Numbers Chapter 16 - Paipera Tapu 1868 | Te Paipera Tapu 1868

Numbers Chapter 16 - Paipera Tapu 1868

1
Na, ka tango tangata a Koraha tama a Itihara, (he tama ano ia na Kohata tama a Riwai,) ratou ko Ratana ko Apirama, ko nga tama a Eriapa, ko Ono hoki tama a Perete, he tamariki na Reupena.
2
A ka whakatika ratou ko etahi tangata o nga tamariki a Iharaira ki te aroaro o Mohi, e rua rau e rima tekau, he rangatira no te whakaminenga, e rangona ana i roto i te huihuinga, he hunga whai ingoa.
3
A ka huihui mai ratou ki a Mohi raua ko Arona, a ka mea ki a raua, Kati ta korua, he tapu kau hoki te whakaminenga katoa, kei waenganui ano hoki a Ihowa i a ratou: a na te aha ra korua i whakanui ai i a korua ki runga ake i te whakaminenga a Ihowa?
4
A, te rongonga o Mohi, na, ka hinga tapapa iho ia:
5
A ka korero ki a Koraha ratou ko tana hui katoa, ka mea, A te ata ka whakaaturia mai e Ihowa ko wai tana, ko wai hoki te mea tapu; ka meinga hoki e ia kia whakatata mai ki a ia: ko tana i whiriwhiri ai ko ia tana e mea ai kia whakatata ki a ia.
6
Ko tenei ta koutou e mea ai, Tikina etahi tahu-kakara ma koutou, e Koraha ratou ko tana hui katoa.
7
Ka maka iho hoki he ahi ki roto, ka mea ai i te whakakakara ki runga, ki te aroaro o Ihowa apopo, a ko te tangata e whiriwhiri ai a Ihowa, ko ia te mea tapu: kati ta koutou, e nga tamariki a Riwai.
8
A i mea ano a Mohi ki a Koraha, Na, whakarongo e nga tama a Riwai.
9
He mea iti ianei ki ta koutou kia wehea koutou e te Atua o Iharaira i roto i te huihuinga o Iharaira, kia meinga kia whakatata ki a ia, kia mahi i te mahi o te tapenakara o Ihowa, kia tu hoki ki te aroaro o te hui, hei minita ma ratou?
10
Kua meinga ano hoki koe e ia kia tata ki a ia, koutou tahi ko ou teina katoa ko nga tama a Riwai: na, me whai ano hoki e koutou te tohungatanga?
11
Koia koutou ko tau hui katoa ka huihui nei ki a Ihowa: ko Arona hoki, he aha ia, i amuamu ai koutou ki a ia?
12
Na, ka tono tangata atu a Mohi hei karanga i a Ratana raua ko Apirama, i nga tama a Eriapa: a ka mea raua, E kore maua e tae atu:
13
He mea iti ianei to kawenga mai i a matou i te whenua e rerengia ana e te waiu e te honi, kia mate ai matou ki te koraha, i whakatangata nui ai ano hoki koe ki a matou?
14
Kahore ano hoki koe i kawe i a matou ki te whenua e rerengia ana e te waiu e te honi, i homai ranei i nga mara, i nga kari, hei kāinga: ka pokaia ranei e koe nga kanohi o nga tangata nei? e kore matou e tae atu.
15
Na, ka whakatakariri rawa a Mohi, a ka mea ki a Ihowa, Kaua e tahuri atu ki ta ratou whakahere: kahore ano kia kotahi te kaihe i tangohia e ahau i a ratou, kahore ahau i kino ki tetahi o ratou.
16
Na, ko te meatanga mai a Mohi ki a Koraha, Puta mai koutou ko tau hui katoa ki te aroaro o Ihowa, a koe, a ratou, me Arona, apopo.
17
Kia maua mai hoki tana tahu-kakara e tenei e tenei, meatia hoki he whakakakara ki runga, ka kawe mai ai i tana tahu-kakara i tana tahu kakara ki te aroaro o Ihowa, kia rua rau kia rima tekau nga tahu-kakara, a koe hoki, to tahu-kakara, a Arona hoki me tana.
18
Na, ka mau ratou ki tana tahu-kakara ki tana tahu-kakara, a hoatu ana he ahi ki roto, meatia ana hoki he whakakakara ki runga, a ka tu tahi me Mohi raua ko Arona ki te whatitoka o te tapenakara o te whakaminenga.
19
Na, ka tawhiua mai e Koraha te whakaminenga katoa ki te whatitoka o te tapenakara o te whakaminenga: a ka puta mai te kororia o Ihowa ki te whakaminenga katoa.
20
Na, ka korero mai a Ihowa ki a Mohi raua ko Arona, ka mea,
21
Wehea atu korua i roto i tenei whakaminenga, a e kore e aha ka pau ratou i a au.
22
Na, ka hinga tapapa iho raua, a ka mea, E te Atua, e te Atua o nga wairua o nga kikokiko katoa, ki te hara te tangata kotahi, e riri ranei koe ki te whakaminenga katoa?
23
Na, ka korero mai a Ihowa ki a Mohi, ka mea,
24
Korero atu ki te whakaminenga, mea atu, Whakatika atu koutou i te tapenakara o Koraha, o Ratana, ratou ko Apirama.
25
Na, ka whakatika atu a Mohi, a ka haere ki a Ratana raua ko Apirama: me te whai tahi ano nga kaumatua o Iharaira i a ia.
26
Na, ka korero atu ia ki te whakaminenga, ka mea, Tena, haere atu koutou i nga teneti o enei tangata kino, kaua hoki e pa ki tetahi mea a ratou, kei whakangaromia koutou i roto i o ratou hara katoa.
27
Na, ka whakatika atu ratou i nga taha katoa o te tapenakara o Koraha, o Ratana, ratou ko Apirama: a ka puta mai a Ratana raua ko Apirama, a ka tu ki nga whatitoka o o raua teneti, ratou ko a ratou wahine, ko a ratou tama, ko a ratou kohungahunga.
28
Na, ko te meatanga atu a Mohi, Ma tenei e mohio ai koutou na Ihowa ahau i unga mai ki te mahi i enei mahi katoa; a ehara i te mea whakaaro noa ake naku.
29
Ki te mea ko te mate o nga tangata katoa te mate mo enei, ko te whiu ranei o nga tangata katoa te whiu mo ratou, kahore ahau i ungā mai e Ihowa.
30
Tena ko tenei ka pokaia houtia e Ihowa he mahi hou, a ka hamama te waha o te oneone, a ka horomia ake ratou, me a ratou mea katoa, a ka heke ora atu ratou ki te rua, katahi koutou ka mohio i whakapataritari enei tangata ki a Ihowa.
31
A mutu kau tana korero i enei korero katoa, te tino koheratanga o te oneone i raro i a ratou:
32
Na, hamama ana te waha o te whenua, horomia ake hoki ratou, me o ratou whare, me nga tangata katoa o Koraha, me o ratou rawa katoa.
33
A heke ora ana ratou, me a ratou mea katoa, ki te rua, na, ka taupokina iho ratou e te whenua: a ngaro iho ratou i roto i te whakaminenga.
34
Na, rere ana a Iharaira katoa i nga taha katoa o ratou i to ratou aue; i mea hoki ratou, Kei horomia hoki tatou e te whenua.
35
Na, ka puta mai he ahi i a Ihowa, a pau ake nga tangata e rua rau e rima tekau i whakaherea ai te whakakakara.
36
Na, ka korero mai a Ihowa ki a Mohi, ka mea,
37
Mea atu ki a Ereatara tama a te tohunga a Arona, kia tangohia ake e ia nga tahu-kakara i roto i te tahunga, rukerukea atu hoki te ahi ki ko; e tapu ana hoki ena mea.
38
Ko nga tahu-kakara o taua hunga i hara ra ki o ratou wairua, me hanga e ratou hei papa paraharaha, hei kopaki mo te aata: no te mea i whakaherea mai aua mea ki te aroaro o Ihowa, koia i tapu ai: a ka waiho hei tohu ki nga tamariki a Iharaira.
39
Na, tikina atu ana e te tohunga e Ereatara nga tahu-kakara parahi i mea whakahere ai te hunga i tahuna, a ka hangā hei papa paraharaha, hei kopaki mo te aata.
40
Hei whakamaharatanga mo nga tamariki a Iharaira, kei whakatata tetahi tangata ke, ehara nei i te uri no Arona, ki te whakahere whakakakara ki te aroaro o Ihowa: kei rite ia ki a Koraha, ratou ko tana hui: ko ta Ihowa tenei i korero ai ki a ia, na Mohi hoki i whakapuaki.
41
A i te aonga ake ka amuamu mai te whakaminenga katoa o nga tamariki a Iharaira ki a Mohi raua ko Arona, ka mea, Na korua i mate ai te iwi a Ihowa.
42
A, i te huihuinga o te whakaminenga katoa ki a Mohi raua ko Arona, na, to ratou tahuritanga ake ki te tapenakara o te whakaminenga, e! kua taupokina e te kapua, a ka kitea te kororia o Ihowa.
43
Na, ka haere a Mohi raua ko Arona ki mua mai i te tapenakara o te whakaminenga.
44
A ka korero mai a Ihowa ki a Mohi, ka mea,
45
Whakatika atu korua i roto i tenei whakaminenga, a e kore e aha ka pau ratou i a au. Na, ka hinga tapapa iho raua.
46
Na, ko te meatanga a Mohi ki a Arona, Tikina he tahu-kakara, meatia iho hoki he ahi ki roto, he mea no runga i te aata, ka hoatu ai i te whakakakara ki runga, a kia hohoro te haere ki te whakaminenga, te mea whakamarietanga hoki mo ratou: kua puta atu hoki he riri i te aroaro o Ihowa, kua timata te whiu.
47
Na, tikina ana e Arona, peratia ana me ta Mohi i korero ai, a rere ana ki waenganui o te whakaminenga, na, kua timata tena te whiu i roto i te iwi, na, ka makā iho e ia he whakakakara, a ka meinga he whakamarietanga mo te iwi.
48
A tu ana ia i te takiwa o te hunga mate, o te hunga ora, a ka mutu te whiu.
49
Na, nga tangata i mate i te whiu, kotahi tekau ma wha mano me nga rau e whitu, hāunga nga mea i mate i te meatanga i a Koraha.
50
Na, hoki ana a Arona ki a Mohi ki te whatitoka o te tapenakara o te whakaminenga, a mutu iho te whiu.