Matthew Chapter 8 - Paipera Tapu 1868 | Te Paipera Tapu 1868

Matthew Chapter 8 - Paipera Tapu 1868

1
A no ka heke iho ia i te maunga, he tini te tangata i aru i a ia.
2
Na, ka haere mai tetahi repera, ka koropiko ki a ia, ka mea, E te Ariki, ki te pai koe, e taea ahau e koe te mea kia ma.
3
A ka totoro mai te ringa o Ihu, ka pa ki a ia, ka mea, E pai ana ahau; kia ma koe. A ma tonu iho tona repera.
4
Katahi ka mea a Ihu ki a ia, Kia mahara, kei korerotia e koe ki te tangata; erangi haere, kia kite te tohunga i a koe, mauria atu hoki te whakahere i whakarite e Mohi, hei mea whakaatu ki a ratou.
5
Ano ka tae a Ihu ki Kaperenauma, ka haere mai ki a ia tetahi keneturio, ka inoi ki a ia,
6
Ka mea, E te Ariki, ko taku pononga kei te whare e takoto ana, he pararutiki, e ngaua kinotia ana.
7
A ka mea a Ihu ki a ia, Ka haere atu ahau ki te whakaora i a ia.
8
Na, ko te whakahokinga atu a te keneturio, te meatanga atu, E te Ariki, ehara ahau i te tikanga tangata e haere ake ai koe ki raro i taku tuanui: engari kia puaki kau mai to kupu, a ka ora taku pononga.
9
He tangata hoki ahau e whakahaua ana, he hoia ano aku hei whakahaunga maku: ka mea atu ahau ki tenei, Haere, na, ka haere ia; ki tetahi, Haere mai, a ka haere mai; ki taku pononga hoki, Meatia tenei, a ka meatia e ia.
10
A, te rongonga, o Ihu, ka miharo, a ka mea ki te hunga e aru mai ana, He pono taku e mea atu nei ki a koutou, Kahore ano ahau i kite noa i te whakapono hei rite mo tenei te nui, i roto i a Iharaira.
11
Ko taku kupu ano tenei ki a koutou, He tokomaha e haere mai i te rawhiti, i te weta, a e noho tahi i a Aperahama, i a Ihaka, i a Hakopa, ki te rangatiratanga o te rangi.
12
Ko nga tamariki ia o te rangatiratanga ka makā ki te pouri i waho: ko te wahi tera o te tangihanga me teteatanga o nga niho.
13
Na, ka mea mai a Ihu ki te keneturio, Haere, kia rite ki tou whakapono te meatanga ki a koe. A ora ake tana pononga i taua wa pu ano.
14
Ano ka tae a Ihu ki te whare o Pita, ka kite ia i tona hungawai wahine, e takoto mate ana he kiri ka.
15
Na, ka pa ia ki tona ringaringa, mutu ake tona kiri ka: a ara ake ana ia ki te taka mea ma ratou.
16
Na i te ahiahi he tokomaha te hunga e nohoia ana e nga rewera i mauria mai ki a ia: na, ka peia e tana kupu nga wairua ki waho, a whakaorangia ake e ia te hunga mate katoa:
17
I rite ai ta Ihaia poropiti i korero ai, i mea ai, Nāna i tango o tatou ngoikoretanga, i waha o tatou mate.
18
A, te kitenga, o Ihu he tini nga tāngata e mui ana ki a ia, ka whakahau ia kia whakawhiti atu ki tawahi.
19
A ka haere mai tetahi Karaipi, ka mea ki a ia, E te Kai whakaako, ka aru ahau i a koe ki nga wahi katoa e haere ai koe.
20
A, ko te meatanga atu a Ihu ki a ia, He rua o nga pokiha, he kowhanga o nga manu o te rangi; tena ko te Tama a te tangata kahore ona wahi e takoto ai tona mātenga.
21
A i mea tetahi atu o ana akonga ki a ia, E te Ariki, tukua ahau kia mātua haere ki te tanu i toku pāpā.
22
Na, ka mea a Ihu ki a ia, Arumia mai au: a waiho ma nga tupapaku e tanu a ratou tupapaku.
23
Ano ka eke ia ki te kaipuke, ka aru ana akonga i a ia.
24
Na, tutū rawa te puehu o te moana, a ngaro iho te kaipuke i te ngaru: a i te moe ano ia.
25
A ka haere mai ana akonga, ka whakaara i a ia, ka mea, E te Ariki, whakaorangia tatou, ka mate tatou.
26
A ka mea atu ia ki a ratou, He aha ta koutou ē wehi, e te hunga whakapono iti? Me i reira ka ara ia a riria iho e ia te hau me te moana; a marino noa iho.
27
A miharo noa nga tāngata, ka mea, He tangata aha tenei, ina rongo rawa te hau me te moana ki a ia!
28
Ano ka whiti ia ki tarawahi ki te whenua o nga Kerekehini, ka tutaki ki a ia nga tāngata tokorua e nohoia ana e nga rewera, e haere mai ana i roto i nga urupa, he hunga tutū rawa, tē taea taua huarahi te haere e te tangata.
29
Na, ka karanga ake raua, ka mea, He aha maua nāu, e Ihu, e te Tama a te Atua? kua tae mai oti koe ki te whakamamae i a māua i te mea kahore ano i rite te taima?
30
A i tawhiti atu i a ratou tetahi kahui poaka, e kai ana, he tini.
31
A ka inoi nga rewera ki a ia, ka mea, Ki te pei koe i a matou, tukua matou kia haere ki roto ki te kahui poaka.
32
Na, ka mea ia ki a ratou, Haere. A, to ratou putanga mai ki waho, haere ana ki roto ki te kahui poaka; na, ko te tino rerenga katoatanga o te kahui poaka ra te pari ki te moana, a mate iho ki roto ki te wai.
33
Na, ka whati nga kai whangai, a haere ana ki te pa, korero ana i nga mea katoa, me te meatanga ki te hunga i nohoia e nga rewera.
34
Na, puta katoa mai ana te pa ki waho ki te whakatau i a Ihu; a ka kite i a ia, ka tohe kia haere atu ia i o ratou wahi.