Luke Chapter 18 - Paipera Tapu 1868 | Te Paipera Tapu 1868

Luke Chapter 18 - Paipera Tapu 1868

1
Na, ka korero ia i tetahi kupu whaka- rite ki a ratou mo tenei, kia inoi tonu, kia kaua e ngoikore;
2
I mea ia, I tetahi pa tetahi kai whakarite whakawa, kihai nei i wehi ki te Atua, kihai ano hoki i hopohopo ki te tangata:
3
A i taua pa ano tetahi pouaru; na, ka haere mai ia ki a ia, ka mea, Whakatikaia taku whakawakanga i toku hoa tauwhāinga.
4
A roa iho kihai ia i pai: muri iho ka mea ia i roto i a ia, Ahakoa kahore ahau e wehi ki te Atua, e hopohopo ki te tangata:
5
Heoi ka raruraru ahau i te pouaru nei, na, ka whakatikaia e ahau tana whakawakanga, kei haere tonu mai, a taea noatia iho taku raru.
6
Ka mea te Ariki, Whakarongo ki ta te kai whakarite whakawa kino i mea ra.
7
A e kore ranei te Atua e whakatika i te whakawakanga a ana tāngata i whiriwhiri ai, e karanga nei ki a ia i te ao i te po, ahakoa whakaroa noa ia ki a ratou?
8
Ko taku kupu tenei ki a koutou, Ka hohoro ia te whakatika i ta ratou whakawakanga. Otira ka tae mai te Tama a te tangata, e rokohina mai ranei e ia he whakapono ki runga ki te whenua?
9
Ka korero ano ia i tenei kupu whakarite ki etahi i u pu o ratou whakaaro ki a ratou ano he tika, a i whakakorekore ki era atu:
10
Tokorua nga tāngata i haere atu ki te temepara ki te karakia; he Parihi tetahi, ko tetahi he pupirikana.
11
Tu ana te Parihi ko ia anake, ko tana karakia tenei, E te Atua, ka whakawhetai atu ahau ki a koe, no te mea kahore ahau e rite ki era atu tāngata, ki te hunga hao taonga, kino, puremu, moku hoki tē rite ki tenei pupirikana.
12
Takirua aku nohoanga pukutanga i te wiki, e hoatu ana e ahau te wahi whakatekau o aku mea katoa.
13
Ko te pupirikana ia i tu mai i tawhiti, kihai i mea kia anga ake ona kanohi ki te rangi, heoi patuki ana ki tona uma, ka mea, E te Atua, tohungia ahau te tangata hara.
14
Ko taku kupu tenei ki a koutou, Nui atu te tika o tenei i to tera, i te hokinga atu ki tona whare: ki te whakanui hoki tetahi i a ia, ka whakaititia; a ki te whakaiti tetahi i a ia, ka whakanuia.
15
Na, ka kawea mai e ratou ki a ia etahi tamariki nonohi, kia pa atu ai ia ki a ratou: a, te kitenga o ana akonga, ka riria atu ratou.
16
Otira ka karangatia ratou e Ihu, ka mea ia, Tukua nga tamariki nonohi kia haere mai ki a au, kaua hoki ratou e araia atu: no nga penei hoki te rangatiratanga o te Atua.
17
He pono taku e mea atu nei ki a koutou, Ki te kahore e rite te tangohanga a tetahi i te rangatiratanga o te Atua ki ta te tamaiti nohinohi, e kore rawa ia e tomo atu ki roto.
18
Na, ka ui atu tetahi rangatira ki a ia, ka mea, E te Kai whakaako pai, me aha ahau ka whiwhi ai ki te oranga tonutanga?
19
Na, ko te meatanga a Ihu ki a ia, He aha ahau i meinga ai e koe he pai? kahore tetahi i pai, kotahi anake, ko te Atua.
20
E mātau ana koe ki nga ture, Kaua e puremu, Kaua e patu tangata, Kaua e tahae, Kaua e whakapae teka, Whakahonoretia tou pāpā me tou whaea.
21
Na, ka mea ia, Kua rite i a au anei katoa no taku tamarikitanga ake.
22
A, te rongonga a Ihu ki enei mea, ka korero atu ki a ia, Kotahi te mea kahore e rite i a koe: hokona o mea katoa, ka tuwha atu ma nga rawa-kore, a e whai taonga koe ki te rangi: a haere mai i muri i a au.
23
Na, ka rongo ia ki enei mea, ka pouri rawa; he nui hoki ona taonga.
24
A ka kite a Ihu i a ia e pouri rawa ana, ka mea, Ano te whakauaua o te tapoko o te hunga taonga ki te rangatiratanga o te Atua!
25
Ta te mea, erangi te haere o te kamera ra te kowhao o te ngira e takoto noa ana, he whakauaua rawa ia te haere o te tangata taonga ki roto ki te rangatiratanga o te Atua.
26
Na, ka mea nga kai whakarongo, Ko wai ra e ora?
27
Ka mea ia, Ko nga mea e kore e taea e te tangata, e taea e te Atua.
28
A ka mea a Pita, Na, kua whakarerea nei e matou nga mea katoa, a aru ana i a koe.
29
Na, ka mea ia kia ratou, He pono taku e mea atu nei ki a koutou, Ki te whakarerea e tetahi tangata he whare, he matua, he tuakana, he wahine, he tamariki, he whakaaro hoki nana ki te rangatiratanga o te Atua,
30
Ina, tini atu nga mea e riro i a ia i tenei wa, a i te ao meake puta mai ko te oranga tonutanga.
31
A ka mau ia ki te tekau ma rua, ka mea ki a ratou, Na, e haere ana tenei tatou ki Hiruharama, a ka rite katoa nga mea i tuhituhia e nga poropiti mo te Tama a te tangata.
32
Ka tukua hoki ia ki nga tauiwi, ka tawaia, ka whakatupuria kinotia, ka tuwhaina:
33
A ka oti ia te whiu, ka whakamatea: a i te toru o nga ra ka ara.
34
A kihai ratou i mātau ki tetahi o enei mea: a he mea huna ki a ratou tenei kupu, kihai hoki ratou i mohio ki nga mea i korerotia.
35
A i a ia e whakatata ana ki Heriko, e noho aria tetahi matapo i te taha o te huarahi ki te tono mea mana:
36
A, tana rongonga i te mano e haere atu ana, ka ui atu, He aha tenei?
37
Ka mea ratou ki a ia, Ko Ihu o Nahareta e haere atu ana.
38
Katahi ia ka karanga, ka mea, E Ihu, e te Tama a Rawiri, kia aroha mai ki a au.
39
Na, ka riria ia e te hunga i haere i mua kia noho puku: heoi rahi noa ake tana karanga, E te Tama a Rawiri, kia aroha ki a au.
40
Na, ka tu a Ihu, ka mea kia arahina mai ia ki a ia: ano ka tata, ka ui atu ki a ia,
41
Ka mea, Kia ahatia koe e ahau? Ka mea ia, E te Ariki, kia titiro ahau.
42
Ka mea a Ihu ki a ia, Titiro: na tou whakapono koe i whakaora.
43
A titiro tonu ake ia, a aru ana i a ia, me te whakakororia i te Atua: a, te kitenga o te iwi katoa, ka whakamoemiti ki te Atua.