou: no te mea e puta mai te Tama a te tangata i te haora e kore ai koutou e mahara.
41
Na, ka mea a Pita ki a ia, E te Ariki, mo matou tenei kupu whakarite e korero nei koe? mo te katoa ranei?
42
Na, ka mea te Ariki, Ko wai ra te tuari pono, mahara, e meinga e tona ariki hei rangatira mo ana tangata, hei hoatu i te mehua kai i te wa e tika ai?
43
Ka koa taua pononga, ki te rokohina e tona rangatira ina tae mai, e pena ana.
44
He pono taku e mea atu nei ki a koutou, ka meinga ia hei rangatira mo ana taonga katoa.
45
Otira ki te mea taua pononga i roto i tona ngakau, Ka roa te haerenga mai o toku ariki; a ka anga ka whiu i nga pononga tāne i nga pononga wāhine, ka kai, ka inu, ka haurangi;
46
Ka haere mai te rangatira o taua pononga i te ra e kore ai ia e mahara, i te haora e kore ai ia e mohio, a ka hautopea ia, ka meinga mona wahi i roto i te hunga whakapono-kore.
47
Na, te pononga i mahara ki ta tona rangatira i pai ai, a kihai i whakaaro wawe, kihai i mea i tana i pai ai, he maha nga whiu mona.
48
Tena ko ia kihai nei i mātau, a kua mea i nga mea e tika ai kia whiua, he torutoru nga whiu mona. He nui hoki te mea i hoatu ki tetahi tangata, he nui te mea e kiia kia homai e ia: a he nui te mea i tukua atu ki tetahi tangata, hira noa atu te mea e tonoa i a ia.
49
I haere mai ahau ki te maka kapura ki te whenua; a ko te aha taku e pai ai? kia tungia nei ano!
50
Otiia he iriiringa taku e iriiria ai ahau; a takare tonu ahau kia oti ra ano.
51
E mea ana ranei koutou, i haere mai ahau ki te homai i te rangimarire ki te whenua? Tenei taku kupu ki a koutou, Kahore; engari i te wehewehenga:
52
Ta te mea i nga ra e takoto ake nei ka tokorima i roto i te whare kotahi, ka tahuri ratou ki a ratou ano, tokotoru ki te tokorua, tokorua ki te tokotoru.
53
Tahuri iho ana ko te pāpā ki te tamaiti, ko te tamaiti ki te pāpā; te whaea ki te tamahine, me te tamahine ki te whaea; te hungawai wahine ki tana hunaonga, me te hunaonga ki tona hungawai wahine.
54
A i mea ano ia ki nga mano, Ka kite koutou i te kapua e puta mai ana i te hauauru, na, mea tonu ake koutou, He ua te haere mai nei; a ko ia ano ia.
55
A ka kite i te tonga e pupuhi ana, ka mea koutou, Meake ko te werawera; a ko ia ano ia.
56
E te hunga tinihanga, e mātau ana koutou ki te titiro i te mata o te whenua o te rangi; he aha koutou tē titiro ai ki tenei taima?
57
He aha hoki koutou ake ano tē whakaaro ai i te mea tika?
58
I a korua ko tou hoa tauwhāinga e haere ana ki te kai whakarite whakawa, hei te huarahi ano kia kaha te mea kia tukua atu koe e ia: kei toia koe e ia ki te kai whakarite whakawa, a ka tukua koe e te kai whakarite whakawa ki te katipa, a ka makā koe e te katipa ki te whare herehere.
59
Ko taku kupu tenei ki a koe, E kore koe e puta mai i reira, kia poto ra ano nga moni iti rawa te utu mai e koe.