- 1
- A i korero a Ihowa ki a Mohi, i mea,
- 2
- Korero atu ki a Arona, mea atu ki a ia, Ka tahuna e koe nga rama, kia mārama i nga rama e whitu te wahi e rite mai ana ki taua turanga rama.
- 3
- A i pera ano a Arona; i meinga e ia kia ka atu nga rama ki te wahi e rite mai ana ki te turanga rama; i pera ano ia me ta Ihowa i whakahau ai ki a Mohi.
- 4
- A ko te mahinga tenei o te turanga rama, kotahi tonu te koura, puta noa i tona take i ona puawai, he kotahi tonu, a puta noa; rite tonu ki te tauira i whakakitea mai e Ihowa ki a Mohi, i pera tana hanganga i te turanga rama.
- 5
- A i korero ano a Ihowa ki a Mohi, i mea,
- 6
- Tangohia mai nga Riwaiti i roto i nga tamariki a Iharaira, ka pure i a ratou.
- 7
- Kia penei hoki to meatanga ki a ratou, kia poke-kore ai ratou: Tauhiuhia atu ki a ratou he wai hei pure, kia heua hoki e ratou o ratou tinana katoa, me horoi hoki o ratou kakahu, kia ma ai ratou.
- 8
- Katahi ratou ka mau ki tetahi puru kuao, me tona whakahere toto-kore, ara, te paraoa i konatunatua ki te hinu; me tango ano hoki e koe tetahi atu puru kuao hei whakahere hara.
- 9
- Na, ka kawea mai e koe nga Riwaiti ki mua i te tapenakara o te whakaminenga, ka tawhiu mai ai i te huihui katoa o nga tamariki a Iharaira:
- 10
- Katahi ka kawea mai e koe nga Riwaiti ki te aroaro o Ihowa: a ka popoki iho nga ringa o nga tamariki a Iharaira, ki runga ki nga Riwaiti:
- 11
- A ka whakeherea atu nga Riwaiti e Arona, ki te aroaro o Ihowa, hei whakahere poipoi ma nga tamariki a Iharaira, a ka waiho ratou hei mahi i te mahi a Ihowa.
- 12
- Na, ka popoki iho nga ringa o nga Riwaiti ki runga ki nga mātenga o nga puru: a me tuku tetahi e koe hei whakahere hara, tetahi hoki hei tahunga tinana ki a Ihowa, hei mea whakamarietanga mo nga Riwaiti.
- 13
- Na, ka whakaturia e koe nga Riwaiti ki te aroaro o Arona, ki te aroaro ano hoki o ana tama, ka whakahere ai hei whakahere ki a Ihowa.
- 14
- Me wehe mai hoki e koe nga Riwaiti i roto i nga tamariki a Iharaira: maku nga Riwaiti.
- 15
- A, muri iho ka haere nga Riwaiti ki roto, ki te mahi i te mahi o te tapenakara o te whakaminenga: a me pure ratou e koe, me whakahere hoki hei whakahere.
- 16
- Ka tukua rawatia mai hoki ratou ki a au i roto i nga tamariki a Iharaira: hei utu mo nga mea katoa e oroko-puta mai ana i te kopu, mo nga matamua a nga tamariki katoa a Iharaira i tangohia ai ratou e ahau maku.
- 17
- Naku hoki nga matamua katoa a nga tamariki a Iharaira, nga tangata me nga kararehe: no te ra i patua ai e ahau nga matamua katoa o te whenua o Ihipa taku whakatapunga i a ratou maku.
- 18
- Na, ka tangohia nei e ahau nga Riwaiti hei utu mo nga matamua katoa o nga tamariki a Iharaira.
- 19
- Ka hoatu ano hoki e ahau nga Riwaiti i roto i nga tamariki a Iharaira he ohaohatanga ki a Arona ratou ko ana tama, hei mahi i nga mahi a nga tamariki a Iharaira, i roto i te tapenakara o te whakaminenga, hei mea whakamarietanga hoki mo nga tamariki a Iharaira: kei pa te whiu ki nga tamariki a Iharaira, ina whakatata nga tamariki a Iharaira ki te wahi tapu.
- 20
- Na, pera tonu ta Mohi ratou ko Arona ko te whakaminenga katoa o nga tamariki a Iharaira i mea ai ki nga Riwaiti me nga mea katoa i whakahau ai a Ihowa ki a Mohi mo nga Riwaiti; i pera tonu nga tamariki a Iharaira ki a ratou.
- 21
- Na, ka horohoroa nga Riwaiti, a ka horoia e ratou o ratou kakahu, a whakaherea atu ana ratou e Arona hei whakahere poipoi ki te aroaro o Ihowa; a na Arona i mea whakamarietanga mo ratou hei pure mo ratou.
- 22
- A ka mutu tera, na, ka haere nga Riwaiti ki roto, ki te mahi i a ratou mahi i te tapenakara o te whakaminenga, i te aroaro o Arona, i te aroaro ano hoki o ana tama: i pera tonu me ta Ihowa i whakahau ai ki a Mohi mo nga Riwaiti ta ratou i mea ai ki a ratou.
- 23
- A i korero ano a Ihowa ki a Mohi, i mea,
- 24
- Ko te mea tenei ma nga Riwaiti; ka rua tekau ma rima o ratou tau, ka maha ake ranei, me haere ratou ki roto, ki te mahi i nga mahi o te tapenakara o te whakaminenga:
- 25
- Ka maha ake o ratou tau i te rima tekau, me whakamutu ta ratou mahinga i nga mahi o reira, kaua ano hoki he mahi ma ratou i muri iho:
- 26
- Engari me minita tahi ratou me o ratou tuakana i roto i te tapenakara o te whakaminenga, me tiaki nga mea e tiakina ana, kaua hoki ratou e mahi i tetahi mahi. Ko tenei tau e mea ai ki nga Riwaiti, ina tiaki ratou.
Address: 
Phone: 
Email: