- 1
- A te putanga mai o Ihu ki waho, ka haere atu i te temepara: a ka haere mai ana akonga kia whakakitea ki a ia nga whare i hangā mo te temepara.
- 2
- Na, ko te meatanga mai a Ihu ki a ratou, Kahore ianei koutou e kite i enei mea katoa? He pono taku e mea atu nei ki a koutou, E kore e toe ki konei tetahi kohatu ki runga ki tetahi kohatu, engari ka whakahoroa katoatia.
- 3
- A, i a ia e noho ana i runga i maunga Oriwa, ka haere puku mai nga akonga ki a ia, ka mea, Korerotia mai ki a matou, ko ahea enei mea? he aha hoki te tohu o to haerenga mai, o te mutunga hoki o te ao?
- 4
- Na, ka whakahokia mai e Ihu, a ka mea ki a ratou, Kia tupato kei mamingatia koutou e te tangata.
- 5
- He tokomaha hoki e haere mai i runga i toku ingoa, e mea, Ko te Karaiti ahau, a he tokomaha e mamingatia.
- 6
- A e rongo koutou ki nga pakanga, ki nga rongo pakanga: kia tupato kei ohorere koutou: ta te mea kua takoto he putanga mai mo enei mea katoa, taihoa ia te mutunga.
- 7
- E whakatika mai hoki tetahi iwi ki tetahi iwi, tetahi rangatiratanga hoki ki tetahi rangatiratanga: a e puta nga po mate kai, me nga mate uruta, me nga ru, ki te tini o te wahi.
- 8
- Otiia ko te timatanga enei mea katoa o nga mamae.
- 9
- Ko reira koutou tukua ai kia tukinotia, a e whakamatea koutou; e whakakinongia e nga iwi katoa, he whakaaro hoki ki toku ingoa.
- 10
- Ko reira ano hoki he tokomaha e hē, a ka tuku etahi i etahi, a ka kino etahi ki etahi.
- 11
- He tokomaha ano hoki nga poropiti teka e whakatika, a he tokomaha e mamingatia e ratou.
- 12
- A i te kino ka hua, ka matoke haere te aroha o te tokomaha.
- 13
- Ko te tangata ia e u ana, a taea noatia te mutunga, ka ora ia.
- 14
- A e kauwhautia tenei rongo pai o te rangatiratanga, puta noa i te ao, hei mea whakaatu ki nga iwi katoa; a ko reira puta mai ai te mutunga.
- 15
- A e kite koutou i te mea whakarihariha, i te mea whakangaro, ta Raniera poropiti i korero ai, e tu ana i te wahi tapu, (kia mātau te kai titiro pukapuka:)
- 16
- Ko reira kia rere te hunga i Huria ki nga maunga:
- 17
- Te tangata i runga i te whare, kei heke iho ki te tiki mea i roto i tona whare:
- 18
- Kauaka ano hoki te tangata i te māra e hoki ki te tiki i ona kakahu.
- 19
- Aue te mate mo te hunga e hapū ana, mo nga mea hoki e whangai ana ki te u, i aua ra!
- 20
- Ma koutou ia e inoi kei rokohanga koutou e te whati i te hotoke, i te hapati ranei:
- 21
- No te mea ka nui te whakapawera o reira, he mea kahore ona rite o te timatanga ra ano o te ao, a mohoa noa nei, e kore ano hoki e pera e takoto ake nei.
- 22
- A, me i kahore aua ra i poroa i waenga, hore he kikokiko e ora: otira ka whakaaroa te hunga i whiriwhiria, a ka poroa aua ra.
- 23
- Ki te mea tetahi ki a koutou i reira, Na, tenei a te Karaiti, na, tera; aua e whakaponohia.
- 24
- E whakatika hoki nga Karaiti teka, me nga poropiti teka, a ka hoatu e ratou nga tohu nunui, me nga mea whakamiharo; a me he mea e taea, ka mamingatia ano hoki te hunga i whiriwhiria.
- 25
- Na, kua korerotia wawetia nei e ahau ki a koutou.
- 26
- Na, ahakoa mea mai ratou ki a koutou, Na, kei te koraha ia; aua e haere atu: Na, kei nga ruma o roto rawa; aua e whakaponohia.
- 27
- Ka rite hoki ki te uira e puta mai nei i te rawhiti, a hiko tonu atu te weta, te haerenga mai o te Tama a te tangata.
- 28
- Ko te wahi hoki i te tupapaku, ko reira ano hoki huihui ai nga kāhu.
- 29
- A, muri tonu iho i te whakapawera i aua ra ka whakapouritia te ra, e kore ano hoki e titi te atarau, ka taka iho nga whetu i te rangi, a ka ngaueue nga mea kaha o nga rangi:
- 30
- Ko reira ano hoki puta mai ai te tohu o te Tama a te tangata i te rangi: a ko reira nga iwi katoa o te whenua tangi ai, a e kite ratou i te Tama a te tangata e haere mai ana i runga i nga kapua o te rangi me te kaha me te kororia nui.
- 31
- A e tonoa e ia ana anahera me te tētere tangi nui, a ka huihuia e ratou āna i whiriwhiri ai i nga hau e wha, i etahi pito o te rangi puta noa i etahi pito.
- 32
- Na, kia akona koutou e te piki ki tetahi kupu whakarite; I tona manga e ngawari ana ano, a e puta ana nga rau, ka mohio koutou ka tata te raumati:
- 33
- Whaihoki ko koutou, ina kite i enei mea katoa, ka mātau ka tata, kei nga kuwaha.
- 34
- He pono taku e mea atu nei ki a koutou, E kore rawa tenei whakatupuranga e pahemo, kia puta katoa ra ano enei mea.
- 35
- Ko te rangi me te whenua e pahemo, ko aku kupu ia e kore e pahemo.
- 36
- Otira kahore tetahi tangata e mohio ki taua ra, ki taua haora, kahore nga anahera o te rangi, ko toku Matua anake.
- 37
- Ka rite hoki ki nga ra i a Noa te haerenga mai o te Tama a te tangata.
- 38
- Ka rite hoki ki ta ratou i nga ra i mua atu o te waipuke, e kai ana ratou, e inu ana, e marena ana, e hoatu ana kia marenatia, a tae noa ki te ra i tomo ai a Noa ki roto ki te āka,
- 39
- A kahore ratou i mohio, a, pakaru noa te waipuke, a kahakina katoatia ana ratou; e pera ano hoki te haerenga mai o te Tama a te tangata.
- 40
- I taua wa tokorua ki te māra; kotahi e tangohia, kotahi e waiho.
- 41
- Tokorua wāhine e huri ana i te mira; kotahi e tangohia, kotahi e waiho.
- 42
- Kia mataara rapea: e kore hoki koutou e mohio ki te haora e puta mai ai to koutou Ariki.
- 43
- Kia mohio ki tenei, me i mātau te tangata o te whare ki te mataaratanga e puta mai ai te tahae, kua mataara ia, a kahore i tukua tona whare kia pokaia.
- 44
- Na, kia tatanga ano hoki koutou: no te mea ka puta mai te Tama a te tangata i te haora e kore ai koutou e mahara.
- 45
- Ko wai ra te pononga pono, te pononga mahara, i meinga e tona ariki hei rangatira mo ana tāngata, hei hoatu i te kai ma ratou i te wa e tika ai?
- 46
- Ka koa taua pononga, e rokohanga e tona ariki, ina haere mai, e pera ana.
- 47
- He pono taku e mea atu nei ki a koutou, Ka meinga ia hei rangatira mo ona taonga katoa.
- 48
- Otira ki te mea taua pononga kino i roto i tona ngakau, Ka roa te putanga mai o toku ariki;
- 49
- A ka anga ka patu i ona hoa pononga, ka kai ka inu tahi me te hunga haurangi;
- 50
- E tae mai te ariki o taua pononga i te ra e kore ai ia e mahara, i te haora e kore ai ia e mohio,
- 51
- A ka hatepea putia ia, ka meinga mona wahi i roto i te hunga tinihanga: ko te wahi tera o te tangihanga me te teteatanga o nga niho.
Address: 
Phone: 
Email: