- 1
- He aha koe ka tu mai ai i tawhiti, e Ihowa? ka whakangarongaro ai i nga wa o te he?
- 2
- E whakakake ana te tangata kino, e tukino ana i te tangata iti: kia hopukina ratou ki roto i nga whakaaro i whakaaro ai ratou.
- 3
- E whakapehapeha ana hoki te tangata kino ki te hiahia o tona ngakau, e whakapai ana hoki ki te apo taonga, e whakahawea ana ki a Ihowa.
- 4
- E kore te tangata kino e rapu i te Atua, he whakapehapeha hoki no tona mata: kahore te Atua i roto i tetahi o ona whakaaro.
- 5
- Whanoke tonu āna ara i nga wa katoa; kei runga noa ake au whakariteritenga tē kitea e ia, he mea whakatupereru e ia ona hoa riri katoa.
- 6
- E mea ana i roto i tona ngakau, E kore ahau e whakakorikoria. Kahore hoki he hē moku ake ake.
- 7
- Ki tonu tona mangai i te kanga, i te hianga, i te patipati: kei raro iho i tona arero te nanakia me te teka.
- 8
- E noho ana ia, e whanga ana i nga pa koraha: e kohurutia ana e ia te hunga hara-kore i nga wahi ngaro; e matatau ana ona kanohi ki te hunga rawa-kore.
- 9
- E whanga puku ana ia me he raiona i tona kuhunga: e whanga ana kia hopukia te tangata iti: e hopukia ana e ia te tangata iti, ua kumea ki roto ki tana kupenga.
- 10
- Kupapa ana ia, piko iho ana, kia hinga ai te hunga rawa-kore i ana mea kaha.
- 11
- E mea ana i roto i tona ngakau, Ka wareware te Atua: e huna ana ia i tona mata, e kore ia e kite ake tonu atu.
- 12
- Whakatika, e Ihowa, e te Atua, takiritia to ringa: kaua e wareware ki te hunga iti.
- 13
- He aha te tangata kino ka whakahawea ai ki te Atua? kua mea ia i roto i tona ngakau, E kore tenei e whakatakina e koe.
- 14
- Kua kite koe; e tirohia iho nei hoki e koe te mahi nanakia me te whakatoi, a ka utua e to ringaringa: e tuku atu ana te rawa-kore i a ia ano ki a koe; ko koe hei tuara mo te pani.
- 15
- Whatiia te ringaringa o te tangata kino, o te tangata nanakia: whakatakina tona kino, kia kahore ra ano e kitea e koe.
- 16
- Ko Ihowa te Kingi ake ake: kua kahore ke nga tauiwi i tona whenua.
- 17
- E Ihowa, kua whakarongo koe ki te hiahia o te hunga whakaiti: mau ano o ratou ngakau e whakapai, ka tahuri mai ano to taringa ki te whakarongo:
- 18
- Ki te whakarite whakawa mo to pani mo te tangata e tukinotia ana, kei anga ano te tangata o te whenua, kei tukino.
Address: 
Phone: 
Email: