- 1
- Heoi i a Marama Nihana i te rua tekau o nga tau o Kingi Arataherehe, na, he waina kei tona aroaro: a ka hapainga ake e ahau te waina, hoatu ana e ahau ki te kingi; kahore ano hoki ahau i pouri i mua ki tona aroaro.
- 2
- Na, ko te meatanga mai a te kingi ki a au, He aha tou kanohi i pouri ai; kahore nei hoki ou mate? ehara tenei i te mea ke atu i te pouritanga ngakau. Na, nui whakaharahara toku wehi.
- 3
- Ano ra ko ahau ki te kingi, Kia ora tonu te kingi, He aha toku mata i kore ai e pouri, i te mea kua ururuatia te pa, te whare o nga tanumanga o oku mātua, a kua pau ona kēti i te ahi.
- 4
- Ano ra ko te kingi ki a au, He aha te mea ka tonoa nei e koe. Na, ko taku inoinga atu ki te Atua o te rangi.
- 5
- Katahi ahau ka ki atu ki te kingi, Ki te mea e pai ana ki te kingi, ki te mea hoki e paingia ana to pononga i tou aroaro, kia ungā ahau e koe ki Hura ki te pa o nga tanumanga o oku mātua, kia hangā ai e ahau.
- 6
- Na, ko te meatanga mai a te kingi ki a au, (i tona taha ano hoki te kuini e noho ana,) Kia pehea te roa ou ka haere nei, ahea ano hoki koe hoki mai ai? Na, kua pai ki te aroaro o te kingi, a, ungā ana ahau e ia, a ka whakaritea ano e ahau he wa ki a ia.
- 7
- I mea ano ahau ki te kingi, Ki te mea e pai ana ki te kingi, kia homai ki a au etahi pukapuka ki nga kawana i tera taha o te awa, kia kawea ai ahau e ratou, a tae noa ki Hura,
- 8
- Me tetahi pukapuka ki a Ahapa, kai tiaki o te ngahere a te kingi, kia homai e ia etahi rakau ki a au hei hanga mo nga rakau o nga kēti o te nohoanga rangatira i te whare, mo te taiepa hoki o te pa, mo te whare ano hoki e haere atu ai ahau. Na, ka homai e te kingi ki a au: i rite tonu ki ta te ringa pai o toku Atua i runga i a au.
- 9
- Na, ko taku haerenga mai ki nga kawana i tenei taha o te awa; hoatu ana e ahau nga pukapuka a te kingi ki a ratou. I ungā mai ano hoki e te kingi etahi rangatira hoia, me etahi hoia eke hoiho hei hoa moku.
- 10
- A, te rongonga a Hanaparata Horoni raua ko te pononga ko Topia Amoni, na, nui rawa te kino i kino ai taua mea ki a raua; no te mea kua tae mai he tangata hei rapu i te pai mo nga tamariki a Iharaira.
- 11
- Na, kua tae ahau ki Hiruharama, a, e toru oku ra ki reira.
- 12
- Na, ka maranga ahau i te po, matou ko etahi tangata torutoru hei hoa moku; kihai hoki i korerotia e ahau ki tetahi tangata ta toku Atua i homai ai ki toku ngakau kia meatia ki Hiruharama: kahore ano hoki oku kararehe; heoi ano ko te kararehe i eke mai ai ahau.
- 13
- I haere atu ano hoki ahau i te po i te kuwaha o te raorao, ki te ritenga atu ano o te puna tarakona, ki te kuwaha paru ano hoki, a, tirotirohia iho e ahau nga taiepa o Hiruharama kua pakaru nei, me ona kēti kua pau nei i te ahi.
- 14
- Katahi ahau ka haere atu ki te kuwaha o te puna, ki te poka wai ano hoki a te kingi, heoi kahore he wahi e haere atu ai te kararehe e waha ana i a au.
- 15
- Na, piki ana ahau i te awaawa i te po, tirotirohia ana e ahau te taiepa. Na, tahuri mai ana ahau, tomo ana na te kuwaha o te raorao, hoki mai ana.
- 16
- Kihai hoki nga rangatira i mohio e haere ana ranei ahau ki hea, he aha ranei taku e mea nei; kahore ano kia korerotia noatia e ahau ki nga Hurai, ki nga tohunga, ki nga tino tangata, ki nga rangatira, ki tera atu hunga ano hoki i mahi nei i nga mahi.
- 17
- Na, ko taku meatanga atu ki a ratou, Ka kite koutou i te nui o tenei aitua i a tatou nei, ko Hiruharama kua ururuatia, ko ona kēti kua wera i te ahi. Haere mai, tatou ka hanga i te taiepa o Hiruharama; kei waiho tonu tatou hei tawainga.
- 18
- Katahi ka korerotia e ahau ki a ratou te ringa pai o toku Atua i runga nei i a au, me nga kupu ano a te kingi i korerotia mai e ia ki a au. Na, ko ta ratou meatanga mai, Tatou ka whakatika, ka hanga. Na, kei te whakakaha ratou i o ratou ringa mo tenei mahi pai.
- 19
- A, te rongonga o Hanaparata Horoni, ratou ko te pononga ko Topia Amoni, ko Keheme o Arapia, ka whakahi mai ratou ki a matou, ka whakahawea ki a matou, ka mea, He aha tenei mea ka meatia nei e koutou? ka whakakeke ranei koutou ki te kingi?
- 20
- Na, ka whakahokia atu e ahau he kupu ki a ratou, a ka mea ki a ratou, Te Atua o te rangi, mana e tika ai to matou. Na, ka whakatika matou ana tangata, ka hanga. Kahore ia o koutou wahi, tikanga, maharatanga ranei, i roto i Hiruharama.
Address: 
Phone: 
Email: