- 1
- A ka pahure nga ra e ono, ka mau a Ihu ki a Pita, ki a Hemi raua ko tona teina ko Hoani, na, kawea ana ratou e ia ki runga ki tetahi maunga tiketike ki te wahi motu ke,
- 2
- A ka puta ke tona ahua i to ratou aroaro: a whiti tonu tona mata anō he ra, ma tonu ano hoki ona kakahu anō ko te māramatanga.
- 3
- Na, ka kitea e ratou a Mohi raua ko Iraia e korero ana ki a ia.
- 4
- Katahi ka oho atu a Pita, ka mea ki a Ihu, E te Ariki, he mea pai kia noho tatou i konei: ki te pai koe, ma matou e hanga etahi wharau ki konei kia toru; kia kotahi mou, kia kotahi mo Mohi, kia kotahi mo Iraia.
- 5
- I a ia ano e korero ana, na, ka taumarumarua iho ratou e te kapua mārama: na, he reo no te kapua e mea ana, Ko taku Tama tenei i aroha ai, ko taku i ahuareka atu ai; whakarongo ki a ia.
- 6
- Ano ka rongo nga akonga, ka takoto tapapa ratou, a rahi atu to ratou mataku.
- 7
- Na, ka haere mai a Ihu, ka pa ki a ratou, ka mea, Whakatika, kaua e wehi.
- 8
- Ano ka ara ake o ratou kanohi, kahore he tangata i kitea e ratou, ko Ihu anake.
- 9
- Na, i a ratou e heke iho ana i te maunga, ka whakatupato a Ihu i a ratou, ka mea, Kaua e korerotia ki te tangata te mea i kitea nei, kia ara ake ra ano te Tama a te tangata i te hunga mate.
- 10
- A ka ui ana akonga ki a ia, ka mea, He aha nga Karaipi ka mea ai, ko Iraia kia mātua puta mai?
- 11
- Na, ka whakahokia mai e Ihu, a ka mea ki a ratou, Ko Iraia e mātua puta mai hei whakatika i nga mea katoa.
- 12
- Ko taku ia tenei ki a koutou, Kua tae noa mai a Iraia, a kihai ratou i mohio ki a ia, heoi meatia ana e ratou ki a ia ta ratou i pai ai. E pera ano hoki te Tama a te tangata te mamae i a ratou.
- 13
- Katahi ka mohio nga akonga ko Hoani Kai iriiri tāna i korero ai ki a ratou.
- 14
- Ano ka tae atu ratou ki te mano, ka haere mai ki a ia tetahi tangata, ka tuturi nga turi ki a ia, ka mea,
- 15
- E te Ariki, kia aroha ki taku tamaiti: he haurangi hoki ia, he kino tona mamae: he maha hoki ona hinganga ki te kapura, he maha ki te wai.
- 16
- A i kawea atu ia e ahau ki āu akonga, heoi kihai ia i taea te whakaora e ratou.
- 17
- Na, ka oho mai a Ihu, ka mea, E te uri whakapono-kore, parori ke, kia pehea te roa o taku nohoanga ki a koutou? Kia pehea te roa o tahu manawanuitanga ki a koutou? Kawea mai ia ki konei ki a au.
- 18
- Na, ka riria atu te rewera e Ihu; a puta mai ana i roto i a ia; a ora ake te tamaiti i taua wa pu ano.
- 19
- Me i reira ka haere puku mai nga akonga ki a Ihu, ka mea, He aha ra tē ahei ai i a matou te pei i a ia ki waho?
- 20
- Na, ka mea mai a Ihu ki a ratou, Na to koutou whakapono-kore: he pono hoki taku e mea atu nei ki a koutou, Ki te mea he whakapono to koutou, pera me te pua nani te rahi, e mea atu koutou ki tenei maunga, Neke atu i konei ki tera wahi; a ka neke atu ano; kahore hoki he mea e kore e taea e koutou.
- 21
- Otira e kore e puta noa mai te pena, ma te inoi anake, ma te noho puku.
- 22
- A i a ratou e noho ana i Kariri, ka mea a Ihu ki a ratou, Meake tukua te Tama a te tangata ki nga ringaringa o nga tāngata:
- 23
- A ka whakamatea ia e ratou, a i te toru o nga ra ka ara. A nui atu to ratou pouri.
- 24
- A, to ratou taenga atu ki Kaperenauma, ka haere mai ki a Pita nga kai kohikohi i te hawhe hekere, ka mea, E kore ianei tou Kai whakaako e homai i te hawhe hekere?
- 25
- Ka mea ia, E hoatu ano. Ano ka tapoko ia ki roto ki te whare, ko Ihu kua korero ki a ia, kua mea, E pehea ana to whakaaro, e Haimona? E tangohia ana nga takoha me nga moni e nga kingi o te ao i ā wai? i ā ratou ake tamariki, i ā nga tāngata ke ranei?
- 26
- Ka mea atu a Pita ki a ia, I ā nga tāngata ke ano. Na, ko te kianga mai a Ihu ki a ia, Ha, pena ka haere noa nga tamariki.
- 27
- Ahakoa ra kei whakahe tatou i a ratou, haere koe ki te moana, piua tetahi matau, a ka eke te ika mātāmua, tangohia; na, ka whakatuwhera i tona mangai, ka kite ai koe i tetahi moni: tangohia tena, ka hoatu ki a ratou, hei mea moku, mou.
Address: 
Phone: 
Email: