- 1
- Katahi ka mea a Paraama ki a Paraka, Hangā etahi aata maku, kia whitu, kia rite mai hoki maku nga puru e whitu, me nga hipi toa e whitu.
- 2
- Na, rite tonu ta Paraka i mea ai ki nga mea i korerotia e Paraama: a whakaekea atu ana e Paraka raua ko Paraama he puru he hipi ki runga ki tetahi aata ki tetahi aata.
- 3
- Na, ko te meatanga mai a Paraama ki a Paraka, E tu ki te taha o te tahunga tinana, a ka haere ahau: tera pea a Ihowa e tupono mai ki a au: a me korero atu e ahau ki a koe te kupu e whakakitea mai e ia ki a au. Na, ka haere ia ki te wahi tiketike.
- 4
- Na, ka tupono mai a Ihowa ki a Paraama, a ka mea atu ia ki a ia, Kua oti i a au nga aata e whitu, kua whakaekea ano hoki he puru he hipi ki runga ki tenei aata ki tenei aata.
- 5
- Na, ka homai e Ihowa he kupu ki roto ki te waha o Paraama a ka mea, Hoki atu ki a Paraka, a kia penei to ki atu.
- 6
- Na, ka hoki atu ia ki a ia, a i te tu ano ia i te taha o tana tahunga tinana, a ia, me nga rangatira katoa o Moapa.
- 7
- Na, ka tikina e ia tana ki whakapepeha, a ka mea, Na Paraka na te kingi o Moapa ahau i arahi mai i Arame, i nga maunga o te rawhiti, e mea ana, Haere mai hei kai kanga maku mo Hakopa, haere mai hoki hei whakatara ki a Iharaira.
- 8
- Me aha e kanga ai ahau i ta te Atua i kore ai e kanga? me aha hoki e whakatara ai ahau ki ta Ihowa kihai i whakatara?
- 9
- Tenei hoki ahau i te tihi o nga kamaka te titiro atu nei ki a ia, te kite atu nei i a ia i runga i nga pukepuke: nana! ka noho te iwi ko ia anake, e kore ano hoki e taua i roto i nga tauiwi.
- 10
- Ma wai e tatau te puehu o Hakopa, e titiro ranei te maha o te wahi whakawha o Iharaira? Hei te mate o te hunga tika he matenga moku, kia rite hoki toku whakamutunga ki tona!
- 11
- Na, ko te meatanga mai a Paraka, ki a Paraama, He aha tau e mea nei ki a au? hei kanga i oku hoa riri i tikina ai koe e ahau, na, kua manaakitia rawatia nei ratou e koe.
- 12
- Na, ko tana whakahokinga atu, ka mea atu, Ka homai nei e Ihowa he kupu ki toku waha, kaua ranei ahau e mahara ki tena kia whakapuakina atu?
- 13
- Na, ka mea a Paraka ki a ia, Tena, haere mai taua ki tetahi wahi ke atu, e kite ai koe i a ratou: ko to ratou pito tau e kite ai; e kore hoki koe e kite i a ratou katoa: a hei reira puaki ai i a koe taku kanga mo ratou.
- 14
- Na, ka kawea ia e ia ki te mara o Topimi, ki te tihi o Pihika, a hangā ana e ia nga aata e whitu, whakaekea atu ana hoki e ia he puru he hipi ki tenei aata ki tenei aata.
- 15
- Na, ka mea mai ia ki a Paraka, E tu ki konei ki te taha o to tahunga tinana, a ka whakatau ahau ki ko ki a Ihowa.
- 16
- Na, ka tupono mai a Ihowa ki Paraama, a ka homai e ia he kupu ki tona waha, ka mea, Hoki atu ki a Paraka kia penei hoki to ki atu.
- 17
- A, tona haerenga mai ki a ia, na, e tu ana ano ia i te taha o tana tahunga tinana, ratou tahi ko nga rangatira o Moapa. A ka mea a Paraka ki a ia, I pehea mai te kupu a Ihowa?
- 18
- Na, ka tikina e ia tana ki pepeha, a ka mea, Whakatika, e Paraka, whakarongo ai; kia whai taringa mai ki a au, e te tama a Tiporo:
- 19
- Ehara te Atua i te tangata e teka ai; i te tama ranei a te tangata e puta ke ai ana whakaaro: tera ranei ia e korero, a kore ake e mahi; e puaki ranei tana kupu, a, kahore e mana?
- 20
- Nana, kua riro mai i a au te kupu manaaki; kua oti hoki i a ia te manaaki; a e kore e taea e ahau te whakaputa ke.
- 21
- Kahore i tirohia e ia he kino i a Hakopa, kahore ano hoki i kitea he tutu i a Iharaira: kei a ia a Ihowa tona Atua, kei roto hoki i a ia te hamamatanga a te kingi.
- 22
- Na Ihowa ratou i whakaputa mai i Ihipa; rite tonu tona kaha ki to te unikanga.
- 23
- He pono kahore he makutu mo Hakopa, kahore ano hoki he whaiwhaia mo Iharaira: kei tona wa ano ka korerotia a Hakopa, ae ra, a Iharaira, Ano te mahi a te Atua!
- 24
- Nana, ka whakatika ake te iwi ano he raiona katua, ka ara ake ano hoki he raiona: e kore e takoto iho, kia kainga ra ano te tupapaku, kia inumia hoki nga toto o nga mea i whakamatea.
- 25
- Na, ko te meatanga mai a Paraka ki a Paraama, Kati rawa te kanga i a ratou, kati rawa ano hoki te manaaki i a ratou.
- 26
- Na, ko te whakahokinga atu a Paraama, ka mea atu ki a Paraka, Kahore ianei ahau i korero atu ki a koe, i mea atu, Ko nga mea katoa e korero mai ai a Ihowa, ko tena taku e mea ai?
- 27
- Na, ka mea a Paraka ki a Paraama, Tena, me kawe atu koe e ahau ki tetahi atu wahi; tera pea e pai te Atua kia whakapuakina e koe i reira taku kanga mo ratou.
- 28
- Katahi ka kawea a Paraama e Paraka ki te tihi o Peoro, e titiro atu ana ki Iehimono.
- 29
- A ka mea a Paraama ki a Paraka, Hangā etahi aata maku ki konei kia whitu, kia rite mai hoki maku ki konei nga puru e whitu me nga hipi toa e whitu.
- 30
- A rite tonu ta Paraka i mea ai ki nga mea i korerotia e Paraama, a whakaekea ana e ia he puru he hipi ki runga ki tenei aata ki tenei aata.
Address: 
Phone: 
Email: