- 1
- I taua wa ano ka rongo a Herora tetaraki ki te rongo o Ihu,
- 2
- A ka mea ki ana, pononga, Ko Hoani Kai iriiri tenei; kua, ara mai ia i te hunga mate; a na reira i mahi ai nga merekara i roto i a ia.
- 3
- I hopukia, hoki a Hoani e Herora, a hereherea ana e ia, a makā ana ki te whare herehere, he mea hoki na Heroriaha, na te wahine a tona teina a Piripi.
- 4
- Na Hoani hoki i mea ki a ia, E kore e tika kia riro ia i a koe.
- 5
- A i a ia e mea ana ki te whakamate i a ia, ka wehi i te mano; ki ta ratou hoki he poropiti ia.
- 6
- Otira i te haringa, i te ra whanautanga o Herora, ka kanikani te tamahine a Heroriaha i waenganui i a ratou, a ka ahuareka mai a Herora.
- 7
- Katahi ia ka mea ki a ia, oati rawa, kia hoatu ki a ia tana mea e tono ai.
- 8
- Na, he mea whakakī ia na tona whaea, ka mea, Homai ki konei ki a au ki runga ano i te rihi te mātenga o Hoani Kai iriiri.
- 9
- Heoi ra ka pouri te kingi: otiia i whakaaro ia ki te oati, ki te hunga hoki e noho tahi ana me ia, a ka mea kia hoatu.
- 10
- Na, ka tono tangata atu ia, a poutoa ana, te mātenga o Hoani i roto i te whare herehere.
- 11
- A i mauria mai tona mātenga i runga i te rihi, i hoatu ki te kotiro: a nāna i kawe atu ki tona whaea.
- 12
- Na, ka haere mai ana akonga, ka tango i te tinana, a tanumia ana e ratou, a haere ana, korero atu ana ki a Ihu.
- 13
- A, te rongonga o Ihu, ka haere atu ia i reira ra te kaipuke ki te koraha ki tetahi wahi motu ke: ano ka rongo te mano, ka aru mai i a ia ra uta i roto i nga pa.
- 14
- A, ka puta atu a Ihu, ka kite i te tini o te tangata, na, ka aroha ia ki a ratou, a whakaorangia ana e ia o ratou turoro.
- 15
- Ano ka ahiahi, ka haere mai ana akonga ki a ia, ka mea, He wahi koraha tenei, kua heke noa atu ano hoki te ra; tonoa atu te mano, kia haere ai ratou ki nga kāinga, ki te hoko kai ma ratou.
- 16
- Ano ra ko Ihu ki a ratou, Kahore he mea e haere ai ratou; ma koutou e hoatu he kai ma ratou.
- 17
- A ka mea ratou ki a ia, Heoi ano a matou i konei, e rima nga taro, e rua hoki nga ika.
- 18
- Na, ka mea ia, Mauria mai ki konei ki a au.
- 19
- Na, ka mea ia ki nga tāngata kia noho ki runga i te tarutaru, a ka mau ki nga taro e rima, ki nga ika hoki e rua, ka titiro atu ki runga ki te rangi, ka whakapai, ka whawhati, a hoatu ana e ia nga taro ki nga akonga, a na nga akonga ki nga tāngata.
- 20
- A kai katoa ana ratou, a ka makona: a kotahi tekau ma rua nga kete i kohia ake e ratou, kī tonu i nga whatiwhatinga i toe.
- 21
- A te hunga i kai, me te mea e rima mano nga tāne haunga nga wāhine me nga tamariki.
- 22
- Na, akiaki tonu atu a Ihu i ana akonga kia eke ki te kaipuke, kia whakawhiti atu ki mua i a ia ki tawahi, i a ia e tono ana i nga mano kia haere.
- 23
- A ka oti nga tāngata te tono, ka kake ia ki runga ki te maunga ki te wahi motu ke ki te inoi: na, kua ahiahi, a ko ia anake i reira.
- 24
- Na, tera te kaipuke te akina mai ra e te ngaru i waenga moana: i hē hoki te hau.
- 25
- A, i te wha o nga mataaratanga o te po ka haere atu a Ihu ki a ratou, i haere maori i runga i te moana.
- 26
- A, te kitenga o nga akonga i a ia e haere ana i runga i te moana, ka ihiihi, ka mea, He wairua; a ka aue i te wehi.
- 27
- Na, kua hohoro te korero mai a Ihu ki a ratou, te mea, Kia manawanui, ko ahau tenei; aua e wehi.
- 28
- Na, ka whakahoki atu a Pita ki a ia, a ka mea, E te Ariki, ki te mea ko koe tena, kiia mai ahau kia haere atu ki a koe i runga i te wai.
- 29
- Na, ko tana meatanga mai, Haere mai. A ka marere atu a Pita i te kaipuke, ka haere i runga i te wai, kia tae atu ai ki a Ihu.
- 30
- Otira ka kite ia i te hau e kaha ana, ka wehi; a ka timata te totohu, ka karanga ake, ka mea, Ahau, e te Ariki, whakaorangia.
- 31
- A hohoro tonu te toro mai te ringa o Ihu, ka hopu i a ia, a ka mea ki a ia, E te tangata whakapono iti, he aha koe i ngakau rua ai?
- 32
- Ano ka eke raua ki runga ki te kaipuke, mutu pu te hau.
- 33
- Na, ka haere mai te hunga i runga i te kaipuke, ka koropiko ki a ia, ka mea, He pono ko koe te Tama a te Atua.
- 34
- A, to ratou whitinga atu, ka tae ki te whenua o Kenehareta.
- 35
- A ka mohio nga tāngata o taua wahi ki a ia, ka tono tangata atu puta noa i nga wahi tutata katoa o reira, hei kawe mai i nga turoro katoa ki a ia;
- 36
- A ka inoi ki a ia kia pa kau atu ratou ki te taniko o tona kakahu: a ora ake nga tāngata katoa i pa atu.
Address: 
Phone: 
Email: