- 1
- A i korero mai a Ihowa ki a Mohi i te koraha o Hinai i roto i te tapenakara o te whakaminenga, i te ra tuatahi o te rua o nga marama, i te rua o nga tau o to ratou haerenga mai i te whenua o Ihipa, i mea,
- 2
- Tirohia iho te tokomahatanga o te whakaminenga katoa o nga tamariki a Iharaira, tona hapu tona hapu, nga whare o o ratou mātua, me te tatau ano i te ingoa o tenei tangata o tenei tangata o nga tane katoa;
- 3
- Nga mea e rua tekau, me nga mea i maha atu nga tau, nga mea hoki e kaha ana i roto i a Iharaira ki te haere atu ki te whawhai: ma korua ko Arona ratou e tatau, tenei ope tenei ope.
- 4
- Kia kotahi ano hoki te tangata o tenei iwi o tenei iwi, hei hoa mo korua; ara, nga upoko o tenei whare o tenei whare o o ratou mātua.
- 5
- Ko nga ingoa hoki enei o nga tangata e tu tahi me korua: no Reupena; ko Erituru tama a Hereuru.
- 6
- No Himeona; ko Herumiere tama a Turiharai.
- 7
- No Hura; ko Nahahona tama a Aminarapa.
- 8
- No Ihakara; ko Netaneere tama a Tuara.
- 9
- No Hepuruna; ko Eriapa tama a Herona.
- 10
- No nga tamariki a Hohepa: no Eperaima; ko Erihama tama a Amihuru no Manahe; ko Kamariere tama a Peraturu.
- 11
- No Peniamine; ko Apirana tama a Kireoni.
- 12
- No Rana; ko Ahietere tama a Amiharai.
- 13
- No Ahera; ko Pakiere tama a Okorana.
- 14
- No Kara; ko Eriahapa tama a Teuere.
- 15
- No Napatari; ko Ahira tama a Enana.
- 16
- Ko nga mea whai ingoa enei o te whakaminenga, he ariki no nga iwi o o ratou mātua, ko nga upoko o nga mano i roto i a Iharaira.
- 17
- Na, ka tikina e Mohi raua ko Arona enei tangata, no ratou nga ingoa kua whakahuatia nei.
- 18
- A huihuia mai ana e ratou te whakaminenga katoa i te tuatahi o te rua o nga marama, a ka whakapapa ratou, tenei hapu tenei hapu, me nga whare o o ratou mātua, tatau rawa nga ingoa o tenei o tenei, o nga mea e rua tekau, me nga mea hoki i maha atu o ratou tau.
- 19
- Rite tonu ki ta Ihowa i whakahau ai ki a Mohi tana tauanga i a ratou i te koraha o Hinai.
- 20
- A ko nga tamariki a Reupena a te matamua a Iharaira, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o tenei o tenei, o nga tane katoa e rua nei tekau o ratou tau, me nga mea hoki i maha atu, o nga mea katoa i kaha ki te haere atu ki te whawhai;
- 21
- Nga mea o ratou, ara, o te iwi o Reupena, i taua, e wha tekau ma ono mano e rima hoki nga rau.
- 22
- No nga tamariki a Himeona, puta noa i o ratou toronga, i o ratou hapu, i nga whare o o ratou mātua, nga mea o ratou i taua, tatau rawa nga ingoa o tenei o tenei, o nga tane katoa e rua nei tekau, i maha atu hoki nga tau, o nga mea katoa i kaha ki te haere atu ki te whawhai;
- 23
- Nga mea i taua o ratou, ara, o te iwi o Himeona, e rima tekau ma iwa mano e toru hoki nga rau.
- 24
- No nga tamariki a Kara, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua nei tekau, i maha atu hoki nga tau, o nga mea katoa i kaha ki te haere atu ki te whawhai;
- 25
- Nga mea i taua o ratou, ara, o te iwi o Kara, e wha tekau ma rima mano e ono rau e rima hoki nga tekau.
- 26
- No nga tamariki a Hura, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 27
- Nga mea i taua o ratou, ara, o te iwi o Hura, e whitu tekau ma wha nga mano e ono hoki nga rau.
- 28
- No nga tamariki a Ihakara, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 29
- Nga mea i taua o ratou, ara, o te iwi o Ihakara, e rima tekau ma wha mano e wha hoki nga rau.
- 30
- No nga tamariki a Hepuruna, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 31
- Nga mea i taua o ratou, ara, o te iwi o Hepuruna, e rima tekau ma whitu mano e wha hoki nga rau.
- 32
- No nga tamariki a Hohepa, ara, no nga tamariki a Eperaima, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 33
- Nga mea i taua o ratou, ara, o te iwi o Eperaima, e wha tekau nga mano e rima nga rau.
- 34
- No nga tamariki a Manahe, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 35
- Nga mea i taua o ratou, ara, o te iwi o Manahe, e toru tekau ma rua mano e rua hoki nga rau.
- 36
- No nga tamariki a Peniamine, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 37
- Nga mea i taua o ratou, ara, o te iwi o Peniamine, e toru tekau ma rima mano e wha hoki nga rau.
- 38
- No nga tamariki a Rana, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 39
- Nga mea i taua o ratou, ara, o te iwi o Rana, e ono tekau ma rua nga mano e whitu hoki nga rau.
- 40
- No nga tamariki a Ahera, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 41
- Nga mea i taua o ratou, ara, o te iwi o Ahera, e wha tekau ma tahi nga mano e rima hoki nga rau.
- 42
- No nga tamariki a Napatari, puta noa i o ratou toronga, i o ratou hapu, i nga whare o o ratou mātua, tatau rawa nga ingoa o nga mea e rua tekau, i maha atu hoki o ratou tau, o nga mea katoa i kaha ki te haere atu ki te whawhai;
- 43
- Nga mea i taua o ratou, ara, o te iwi o Napatari, e rima tekau ma toru nga mano e wha hoki nga rau.
- 44
- Ko nga mea enei i taua, i taua nei e Mohi ratou ko Arona, ko nga ariki o Iharaira, kotahi tekau ma rua tangata hoki enei: takikotahi tonu te tangata i roto i te whare o ona mātua.
- 45
- A ko aua tangata i taua o nga tamariki a Iharaira, puta noa i nga whare o o ratou matua, nga mea e rua tekau, i maha atu hoki o ratou tau, o nga mea katoa i roto i a Iharaira i kaha ki te haere ki te whawhai;
- 46
- Ko aua tangata katoa hoki i taua e ono rau mano e toru mano e rima hoki nga rau me nga tekau e rima.
- 47
- Ko nga Riwaiti ia, puta noa i te iwi o o ratou mātua kihai i taua i roto i a ratou.
- 48
- Na Ihowa hoki i korero ki a Mohi, i mea,
- 49
- Otiia kaua e taua te iwi o Riwai kaua ano hoki e tirohia iho to ratou tokomahatanga i roto i nga tamariki a Iharaira:
- 50
- Engari me whakarite iho nga Riwaiti mo te tapenakara o te whakaaturanga, mo nga oko katoa hoki o reira, mo ona mea katoa ano hoki: ma ratou te tapenakara e amo, me ona oko katoa; a me mahi ki reira, me noho hoki ki tetahi taha ki tetahi taha o te tapenakara.
- 51
- A ka maunu atu te tapenakara, ma nga Riwaiti e wahi iho, ka whakaturia ano hoki te tapenakara, ma nga Riwaiti e whakatu: ki te whakatata mai hoki te tangata ke, ka whakamatea.
- 52
- Me whakatu ano hoki o ratou teneti e nga tamariki a Iharaira ki tona puni ki tona puni, to tenei tangata to tenei tangata ki te taha o tana kara, puta noa i o ratou ope.
- 53
- Ko nga Riwaiti ia, me whakatu o ratou ki tetahi taha ki tetahi taha o te tapenakara o te whakaaturanga, kei puta he riri ki te whakaminenga o nga tamariki a Iharaira: a ma nga Riwaiti e tiaki te tapenakara o te whakaaturanga.
- 54
- A rite tonu ki nga mea katoa i whakahaua mai e Ihowa ki a Mohi ta nga tamariki a Iharaira i mea ai, i pera ano ratou.
Address: 
Phone: 
Email: