- 1
- Na, ka whakatata ki a ia nga pupirikana katoa me nga tāngata hara, ki te whakarongo ki a ia.
- 2
- A ka amuamu nga Parihi me nga Karaipi, ka mea, E manako ana tenei tangata ki nga tāngata hara, a e kai tahi ana me ratou.
- 3
- Na, ka korerotia e ia tenei kupu whakarite ki a ratou, a ka mea,
- 4
- Ko tehea tangata o koutou he rau ana hipi, a ka ngaro tetahi o ratou, e kore ianei e waiho e ia nga tekau e iwa ma iwa i te koraha, a ka haere ki taua mea i ngaro, kia kitea ra ano?
- 5
- A ka kitea, ka waha i runga i ona pokowhiwhi, ka koa.
- 6
- Ano ka tae ki te whare, ka karangatia ona hoa me nga tāngata e noho tata ana, ka mea ki a ratou, Kia hari tahi tatou; kua kitea hoki taku hipi i ngaro.
- 7
- Ko taku kupu tenei ki a koutou, Ka pera ano i te rangi mo te tangata hara kotahi ina ripeneta, nui atu i te hari mo nga tāngata tika e iwa nei tekau ma iwa, kahore nei ā ratou mea e ripeneta ai.
- 8
- Ko tehea wahine ranei, kotahi nei tekau ana moni, a ki te ngaro tetahi moni, e kore ianei ia e tahu i te rama, e puruma i te whare, e rapu marie, kia kitea ra ano?
- 9
- Ano ka kitea, ka karangatia ona hoa me te hunga e noho tata ana, ka mea, Kia hari tahi tatou; kua kite hoki ahau i aku moni i ngaro.
- 10
- Whaihoki, ko taku kupu tenei ki a koutou, He hari ano kei te aroaro o nga anahera o te Atua mo te tangata kino kotahi ina ripeneta.
- 11
- A i mea ano ia, Tokorua nga tamariki a tetahi tangata:
- 12
- A ka mea to muri o raua ki tona pāpā, E pa, homai ki a au te wahi taonga e wehea e koe moku. Na, ka wehewehea e ia ki a raua tona oranga.
- 13
- A kihai i maha nga ra, ka kohikohia e te tamaiti o muri nga mea katoa, a haere ana ki te whenua tawhiti, maumauria ana ona taonga ki reira, he tōreretanga ki te kino.
- 14
- Ano ka poto ana mea katoa, ka mate rawa taua whenua i te kai; a ka timata ia te rawa-kore.
- 15
- Na, ka haere ia ka noho ki tetahi o nga tāngata o taua whenua; a ka tonoa e ia ki ana māra ki te whangai poaka.
- 16
- A i hiahia ia kia whakakiia tona kopu ki nga hua e kainga ana e nga poaka: heoi kihai i hoatu e tetahi tangata ki a ia.
- 17
- A, te hokinga ake o ona whakaaro, ka mea ia, Ano te tini o nga kai mahi a toku pāpā, he nui noa atu a ratou taro, ko ahau ia, ka ngaro i te kai kore!
- 18
- Ka whakatika atu ahau, ka haere ki toku matua, ka mea atu ki a ia, E pa, kua hara ahau ki te rangi, ki tou aroaro ano hoki,
- 19
- A heoi ano tikanga kia karangatia ahau he tamaiti nāu: meinga ahau kia rite ki tetahi o o kai mahi.
- 20
- Na, ka whakatika ia, a haere ana ki tona matua. Na, i a ia ano i tawhiti, ka kite tona matua i a ia, ka aroha, ka oma, hinga iho ki tona kakī, kihi ana i a ia.
- 21
- Na, ko te meatanga a te tamaiti ki a ia, E pa, kua hara ahau ki te rangi, ki tou aroaro ano hoki, a heoi ano tikanga kia karangatia ahau he tamaiti nāu.
- 22
- Na, ka mea te matua ki ona pononga, Mauria mai tetahi kakahu, hei te mea pai rawa, whakakakahuria atu ki a ia; homai hoki he mowhiti mo tona ringaringa, he hu hoki mo ona waewae:
- 23
- Kawea mai ano hoki te kuao kau, te mea whangai, patua; kia kai tatou, kia koa te ngakau:
- 24
- Ko tenei tamaiti hoki aku i mate, a kua ora; i ngaro, a kua kitea. A ka anga ratou ka koa.
- 25
- Na, kei te māra tana tamaiti matamua: tona haerenga mai, ka whakatata ki te whare, ka rongo i te waiata i te kanikaninga.
- 26
- Na, karangatia ana e ia tetahi o nga tāngata, ka ui atu, he aha ra enei mea.
- 27
- Na, ko ta tera meatanga mai ki a ia, Kua tae mai to teina; a kua patua te kuao momona a te kau e tou matua, no te mea kua riro ora mai ia.
- 28
- Na, ka riri ia, a kihai i pai kia haere ki roto: me i reira ka haere tona matua ki waho, ka tohe atu ki a ia.
- 29
- Na, ka whakahokia atu e ia, ka mea ki tona matua, Na, te tini o nga tau i mahi nei ahau ki a koe, kahore rawa hoki i takahi i to kupu: heoi kahore rawa i homai e koe ki a au he kuao koati, kia koa tahi ai ahau me oku hoa:
- 30
- Tena ka tae mai nei tenei tamaiti āu, i pau nei to oranga i a ia, ratou tahi ko nga wāhine puremu, kua patua e koe te kuao momona a te kau māna.
- 31
- Na, ka mea tera ki a ia, E tama, kei a au tonu koe, a māu ano aku mea katoa.
- 32
- He mea tika ano kia koa tatou kia hari: i mate hoki to teina nei, a kua ora; i ngaro, a kua kitea.
Address: 
Phone: 
Email: