- 1
- Na, i te tekau ma rima o nga tau o te rangatiratanga o Taipiria Hiha, i a Ponotio Pirato e kawana ana i Huria, i a Herora e tetaraki ana i Kariri, i tona teina hoki i a Piripi e tetaraki ana i Ituria, i te whenua hoki o Tarakonaiti, a ko Rihania e tetaraki ana i Apirini,
- 2
- Ko Anaha raua ko Kaiapa nga tohunga nui, ka puta mai te kupu a te Atua ki a Hoani tama a Hakaraia ki te koraha.
- 3
- Na, ka haere ia ki nga wahi katoa e patata ana ki Horano, ka kauwhau i te iriiri ripeneta hei murunga hara;
- 4
- I pera ano ia me te mea i tuhituhia ki te pukapuka o nga korero a Ihaia te poropiti, i mea nei, He reo no tetahi i te koraha e karanga ana, Whakapaia te huarahi o te Ariki, whakatikaia ona ara;
- 5
- Ka whakakiia nga awaawa katoa, ka tahoroa nga maunga me nga pukepuke katoa; a e meinga kia tika nga wahi kopikopiko, ko nga wahi taratara hei ara maeneene;
- 6
- A e kite nga kikokiko katoa i te whakaoranga a te Atua.
- 7
- Na, ka mea atu ia ki nga mano i haere mai kia iriiria e ia, E te uri nakahi, na wai koutou i whakamahara kia rere i te riri meake puta mai?
- 8
- Na, whakaputaina mai nga hua e rite ana ki o te ripeneta, a kei anga koutou kei mea i roto i a koutou, Ko Aperahama to tatou matua: ko taku kupu hoki tenei ki a koutou, E ahei ana ano i te Atua te whakaara tamariki ake ma Aperahama i roto i enei kohatu.
- 9
- Na, tenei ka pa te titaha ki te pakiaka o nga rakau: a ki te kahore tetahi rakau e hua i te hua pai, ka tuakina, ka makā ki te ahi.
- 10
- Na, ka ui nga mano ki a ia, ka mea, Me aha ra matou?
- 11
- Na, ka whakahokia mai e ia, a ka mea ki a ratou, Ko te tangata i nga koti e rua, kia hoatu ki te tangata kahore ona; me te tangata he kai tāna, kia pera ano hoki.
- 12
- Na, ka haere atu hoki nga pupirikana kia iriiria, a ka mea ki a ia, E te kai whakaako, me aha matou?
- 13
- Ka mea mai ia ki a ratou, Kei nui ake i nga mea i whakaritea ma koutou ta koutou e tango ai.
- 14
- Ka ui atu ano hoki nga hoia ki a ia, ka mea, Me aha hoki matou? Na, ko tana meatanga mai ki a ratou, Kaua e tukinotia tetahi, kaua e whakapae teka; kāti ano ma koutou ko a koutou utu.
- 15
- Na, i te iwi e tatari ana, a e whakaaroaro katoa ana i roto i o ratou ngakau ki a Hoani, ko te Karaiti ia, kahore ranei;
- 16
- Ka kī mai a Hoani, ka mea ki a ratou katoa, Ko ahau nei, he iriiri taku i a koutou ki te wai; kei te haere mai ia tetahi e kaha rawa ana i a au, e kore ahau e tau hei wewete i te here o ona hu: māna koutou e iriiri ki te Wairua Tapu me te kapura:
- 17
- Ko tana mea tahi kei tona ringaringa, a ka tino tahia e ia tana patunga witi, e kohia ano e ia te witi ki roto ki tana whare witi; ko te papapa ia e tahuna ki te kapura e kore e tineia.
- 18
- He maha atu ano hoki ana kupu whakahau i kauwhau ai ia ki te iwi.
- 19
- Otira i riria e ia a Herora tetaraki mo Heroriaha wahine a Piripi a tona teina, mo nga kino katoa hoki i meinga e Herora;
- 20
- Na, i runga i era katoa, tutakina ana e ia a Hoani ki te whare herehere.
- 21
- A ka poto te iwi te iriiri, i a Ihu ano hoki kua iriiria, a e inoi ana, ka tuwhera te rangi,
- 22
- Na, ka heke iho te Wairua Tapu ki runga ki a ia, he ahua tinana ano hoki tona, anō he kukupa, ka puta mai ano he reo no te rangi, e mea ana, Ko koe taku Tamaiti i aroha ai, taku i ahuareka atu ai.
- 23
- Na, a Ihu nei, e whakatatata ana ona tau ki te toru tekau; a ki ta te tangata kī, he tama ia na Hohepa, a ko ia ta Hiri,
- 24
- Ko Hiri ta Matata, ko ia ta Riwai, ko ia ta Mereki, ko ia ta Iana, ko ia ta Hohepa,
- 25
- Ko Hohepa ta Matatiaha, ko ia ta Amoha, ko ia ta Nauma, ko ia ta Eheri, ko ia ta Nakai,
- 26
- Ko Nakai ta Maata, ko ia ta Matatiaha, ko ia ta Hemei, ko ia ta Hohepa, ko ia ta Hura,
- 27
- Ko Hura ta Hoana, ko ia ta Reha, ko ia ta Horopapere, ko ia ta Haratiere, ko ia ta Neri,
- 28
- Ko Neri ta Mereki, ko ia ta Ari, ko ia ta Kohama, ko ia ta Eremorama, ko ia ta Ere,
- 29
- Ko Ere ta Hohe, ko ia ta Erietere, ko ia ta Horimi, ko ia ta Matata, ko ia ta Riwai,
- 30
- Ko Riwai ta Himiona, ko ia ta Hura, ko ia ta Hohepa, ko ia ta Honana, ko ia ta Eriakimi,
- 31
- Ko Eriakimi ta Merea, ko ia ta Mainana, ko ia ta Matata, ko ia ta Natana, ko ia ta Rawiri,
- 32
- Ko Rawiri ta Hehe, ko ia ta Opere, ko ia ta Poaha, ko ia ta Haramono, ko ia ta Nahona,
- 33
- Ko Nahona ta Aminarapa, ko ia ta Arame, ko ia ta Heteromo, ko ia ta Parete, ko ia ta Hura,
- 34
- Ko Hura ta Hakopa, ko ia ta Ihaka, ko ia ta Aperahama, ko ia ta Tara, ko ia ta Nahora,
- 35
- Ko Nahora ta Haruki, ko ia ta Rakau, ko ia ta Pereke, ko ia ta Epere, ko ia ta Haraha,
- 36
- Ko Haraha ta Kainana, ko ia ta Arapahata, ko ia ta Hema, ko ia ta Noa, ko ia ta Rameka,
- 37
- Ko Rameka ta Matuhara, ko ia ta Enoka, ko ia ta Iarere, ko ia ta Marereere, ko ia ta Kainana,
- 38
- Ko Kainana ta Enoha, ko ia ta Heta, ko ia ta Arama, ko ia ta te Atua.
Address: 
Phone: 
Email: