- 1
- Whakawhetai atu ki a Ihowa, e pai ana hoki ia: e pumau tonu ana hoki tana mahi tohu.
- 2
- Kia pena ano te korero a te hunga i hokoa e Ihowa, i hokoa nei e ia i roto i te ringa o te hoa riri.
- 3
- I kohikohia mai hoki i nga whenua, i te ita, i te hauauru; i te nota, i te tonga.
- 4
- I haereere ratou i te koraha i te wahi mokemoke, tē kitea he huarahi ki tetahi pa hei nohoanga.
- 5
- I mate-kai ratou, i mate-wai: hemo noa to ratou wairua i roto i a ratou.
- 6
- Na, ka tangi atu ratou ki a Ihowa i to ratou pouritanga: a ka whakaorangia ratou e ia i o ratou mate.
- 7
- A arahina ana ratou e ia ra te ara tika; kia haere atu ki te pa hei nohoanga.
- 8
- Kia whakapaingia a Ihowa mo tona atawhai me ana mahi whakamiharo ki nga tamariki a te tangata.
- 9
- E whakamakonatia ana hoki e ia te wairua hiahia: te wairua hiakai, whakakiia ana e ia ki te mea pai.
- 10
- Te hunga i noho i te pouri, i te atarangi o te mate: he mea here ki te mamae, ki te rino;
- 11
- Mo ratou i tutu ki nga kupu a te Atua, i whakahawea hoki ki te whakaaro a te Runga-rawa;
- 12
- Koia i pehia iho ai e ia o ratou ngakau ki te mamahi: hinga iho ratou, kahore hoki he kai awhina.
- 13
- Na, ka tangi atu ratou ki a Ihowa i to ratou pouritanga; a whakaorangia ake ratou e ia i o ratou mate.
- 14
- Whakaputaina mai ana ratou e ia i roto i te pouri, i te atarangi o te mate; motumotuhia ana o ratou here.
- 15
- Kia whakapaingia a Ihowa mo tona atawhai, me ana mahi whakamiharo ki nga tamariki a te tangata.
- 16
- Kua pakarukarua hoki e ia nga tatau parahi: kua tapahia e ia nga tutaki rino.
- 17
- Te hunga kuare, na a ratou mahi tutu, na a ratou kino, i pakia ai ratou.
- 18
- Whakarihariha ana o ratou wairua ki nga kai katoa; a ka whakatata ratou ki nga kuwaha o te mate.
- 19
- Na, ka tangi atu ratou ki a Ihowa i to ratou pouritanga, a whakaorangia ake e ia i o ratou mate.
- 20
- Tonoa mai ana e ia tana kupu, a rongoatia ana ratou: whakaorangia ake ratou i roto i o ratou whakangaromanga.
- 21
- Kia whakapaingia a Ihowa mo tana atawhai, me ana mahi whakamiharo ki nga tamariki a te tangata.
- 22
- Kia tukua ano hoki e ratou te whakahere, ara, te whakamoemiti; kia whakapuaki hoki i ana mahi me te hari ano.
- 23
- Te hunga e haere ana ki raro ki te moana, ki runga ki nga kaipuke, e whai mahi ana i runga i nga wai nunui;
- 24
- Ko ratou e kite i nga mahi a Ihowa, me ana mahi whakamiharo i te rire.
- 25
- Kiia iho hoki e ia, kua oho te hau awha, hei whakahuamo i ona ngaru.
- 26
- Ka kake ratou ki runga ki te rangi, ka heke ki raro ki te rire: ngohe noa o ratou wairua i te pawera.
- 27
- Anininini ana ratou, hurorirori noa, ano he tangata e haurangi ana; a pau katoa a ratou whakaaro.
- 28
- Na, ka tangi atu ratou ki a Ihowa i to ratou pouritanga: a ka whakaorangia e ia i o ratou mate.
- 29
- Mariri noa iho te awha i a ia: a marino kau ona ngaru.
- 30
- Na, ka koa ratou, no te mea ka marie: a ka kawea mai ratou e ia ki te turanga i hiahia ai ratou.
- 31
- Kia whakapaingia a Ihowa mo tana atawhai: me ana mahi whakamiharo ki nga tamariki a te tangata.
- 32
- Kia whakanui hoki ratou i a ia i roto i te whakaminenga o te iwi; kia whakamoemiti hoki ki a ia i roto i te nohoanga kaumatua.
- 33
- Ko ia hei mea i nga awa hei koraha, nga puputanga wai hei oneone maroke.
- 34
- Me te whenua whai hua, kia titohea, mo te hara o te hunga e noho ana i reira.
- 35
- Ko ia hei mea i te koraha hei harotoroto wai, i te whenua maroke hoki hei puputanga wai.
- 36
- A whakanohoia iho e ia te hunga mate-kai ki reira: hanga ai i tetahi pa hei nohoanga;
- 37
- Hei rui i nga mara, hei whakato i nga mara waina, e tupu mai ai, e maha ai nga hua.
- 38
- Ko ia ano hoki hei manaaki i a ratou, no ka nui rawa; kahore hoki e tukua kia torutoru haere a ratou kararehe.
- 39
- Na kua iti haere ratou, kua piko iho i te tukino, i te he, i te pouri;
- 40
- E ringitia ana e ia te whakahawea ki runga ki nga rangatira: e meinga ana kia hehe i roto i te ururua, i te wahi kahore nei he ara;
- 41
- E whakateitei ake ana ano ia i te rawa-kore ki runga ake i te tangihanga, e mea ana i ona hapu kia rite kite kahui hipi.
- 42
- Ka kite nga tangata tika, a ka hari, nga he katoa ano hoki kopia ake te mangai.
- 43
- Ko wai te tangata whakaaro nui, e mahara ana hoki ki enei mea? ka mohio ano ratou ki te aroha o Ihowa.
Address: 
Phone: 
Email: