Proverbs Chapter 13 - Paipera Tapu 1868 | Te Paipera Tapu 1868

Proverbs Chapter 13 - Paipera Tapu 1868

1
Ka whakarongo te tamaiti whakaaro nui ki te ako a tona pāpā: na, te tangata whakahi e kore ia e whakarongo ki te kupu riri.
2
He pai kei nga hua o te mangai hei kai ma te tangata; ma te wairua ia o te hunga poke ke, ko te tutu.
3
Te tangata e tiaki ana i tona mangai e tiaki ana i tona wairua: te tangata e hamama nui ana ona ngutu, ko te whakangaromanga mona.
4
E hiahia ana te wairua o te tangata mangere, a kahore he mea mana; engari te wairua o nga uaua ka momona.
5
E kino ana te tangata tika ki te korero teka; na, te tangata kino he mea whakarihariha, a whakama noa iho.
6
Ko te tika hei kai tiaki mo te tangata e tapatahi ana te ara; ka whakatakā ano te tangata kino e te hara.
7
Tetahi tangata kei te amene taonga mona, heoi kahore rawa he mea i a ia: tetahi tangata kei te whakarawa-kore i a ia, heoi nui atu ona rawa.
8
Nga utu mo te tangata kia ora, ko ona rawa; tena ko te rawa-kore, ekore ia e rongo i te riri.
9
He koa to te māramatanga o te hunga tika, ka keto ia te rama o te hunga kino.
10
Heoi ano ta te whakapehapeha he totohe; he whakaaro nui ia to te hunga nga kupu tika.
11
Nga taonga o te tekateka noa ka iti haere: te tangata e kohikohi ana, he mea na te ringa, ka maha ana.
12
Ki te roa te mea e tumanakohia atu ana, ka mate te ngakau; te taenga mai o te mea i hiahiatia, ko te rakau tena o te ora.
13
Te tangata e whakahawea ana ki te kupu, ka ngaro ia; te tangata e wehi ana i te whakahau, engari tera ka whiwhi ki te utu.
14
Te ture o te whakaaro nui, ko te puna tera o te ora e neke atu ai te tangata i nga reti o te mate.
15
To te ngarahu pai he homai atawhai; he taikaha ia te ara o te hunga poka ke.
16
He mahi mohio ta nga tangata tupato katoa; ta te wairangi ia he hora nui atu i te kuaretanga.
17
Ka hinga te karere kino i te kino; te karere pono ia, ano he rongoa.
18
He rawa-kore, he whakama mo te tangata kahore e pai ki te ako; tena ko te tangata e whai mahara mai ana ina riria tona he, ka whakahonoretia tera.
19
Te hiahia kua rite ka reka ki te wairua; ta nga kuare ia e whakarihariha ai he whakarere i te kino.
20
Te hoa haere o te hunga whakaaro nui ka whai whakaaro: te hoa o nga kuare ka mamae.
21
Ka whai te kino i te hunga hara; te utu ia ki te hunga tika he pai.
22
He whakarerenga iho ta te tangata pai mo nga tamariki a nga tamariki; kei te rongoa ano mo te tangata tika nga taonga o te tangata hara.
23
He nui te kai i te ngakinga a te hunga rawa-kore; ko etahi ia e ngaro ana i te kore o te tikanga pai.
24
Te tangata e kaiponu ana i tana whiu, e kino ana ia ki tana tamaiti; te tangata e aroha ana ki a ia, ka papaki wawe i a ia.
25
Kai ana te tangata tika, makona ana tona wairua; ka hapa ia te kopu o te hunga kino.