Mark Chapter 12 - Paipera Tapu 1868 | Te Paipera Tapu 1868

Mark Chapter 12 - Paipera Tapu 1868

1
Na, ka timataia e ia tetahi kupu whakarite ki a ratou. I whakatokia e tetahi tangata he māra waina, a taiepatia ana ki te taiepa, na, ka keria te takotoranga waina, a hangā ana tetahi whare tiketike, a tukua atu ana e ia ki nga kai mahi, na, ko tona haerenga atu ki tawhiti.
2
A i te po i tika ai ka tonoa e ia he pononga ki nga kai mahi, ki te tiki i etahi hua o te māra waina i nga kai mahi.
3
Na, ka mau ratou ki a ia, a whiua ana, tonoa kautia atu ana.
4
Na, ka tonoa ano e ia ki a ratou tetahi atu pononga; a ka akina ia e ratou ki te kohatu, ngawha iho tona mātenga, a ka oti ia te tukino ka tonoa atu.
5
Na, ka tonoa ano e ia tetahi atu; a whakamatea iho ia e ratou; me era atu, tona tini, ko etahi i whiua, ko etahi i whakamatea.
6
Na, kotahi ake ano tāna, he tamaiti aroha nāna, a muri rawa iho ka tonoa hoki ia ki a ratou, i mea ia, E hopohopo ratou ki taku tamaiti.
7
Na, ka mea aua kai mahi ki a ratou ano, Ko te tangata tenei mona te kāinga; tena, tatou ka whakamate i a ia, a mo tatou te kāinga.
8
Na, ka mau ratou ki a ia, whakamatea iho, a makā ana ki waho o te māra waina.
9
Na, ka pehea te rangatira o te māra waina? ka haere mai ia ka whakangaro i nga kai mahi, a ka hoatu te māra waina ki etahi atu.
10
Kahore koia koutou i kite i tenei Karaipiture; Ko te kohatu i kapea e nga kai hanga kua meinga hei upoko mo te kokonga:
11
Na te Ariki tenei, a he mea whakamiharo ki o tatou kanohi?
12
Na, ka whai ratou kia hopukina ia, otiia i mataku i te mano: i mātau hoki ratou mo ratou te kupu whakarite i korerotia nei e ia: na, whakarerea ana ia, haere ana ratou.
13
Na, ka tonoa e ratou ki a ia etahi o nga Parihi, ratou ko nga tāngata whaka-Herora, hei hopu mo tetahi kupu āna.
14
A, to ratou taenga mai, ka mea ki a ia, E te Kai whakaako, e mātau ana matou he kupu pono tāu, e kore ano hoki ta te tangata e whakaaroa e koe: e kore ano hoki koe e titiro ki te kanohi tangata, engari e whakaako ana i te ara o te Atua i runga i te pono. He mea tika ranei te hoatu takoha ki a Hiha, ehara ranei?
15
Me hoatu ranei e matou, kaua ranei e hoatu? Otira i mohio ia ki ta ratou tinihanga, a ka mea ki a ratou, He aha koutou ka whakamatautau ai i a au? mauria mai he pene ki a au, kia kite ai ahau.
16
A mauria mai ana. Na, ko tana meatanga ki a ratou, No wai tenei ahua me te tuhituhinga? Ka mea ratou ki a ia, No Hiha.
17
Na, ka whakahokia mai e Ihu, ka mea ki a ratou, Hoatu ki a Hiha nga mea a Hiha, ki te Atua ano hoki nga mea a te Atua. A miharo ana ratou ki a ia.
18
Na, ka haere ki a ia nga Haruki e mea nei kahore he aranga; ka ui ki a ia, ka mea,
19
E te Kai whakaako, i tuhituhi a Mohi ki a matou, Ki te mate te tuakana o tetahi tangata, a ka waiho tana wahine, kahore ano hoki he tamariki hei waihotanga iho, me tango tana wahine e tona teina, ka whakatupu uri ai mo tona tuakana.
20
Na, tokowhitu taua whanau i mua, he tuakana he teina: a ka tango to mua i te wahine, a mate iho ia, kahore hoki he uri hei waihotanga iho.
21
Katahi ka tango te tuarua i a ia, ka mate, kahore ano hoki ona uri hei waihotanga iho: pera tonu ano hoki te tuatoru.
22
I tango ano hoki te tokowhitu i a ia, a kahore o ratou uri hei waihotanga iho: muri rawa iho ka mate ano hoki te wahine.
23
Na, i te aranga, i te mea ka ara ratou, ma wai o ratou te wahine? he wahine hoki ia na ratou tokowhitu.
24
Na, ka whakahokia mai e Ihu, ka mea ki a ratou, Ehara ianei tenei i te mea i hē ai koutou, kahore nei hoki e mohio ki nga Karaipiture, ki te kaha hoki o te Atua?
25
I te mea hoki ka ara mai ratou i te hunga mate, e kore e marena, e kore ano hoki e hoatu kia marenatia; engari ka rite ki nga anahera o te rangi.
26
Na, te hunge mate, to ratou aranga mai; kahore koutou i kite i roto i te pukapuka a Mohi, i ta te Atua i kī ai ki a ia i tera i te rakau, i mea ai, Ko te Atua ahau o Aperahama, ko te Atua o Ihaka, ko te Atua o Hakopa?
27
Ehara ia i te Atua no te hunga mate, engari he Atua no te hunga ora: na, nui atu to koutou hē.
28
A, te haerenga mai o tetahi o nga Karaipi, te rongonga ki a ratou e totohe ana, a ka kite he pai tana whakahokinga mai ki a ratou, ka ui ki a ia, Ko tehea te tuatahi o nga ture katoa?
29
Na, ko te whakahokinga mai a Ihu ki a ia, Te tuatahi o nga ture katoa, Whakarongo, e Iharaira; Ko te Ariki ko to tatou Atua he Ariki kotahi:
30
Kia whakapaua hoki tou ngakau, tou wairua, tou hinengaro, tou kaha, ki te aroha ki te Ariki ki tou Atua: ko te ture tuatahi tenei.
31
A e rite ana anō hoki te tuarua, ko ia tenei, Kia aroha koe ki tou hoa tata, ano ko koe. Kahore he ture ke atu e rahi ake ana i enei.
32
Na, ka mea te Karaipi ki a ia Ka pai, e te Kai whakaako, he pono to korero: no te mea kotahi ano te Atua; a kahore atu tetahi ko ia anake:
33
A ko te whakapaunga atu o te ngakau, o te hinengaro, o te wairua, o te kaha, ki te aroha atu ki a ia, me te aroha atu ki tona hoa tata, anō ko ia, nui atu tena i nga tahunga tinana me nga patunga tapu katoa.
34
A, te kitenga o Ihu he kupu mohio tana i whakahoki mai ai, ka mea ki a ia, Kahore koe i matara atu i te rangatiratanga o te Atua. A kihai tetahi tangata i maia ki te ui atu ki a ia i muri iho.
35
Na, ka kī mai a Ihu, ka mea, i a ia e whakaako ana i roto i te temepara, Na te aha nga Karaipi ka mea ai, he tama na Rawiri a te Karaiti?
36
Na Rawiri ake hoki te kupu, i a ia e nohoia ana e te Wairua Tapu, I mea te Ariki ki toku Ariki, Hei taku ringa matau koe noho ai, kia meinga ra ano e ahau ou hoa riri hei turanga waewae mou.
37
Na, ka karangatia nei ia e Rawiri ake ano, He Ariki; a na hea ano ia i tama ai ki a ia? A ahuareka ana te mano tini ki te whakarongo ki a ia.
38
Na, i mea atu ano ia ki a ratou i tana akoranga, Kia tupato ki nga Karaipi, ko ta ratou e rawe ai ko nga kakahu roroa ina haereere, me nga ohatanga i nga kāinga hoko,
39
Me nga nohoanga rangatira i nga whare karakia, me nga nohoanga rangatira i nga hākari:
40
Ka pau nei i a ratou nga whare o nga pouaru, a e inoi roa ana, he ahua kau: he nui rawa te mate e pa ki enei.
41
A i te noho a Ihu i te ritenga atu o te takotoranga moni, e matakitaki ana ki te mano e panga moni ana ki te takotoranga moni: a he tokomaha nga tāngata taonga, he maha hoki nga mea i pangā e ratou.
42
Na, ko te haerenga mai o tetahi pouaru rawa-kore, makā iho ana e ia nga mea nohinohi e rua, kotahi ia patene.
43
Na, ka karangatia e ia ana akonga, ka mea ki a ratou, He pono taku e mea nei ki a koutou, Ko ta tenei pouaru rawa-kore i maka ai, nui atu i ā ratou katoa e maka na ki te takotoranga moni:
44
Ko ratou katoa hoki, he hira nei o ratou, a makā ana ko tetahi wahi; ko tenei ia he rawa-kore, a makā ana āna mea katoa, ara, tona oranga katoa.