- 1
- A i korero ano a Ihowa ki a Mohi, i mea,
- 2
- Hangā etahi tetere hiriwa mau, kia rua, kia kotahi tonu tetahi, kia kotahi tonu tetahi, ina hangā e koe; hei tawhiunga mai mau i te hui, mo nga maunutanga ano hoki o nga puni.
- 3
- A ka whakatangihia aua mea e ratou, me huihui mai te huihui katoa ki a koe, ki te whatitoka o te tapenakara o te whakaminenga.
- 4
- A ki te mea kotahi ano e whakatangihia e ratou, na, me huihui mai ki a koe nga ariki, nga upoko o nga mano o Iharaira.
- 5
- Ka whakatangihia he whakaoho e koutou, na, ka hapainga atu nga puni e noho ana ki te taha ki te rawhiti.
- 6
- A ka rua a koutou whakatangihanga o te whakaoho, na, ka hapainga atu nga puni e noho ana ki te taha ki te tonga: me whakatangi he whakaoho e ratou mo o ratou maunutanga.
- 7
- A ka meatia kia whakaminea mai te whakaminenga, me whakatangi e koutou otiia kaua e whakaohokia.
- 8
- Ma nga tama hoki a Arona, ma nga tohunga, e whakatangi nga tetere; a ka waiho ena mea ki a koutou hei tikanga, tuku iho tuku iho ki o koutou whakatupuranga.
- 9
- A ki te anga koutou ki te whawhai i to koutou whenua ki te hoa riri e whakatupu-kino ana i a koutou, na, me whakatangi he whakaoho e koutou ki nga tetere; a ka maharatia koutou e Ihowa e to koutou Atua, ka whakaorangia hoki i o koutou hoa riri.
- 10
- I te ra ano hoki e hari ai koutou, i o koutou ra nui hoki, i nga timatanga o o koutou marama, me whakatangi e koutou nga tetere ki runga i a koutou tahunga tinana, ki runga i hoki i nga patunga tapu, i a koutou whakamarietanga; kia ai ena mea hei whakamaharatanga, ki a koutou ki te aroaro o to koutou Atua: ko Ihowa ahau, ko to koutou Atua.
- 11
- A i te rua tekau o te rua o nga marama, i te rua o nga tau, na, kua riro ake te kapua i runga i te tapenakara o te whakaaturanga.
- 12
- Na, ka hapainga atu nga tamariki a Iharaira i te koraha o Hinai; a ka tau iho te kapua ki te koraha o Parana.
- 13
- A rite tonu ta ratou hapainga mataatitanga ki te kupu a Ihowa i whakapuakina e Mohi.
- 14
- Na, te tuatahi i maunu atu, ko te kara o te puni o nga tamariki a Hura, me o ratou ropu: a ko te kai whakahaere o tana ope, ko Nahahona tama a Aminarapa.
- 15
- A te kai whakahaere o te ope o te iwi o nga tamariki a Ihakara ko Netaneere tama Tuara.
- 16
- Te kai whakahaere hoki o te ope o te iwi o nga tamariki a Hepuruna, ko Eriapa tama a Herona.
- 17
- Na, ka wahia iho te tapenakara; a ka turia atu e nga tamariki a Kerehona, ratou ko nga tamariki a Merari, me te amo ano i te tapenakara.
- 18
- Na, ka maunu atu ko te kara o te puni o Reupena, me o ratou ropu: ko te kai whakahaere o tana ope, ko Erituru tama a Hereuru.
- 19
- A te kai whakahaere o te ope o te iwi o nga tamariki a Himeona, ko Herumiere tama a Turiharai.
- 20
- A te kai whakahaere o te ope o te iwi o nga tamariki a Kara, ko Eriahapa tama a Teuere.
- 21
- Na, ka turia atu e nga Kohati me te amo i te nohoanga tapu: a tae rawa atu ratou kua whakaturia te tapenakara.
- 22
- Na, ka maunu atu ko te kara o te puni o nga tamariki a Eperaima, me o ratou ropu: a te kai whakahaere o tana ope ko Erihama tama a Amihuru.
- 23
- A te kai whakahaere o te ope o te iwi o nga tamariki a Manahe ko Kamariere tama a Peraturu.
- 24
- A te kai whakahaere o te ope o te iwi o nga tamariki a Peniamine ko Apirana tama a Kireoni.
- 25
- Na ka maunu atu ko te kara o te puni o nga tamariki a Rana, ko te hiku tena o nga puni katoa, puta noa i a ratou ope: a te kai whakahaere o tana ope ko Ahietere tama a Amiharai.
- 26
- A te kai whakahaere o te ope o te iwi o nga tamariki a Ahera ko Pakiere tama a Okorana.
- 27
- A te kai whakahaere o te ope o te iwi o nga tamariki a Napatari ko Ahira tama a Enana.
- 28
- Ko nga maunutanga enei o nga tamariki a Iharaira, me o ratou ope, i o ratou whakatikanga atu.
- 29
- A i mea ano a Mohi ki a Hopapa tama a Reuere Miriani hungawai o Mohi, E haere ana matou ki te wahi i mea nei a Ihowa, Ka hoatu a reira e ahau ki a koutou: haere mai tatou, a ka pai ta matou mahi ki a koe: he pai hoki te korero a Ihowa mo Iharaira.
- 30
- A ka mea mai ia ki a ia, E kore ahau e tae: engari me haere ahau ki toku whenua ki oku whanaunga.
- 31
- A ka mea atu ia, Kaua ra matou e whakarerea; e mohio ana hoki koe ki nga puni mo matou o te koraha, a ka ai koe hei kanohi mo matou.
- 32
- Na, tenei ake, ki te haere koe i a matou, ina, tenei ake ko te pai e meatia mai e Ihowa ki a matou ka meatia ano tena e matou ki a koe.
- 33
- Na, ka turia atu e ratou i te maunga o Ihowa, e toru nga ra i haere ai; a i haere ano te aaka a te kawenata o Ihowa i mua i a ratou, i nga ra e toru i haere ai, ki te whakataki i tetahi okiokinga mo ratou.
- 34
- A i runga i a ratou te kapua o Ihowa i te awatea, i to ratou whakatikanga atu i te puni.
- 35
- A ka maunu atu te aaka, na, ka mea a Mohi, Whakatika, e Ihowa, a kia marara o hoa riri; kia rere hoki i tou aroaro te hunga e kino ana ki a koe.
- 36
- A ka tu, na, ka mea ia, Hoki mai, e Ihowa, ki nga mano tini o Iharaira.
Address: 
Phone: 
Email: