Proverbs Chapter 2 - Paipera Tapu 1868 | Te Paipera Tapu 1868

Proverbs Chapter 2 - Paipera Tapu 1868

1
E taku tamaiti, ki te tango koe i aku kupu, ki te hunā aku whakahaunga ki roto ki a koe;
2
A ka tahuri tou taringa ki te whakaaro nui, ka anga ano tou ngakau ki te matauranga;
3
Ki te mea ka karangarangatia e koe te matauranga, a ka puaki tou reo ki te ngakau mohio;
4
Ki te rapua ia e koe ano he hiriwa, ka kimihia, ano he taonga huna;
5
Ko reira koe matau ai ki te wehi o Ihowa, kite ai i te mohiotanga ki te Atua.
6
Ma Ihowa hoki e homai te whakaaro nui; no tona mangai te matauranga me te ngakau mohio.
7
E rongoatia ana e ia te whakaaro nui ma te hunga tika; he whakangungu rakau ia mo te hunga e tapatahi ana te whakahaere.
8
E tiakina ana e ia nga huarahi o te whakarite whakawa; e whai whakaaro ana ki te huarahi o tona hunga tapu.
9
Ko reira koe mohio ai ki te tika, ki te whakarite whakawa, ki te mea ano e rite ana, ki nga huarahi pai katoa.
10
Ki te tae atu te whakaaro nui ki roto ki tou ngakau, a ka reka te matauranga ki tou wairua,
11
Ka ai te ngarahu pai hei pupuri i a koe, te ngakau mohio hei tiaki i a koe;
12
Hei kukume mai i a koe kei tata ki te ara o te tangata kino, ki te tangata e puta ke ana āna korero;
13
Ki te hunga e whakarere nei i nga ara o te tika, e haere ana i nga ara o te pouri.
14
Koa tonu ratou, i a ratou e mahi ana i te kino, he oranga ngakau ki a ratou nga tikanga parori ke a te kino;
15
He ara kopikopiko o ratou, he whanoke ratou i o ratou huarahi:
16
Ka ora ano koe i te wahine ke, I te wahine ke, he kupu whakapati nei āna;
17
Kua whakarerea nei e ia te kai arahi o tona tamahinetanga, kua wareware ki te kawenata o tona Atua.
18
E heke atu ana hoki tona whare ki te mate, ona huarahi ki nga tupapaku.
19
Te hunga katoa e haere atu ana ki a ia e kore e hoki mai; e kore ano e mau i a ratou nga ara o te ora.
20
A ka haere ano koe i nga ara o nga tangata pai, ka mau ano koe ki nga ara o te hunga tika.
21
Ka noho hoki te hunga tika ki te whenua, ko te hunga ngakau tapatahi ano hoki e mahue ki reira.
22
Ka hatepea atu ia te hunga kino i runga i te whenua; ka hutia atu ano hoki te hunga poka ke i reira.