- 1
- A ka mutu i a Ihu enei kupu, ka turia atu e ia i Kariri, a ka tae mai ki nga wahi o Huria, ki tawahi atu o Horano;
- 2
- A he tini te tangata i aru i a ia; a whakaorangia ana ratou e ia i reira.
- 3
- Na, ka haere mai nga Parihi ki a ia, ki te whakamatautau i a ia, ka mea ki a ia, He mea tika ranei kia whakarerea e te tangata tana wahine mo te tini o te mea?
- 4
- Na, ka whakahokia mai e ia, a ka mea ki a ratou, Kiano koutou i kite noa, i hangā raua e te kai hanga i te timatanga he tāne he wahine,
- 5
- A i mea ano ia, Mo konei ka mahue i te tangata tona pāpā tona whaea, a ka piri ki tana wahine: a hei kikokiko kotahi raua tokorua?
- 6
- Na, heoi ano to raua tokoruatanga, engari kotahi ano kikokiko. Na, ko ā te Atua, i hono ai, kaua e wehea e te tangata.
- 7
- Ka mea mai ratou ki a ia, He aha ra a Mohi i ako ai kia hoatu he pukapuka whakarere, ka whakarere ai i a ia?
- 8
- Ka mea mai ia ki a ratou, Na te pakeke o o koutou ngakau i tukua ai koutou e Mohi kia whakarere i ā koutou wāhine: i te timatanga iho ra ano ia kahore i pena.
- 9
- A tenei taku kupu ki a koutou, Ki te whakarere tetahi i tana wahine, a ehara i te take puremu, a ka marenatia ki tetahi atu, e puremu ana ia: a ki te marena tetahi i te wahine i whakarerea, e puremu ana ia.
- 10
- Ka mea mai ana akonga ki a ia, Ki te penei te tikanga a te tangata ki tana wahine, ehara te marena.
- 11
- Otira ka mea ia ki a ratou, E kore tenei kupu e rite i nga tāngata katoa, engari i te hunga i hoatu ai.
- 12
- He unaka hoki i pena ano i te whanautanga mai i te kopu o o ratou whaea: ko etahi unaka hoki, he mea whakaunaka na te tangata: ko etahi unaka hoki, he mea whakaunaka na ratou ano, he whakaaro hoki ki te rangatiratanga o te rangi. Ki te taea tenei te whakarite e tetahi, māna e whakarite.
- 13
- I reira, ka kawea mai he tamariki nonohi ki a ia, kia whakapa ai ia i ona ringaringa ki a ratou, a kia inoi: a riria iho ratou e nga akonga.
- 14
- Na, ko te kianga mai a Ihu, Tukua mai nga tamariki nonohi, aua hoki e araia atu ta ratou haere mai ki a au: no nga penei hoki te rangatiratanga o te rangi.
- 15
- A whakapākia iho e ia ona ringaringa ki a ratou, a haere atu ana i reira.
- 16
- Na, ko te haerenga mai o tetahi, ka mea ki a ia, E te Kai whakaako pai, he aha te mahi pai maku, e whiwhi ai ahau ki te ora tonu?
- 17
- Na, ko tana meatanga mai ki a ia, He aha ahau i kiia ai e koe he pai? kahore tetahi i pai, kotahi anake ko te Atua: ki te mea koe kia tomo atu ki te ora, whakaritea nga ture.
- 18
- Ka mea ia ki a ia, Ehea? Na, ka mea a Ihu, Kaua e patu tangata, Kaua e puremu, Kaua e tahae, Kaua e whakapae teka,
- 19
- Whakahonoretia tou pāpā me tou whaea: a, Kia aroha ki tou hoa tata anō ko koe.
- 20
- Ka mea atu taua taitamariki ki a ia, Kua rite i a au enei mea katoa no toku tamarikitanga: tena hoki tetahi mea e hapa ana i a au?
- 21
- Ka mea mai a Ihu ki a ia, Ki te mea koe kia tino tika, haere, hokoa ou taonga, ka hoatu ki nga rawa-kore, a e whai taonga koe ki te rangi: a haere mai i muri i a au.
- 22
- Na, te rongonga, o taua taitamariki i taua kupu, haere pouri ana ia: he maha hoki ona taonga.
- 23
- Ka mea mai a Ihu ki ana akonga, He pono taku kupu ki a koutou, E tapoko whakauaua te tangata taonga ki te rangatiratanga o te rangi.
- 24
- Tenei ano hoki taku kupu ki a koutou, Erangi te haere o te kamera ra te kowhao o te ngira he mea takoto noa, he whakauaua rawa ia te haere o te tangata taonga ki roto ki te rangatiratanga o te Atua.
- 25
- Ano ka rongo ana akonga, rahi rawa to ratou miharo, ka mea, Ko wai ra e ora?
- 26
- Na, ka titiro mai a Ihu, ka mea ki a ratou, Ki te tangata e kore tenei e taea; ki te Atua ia e taea nga mea katoa.
- 27
- Katahi ka whakahokia atu e Pita, a ka mea ki a ia, Na, kua mahue nei i a matou nga mea katoa, kua aru nei i a koe; he aha ra ma matou?
- 28
- Na, ka ki mai a Ihu ki a ratou, He pono taku e mea atu nei ki a koutou, Ko koutou i aru nei i a au, ka taea te whanautanga houtanga, te wa e noho ai te Tama a te tangata ki runga ki te torona o tana kororia, ka noho ano koutou ki runga ki nga torona kotahi tekau ma rua, ki te whakawa i nga iwi kotahi tekau ma rua o Iharaira.
- 29
- A ki te mea kua mahue i tetahi he whare, he teina, he tuāhine ranei, he pāpā, he whaea, he wahine, he tamariki, he māra, he whakaaro hoki nāna ki toku ingoa, ka tātaki rau nga mea e riro mai i a ia, a e whiwhi ano ia ki te oranga mutunga kore.
- 30
- He tokomaha ia o mua e waiho ki muri; a ko o muri ki mua.
Address: 
Phone: 
Email: