- 1
- Na, ka timata ano ia te whakaako i te taha o te moana: a he tini te tangata i huihui ki a ia, no ka eke ia ki runga ki te kaipuke, ka noho ki te moana; a i uta te mano katoa, i te taha o te moana.
- 2
- A he maha ana mea i whakaako ai ki a ratou, he mea whakarite, i mea hoki ki a ratou, i a ia e ako ana,
- 3
- Whakarongo; Na, i haere atu te kai rui ki te rui:
- 4
- A i a ia e rui ana, ka ngahoro etahi ki te taha o te ara, a, te rerenga mai o nga manu o te rangi, na, kainga ake.
- 5
- Ko etahi i ngahoro ki te wahi kamaka, ki te wahi kihai i nui te oneone; a pihi tonu ake, kahore hoki i hohonu te oneone:
- 6
- A, te whitinga o te ra, ngaua iho; no te mea kahore he putake, memenge noa iho.
- 7
- Ko etahi i ngahoro ki roto ki nga tataramoa, a, te tupunga ake o nga tataramoa, koaoaotia ana nga purapura a, kore ake he hua.
- 8
- Ko etahi i ngahoro ki te oneone pai, a whai huaina ana; tona tupu! tona nui! ea ake, no etahi e toru tekau, no etahi ono tekau, no etahi kotahi rau.
- 9
- A i mea ano ia ki a ratou, Ki te whai taringa tetahi hei whakarongo kia rongo ia.
- 10
- Otira ka mahue ko ia anake, ka u atu ki a ia ona hoa me te tekau ma rua ki taua kupu whakarite.
- 11
- Ka mea ia ki a ratou, Kua hoatu ki a koutou te matauranga ki te mea ngaro o te rangatiratanga o te Atua: ki te hunga ia o waho e ra-rototia ana nga mea katoa i te kupu whakarite:
- 12
- Mo te titiro rawa mai o ratou, na, e kore e kite; rongo rawa ratou, na, e kore e mātau; kei tahuri ratou, a ka murua o ratou hara.
- 13
- I mea ano ia ki a ratou, E kore ranei koutou e mātau ki tenei kupu whakarite? a me pehea ka mātau ai koutou ki nga kupu whakarite katoa?
- 14
- Ko te kai rui e rui ana i te kupu.
- 15
- Ko nga mea enei i te taha o te ara, i te wahi i ruia ai te kupu; a, to ratou rongonga ai, na, haere tonu mai a Hatana, kapohia ake te kupu i ruia ki o ratou ngakau.
- 16
- Ko nga mea ano hoki enei i ruia ki nga wahi kamaka; ko te hunga i to ratou rongonga ai i te kupu, hohoro tonu te tango, hari tonu;
- 17
- Na, kahore o ratou pakiaka, he mea nonaianei kau nei: heoi, te pānga mai o te whakapawera o te whakatoinga ranei mo te kupu, hē tonu iho.
- 18
- A ko nga mea enei i ruia ki roto ki nga tataramoa; ko nga mea i rongo ki te kupu,
- 19
- Na, te putanga mai o te whakaaroaronga ki tenei ao, o te hangarau o nga taonga, o nga hiahia ki era atu mea, koaoaotia iho te kupu, a kore ake he hua.
- 20
- A ko nga mea enei i ruia ki te oneone pai; ko te hunga e rongo ana ki te kupu, a tango tonu mai, a whai hua ana, o etahi e toru tekau, o etahi e ono tekau, o etahi kotahi rau.
- 21
- I mea ano ia ki a ratou, Ko raro koia i te mehua te rama whakaturia ai, ina mauria mai, ko raro ranei i te moenga? he teka ianei me whakatu ki runga ki te turanga?
- 22
- E kore hoki tetahi mea i hunā e mahue te whakakite; kahore hoki tetahi mea i ngaro, ta te mea ka puta ki te māramatanga.
- 23
- Ki te mea he taringa o tetahi hei whakarongo, kia rongo ia.
- 24
- A i mea ano ia ki a ratou, Kia tupato ki ta koutou e rongo ai: ko te mehua hoki e mehua ai koutou, hei mehua ano tona ki a koutou: a ka tapiritia mai ano he mea ma koutou ma nga kai whakarongo.
- 25
- Ki te whai mea hoki tetahi, ka hoatu ano ki a ia: a ki te kahore he mea a tetahi, ko āna ake ka tangohia i a ia.
- 26
- A i mea ano ia, E rite ana te rangatiratanga o te rangi ki te tangata, i makā e ia te purapura ki te oneone;
- 27
- A moe ana ara ana, i te po i te ao, me te tupu ano tera te purapura na, kua roa, tē matauria te peheatanga.
- 28
- E hua ana hoki te whenua i tona kaha ake ano; ko te rau ki mua, ko reira te puku, muri iho ko te witi pakari i roto i te puku.
- 29
- Otira ka rite nga hua, na, ka hohoro te tuku mai i tana toronaihi, kua taea hoki te kotinga.
- 30
- A i mea ano ia, Me whakarite e tatou te rangatiratanga o te Atua ki te aha? he aha oti te kupu whakarite hei whakaritenga atu ma tatou?
- 31
- E rite ana ki te pua nani, i tona whakatokanga ki te whenua, ko te iti rawa ia o nga purapura katoa i runga i te whenua:
- 32
- A ka oti te whakato, Ka tupu, ka nui atu i nga otaota katoa, a ka nui ona manga; no ka noho nga manu o te rangi i tona taumarumarutanga iho.
- 33
- Na, he maha ana kupu whakarite pera i korerotia ai e ia te kupu ki a ratou, ā ratou hoki i ahei ai te whakarongo.
- 34
- A heoi ano ana kupu ki a ratou he kupu whakarite anake: a ka mahue ko ratou anake, ka whakaaturia e ia nga mea katoa ki ana akonga.
- 35
- A i mea ano ia ki a ratou i taua ra, i te mea ka ahiahi, Tatou ka whakawhiti atu ki tawahi.
- 36
- Na, ka tono ratou i te mano kia haere, a ka kawe i a ia, i runga tonu ano hoki ia i te kaipuke. A i a ia ano hoki etahi atu kaipuke nonohi.
- 37
- Na, ko te putanga mai o tetahi hau, he tupuhi, a eke ana nga ngaru ki runga ki te kaipuke, a tomo noa.
- 38
- Na, i runga ia i tetahi urunga e moe ana, i te kei: a ka whakaara ratou i a ia, ka mea ki a ia, E te Kai whakaako, kahore o whakaaro ki a matou ka mate nei?
- 39
- Na, ka ara ia, a riria iho e ia te hau, ka mea atu ki te moana, Kāti, whakamutua. Na, marire iho te hau, a tino marino ana.
- 40
- Katahi ia ka mea ki a ratou, He aha ta koutou e mataku nei? he aha koutou tē whakapono ai?
- 41
- Na, ka mataku whakaharahara ratou, ka mea tetahi ki tetahi, He tangata aha tenei, ina rongo rawa te hau me te moana ki a ia?
Address: 
Phone: 
Email: