- 1
- (Na Rawiri.) Whakapaingia a Ihowa, e toku wairua, me tona ingoa tapu hoki, e nga mea katoa i roto i a au.
- 2
- Whakapaingia a Ihowa e toku wairua, kei wareware hoki ki ana ohaohatanga katoa.
- 3
- Ko ia te muru nei i o kino katoa, te rongoa nei i o mate katoa,
- 4
- Ko ia te hoko nei i to ora kei whakangaromia, te karauna nei i a koe ki te atawhai, ki te aroha.
- 5
- Nana nei i makona ai tou mangai i nga mea papai; i hou ai to taitamarikitanga, i rite ai ki to te ekara.
- 6
- E whakaputaina ana e Ihowa he tika, he whakarite whakawa mo te hunga katoa e tukinotia ana.
- 7
- I whakaakona e ia ana ara ki a Mohi, ana mahi ki nga tamariki a Iharaira.
- 8
- He aroha, he atawhai a Ihowa, e puhoi ana ki te riri, e rahi ana tana mahi tohu.
- 9
- E kore ia e whakatupehupehu tonu, e kore ano hoki e mauahara ake ake.
- 10
- Kihai i rite ki o tatou hara ana meatanga mai ki a tatou: kihai ano hoki i rite ki ā tatou kino āna utu mai ki a tatou.
- 11
- E rite ana hoki ki te rangi e tiketike ake ana i te whenua, pera tonu te nui o tana mahi tohu ki te hunga e wehi ana i a ia.
- 12
- E matara ana te ita i te weta, pera tonu tana whakamataratanga atu i ā tatou kino i a tatou.
- 13
- E aroha ana te matua ki ana tamariki, pera tonu to Ihowa aroha ki te hunga e wehi ana i a ia.
- 14
- E matau ana hoki ia ki to tatou ahua, e mahara ana he puehu tatou.
- 15
- Te tangata, rite tonu ona ra ki tarutaru: me te puawai o te mara tona ngawhatanga.
- 16
- E ra rungatia ana hoki e te hau, a kua kahore; kahore hoki e mohiotia e tona wahi i muri iho.
- 17
- Tena ko te mahi tohu a Ihowa ki te hunga e wehi ana i a ia, no tua whakarere, amua tonu atu: me tona tika hoki ki nga uri o nga tamariki;
- 18
- Ki te hunga e pupuri ana i tana kawenata, ki te hunga ano hoki e mahara ana ki ana akoranga kia mahia.
- 19
- Kua oti i a Ihowa tona torona te whakatu ki nga rangi; a e kawanatia ana nga mea katoa e tona kingitanga.
- 20
- Whakapaingia a Ihowa e ana anahera, e hira nei te kaha, e whakarite nei i tana kupu, e whakarongo nei ki tona reo ina korero.
- 21
- Whakapaingia a Ihowa, e ona mano katoa, e ana minita e mahi nei i tana e pai ai.
- 22
- Whakapaingia a Ihowa, e ana mahi katoa i nga wahi katoa o tana kingitanga: whakapaingia a Ihowa, e toku wairua.
Address: 
Phone: 
Email: