- 1
- Na, i te ra tuatahi o te wiki, i te tino ata po, ka haere mai ratou ki te urupa ki te mau i nga mea kakara kua mahia nei e ratou, ratou tahi ko etahi atu.
- 2
- A, rokohanga mai e ratou kua hurihia te kamaka i te urupa.
- 3
- A, to ratou haerenga ki roto, kihai i kitea te tinana o te Ariki o Ihu.
- 4
- A, i a ratou e whakaaroaro ana ki tenei, na, tokorua nga tāngata i puta mai ki a ratou, uira tonu nga kakahu.
- 5
- Na, i a ratou e mataku ana, a e kupapa iho ana o ratou kanohi ki te whenua, ka mea raua ki a ratou, He aha koutou ka rapu ai i te tangata ora i roto i te hunga mate?
- 6
- Kahore ia i konei, otira kua ara: kia mahara koutou ki tana i mea ai ki a koutou i a ia i Kariri,
- 7
- Ki tana meatanga, Kua takoto te tikanga kia tukua te Tama a te tangata ki nga ringa o te hunga hara kia ripekatia, a i te toru o nga ra ka ara.
- 8
- Na, ka mahara ratou ki ana kupu;
- 9
- A hoki atu ana i to urupa ka korero i enei mea katoa ki te tekau ma tahi, ratou ko era atu katoa.
- 10
- Ko Meri Makarini ratou ko Hoana, ko Meri whaea o Hemi, ko o ratou hoa wāhine, nga kai korero o enei mea ki nga apotoro.
- 11
- A ki ta ratou whakaaro he mea tito noa a ratou kupu, a kihai ratou i whakaponohia.
- 12
- Katahi ka whakatika a Pita, ka oma ki te urupa; a, tona pikonga iho ka kite ko nga kakahu takai anake e takoto ana; a hoki ana me to miharo ano i roto i a ia ki taua mea i meatia.
- 13
- Na, tokorua o ratou e haere ana i taua ra ki tetahi kāinga koraha, e ono tekau o nga paronga te mataratanga i Hiruharama, ko Emauha te ingoa.
- 14
- A e korerorero ana raua tetahi ki tetahi ki enei mea katoa i meinga.
- 15
- A i a raua e korerorero ana e uiui ana ki a raua, na, ko Ihu ake ano kua whakatata mai, a haere tahi ana ratou.
- 16
- I puritia hoki o raua kanohi, i kore ai raua e mohio ki a ia.
- 17
- Na, ka mea ia ki a raua, He aha enei kupu e korero nei korua ki a korua, i a korua e haere nei, e ahua pouri nei?
- 18
- Na, ka whakahokia mai e tetahi, ko Kereopa te ingoa, a ka mea ki a ia, I Hiruharama koe e noho ana, a ko koe anake kahore i mohio ki nga mea kua meinga nei ki reira i enei ra?
- 19
- Ka mea ia ki a raua, Ki ehea mea? Ka mea raua ki a ia, Ki nga mea o Ihu o Nahareta, he poropiti hoki ia, he kaha tana mahi tana kupu, i te aroaro o te Atua, o te iwi katoa:
- 20
- Ki te tukunga, hoki i a ia e nga tohunga nui, e o matou rangatira hoki, kia whakaaetia kia whakamatea, a ripekatia ana ia.
- 21
- A i tumanako atu ano matou ki a ia māna e whakaora a Iharaira: na, i te taha ano o enei mea katoa, ko te toru hoki tenei o nga ra i meinga ai enei mea.
- 22
- A miharo noa iho matou ki etahi wāhine a matou, i haere i te atatu ki te urupa;
- 23
- Heoi kihai i kitea tona tinana, a haere mai ana ratou, ka mea, kua kitea ano hoki e ratou he putanga anahera, i mea mai nei kei te ora ia.
- 24
- Na, ka haere atu etahi o o maua hoa ki te urupa, a rokohanga atu, rite tonu ki ta nga wāhine i korero ai: otira kihai ia i kitea.
- 25
- Na, ko tana meatanga mai ki a raua, E te hunga whakaaro-kore, ngakau puhoi ki te whakapono ki nga mea katoa i korero ai nga poropiti:
- 26
- Kahore ianei i takoto te tikanga kia mate a te Karaiti i enei mea, a kia tomo ki tana kororia?
- 27
- Na, ka timata ia ki ta Mohi, ki ta nga poropiti katoa, a whakaaturia, ana ki a raua nga mea mona o nga Karaipiture katoa.
- 28
- A ka tata ki te kāinga i haere ai ratou: na, ka ahu atu ia, me te mea e haere tonu ana ia.
- 29
- Na, ka tohe raua ki a ia, ka mea atu, E noho koe ki a maua: kua ahiahi hoki, kua titaha hoki te ra. Na, ka tomo atu ia, ka noho ki a raua.
- 30
- A, tona nohoanga iho ki a raua ki te kai, ka mau ia ki te taro, ka whakapai, ka whawhati, a hoatu ana ki a raua.
- 31
- Na, kua kite o raua kanohi, a ka mohio kia ia; a ngaro whakarere atu ia i a raua.
- 32
- A ka mea raua ki a raua, Kihai koia o taua ngakau i mumura i roto i a taua, i a ia e korero ana ki a taua i te ara, e whakaatu ana i nga Karaipiture ki a taua?
- 33
- Na, ka whakatika raua i taua haora ano, a hoki ana ki Hiruharama, a rokohanga mai kua huihui te tekau ma tahi me o ratou hoa,
- 34
- A e mea ana, Koia rawa ano! kua ara te Ariki, a kua puta mai ki a Haimona.
- 35
- Na, ka korerotia e raua nga meatanga i te ara, to raua mohiotanga hoki ki a ia i te whatiwhatinga o te taro.
- 36
- A, i a raua e korero ana i enei mea, na, ko Ihu ake ano e tu ana i waenganui o ratou, e mea ana ki a ratou, Kia tau te rangimarietanga ki a koutou.
- 37
- Na, koera ana ratou, wehi tonu; i mea hoki he wairua ta ratou i kite ai.
- 38
- Na, ko tana meatanga atu ki a ratou, He aha koutou ka pororaru ai? na te aha hoki i puta ake ai nga whakaaronga i roto i o koutou ngakau?
- 39
- Tirohia oku ringaringa me oku waewae, ko ahau ano ia: whawhakia ahau, kia kite ai koutou; kahore hoki o te wairua kikokiko, wheua ranei, me oku e kitea nei e koutou.
- 40
- Ano ka korerotia tenei, ka whakakitea ki a ratou ona ringaringa me ona waewae.
- 41
- A i a ratou kahore nei i whakapono i te hari, a e miharo ana, ka mea ia ki a ratou, He kai ranei ta koutou i konei?
- 42
- Ka hoatu e ratou ki a ia tetahi ika, he mea tunu, me tetahi honikoma.
- 43
- Na, ka tango ia, a kainga ake e ia i to ratou aroaro.
- 44
- I mea ano ia ki a ratou, Ko nga kupu enei i korero ai ahau kia koutou, i a au ano i a koutou, me whakarite nga mea katoa kua oti te tuhituhi i roto i te ture a Mohi, i nga poropiti, i nga waiata, moku.
- 45
- Katahi ia ka whakamakoha i o ratou hinengaro, kia mātau ai ki nga Karaipiture,
- 46
- A ka mea ki a ratou, Ko te mea tenei i tuhituhia, ko te tikanga, ano hoki tenei, ko te Karaiti kia whakamamaetia, kia ara ano i te hunga mate i te toru o nga ra:
- 47
- A kia kauwhautia te ripenetanga, me te murunga hara i runga i tona ingoa, ki nga tauiwi katoa, ki Hiruharama ano hoki timata ai.
- 48
- Na, ko koutou hei kai whakaatu mo enei mea.
- 49
- A maku e tuku atu ki a koutou te mea i korerotia i mua e toku Matua: otiia kia noho koutou ki te pa ki Hiruharama, kia whiwhi ra ano koutou ki te kaha i runga.
- 50
- Na, arahina ana ratou e ia ki waho ki Petani, na, kua ara ona ringaringa, a whakapaingia ana ratou e ia.
- 51
- A i a ia e whakapai ana i a ratou, ka mawehe atu ia i a ratou, a kahakina atu ana ki te rangi.
- 52
- Na, ka koropiko ratou ki a ia, a hoki ana ki Hiruharama, he nui hoki te koa:
- 53
- A noho tonu ana ratou i te temepara, me te whakamoemiti me te whakapai atu ki te Atua. Amine.
Address: 
Phone: 
Email: