- 1
- Aua ki a matou, e Ihowa, aua ki a matou, engari hoatu te kororia ki tou ingoa: whakaaroa tou aroha, tou pono.
- 2
- Mo te aha nga tauiwi kia mea: Kei hea ianei to ratou Atua?
- 3
- Kei te rangi ra to matou Atua: kua meatia e ia nga mea katoa i pai ai ia.
- 4
- He hiriwa a ratou whakapakoko, he koura, he mahi na nga ringaringa o te tangata.
- 5
- He mangai o ratou, a kahore e korero: he kanohi o ratou, a kahore e kite.
- 6
- He taringa o ratou, a kahore e rongo: he ihu o ratou, a kahore e hongi.
- 7
- He ringaringa o ratou, a kahore e whawha; he waewae o ratou, a kahore ratou e haere: kahore hoki o ratou korokoro e korero.
- 8
- Rite tonu ki a ratou o ratou kai hanga, me te hunga katoa e whakawhirinaki ana ki a ratou.
- 9
- E Iharaira, whakawhirinaki atu ki a Ihowa: ko ia to ratou kai awhina, me to ratou whakangungu rakau.
- 10
- E te whare o Arona, whakawhirinaki atu ki a Ihowa: ko ia to ratou kai awhina, me to ratou whakangungu rakau.
- 11
- E te hunga e wehi ana i a Ihowa, whakawhirinaki atu ki a Ihowa: ko ia to ratou kai awhina, me to ratou whakangungu rakau.
- 12
- E mahara ana a Ihowa ki a tatou, mana tatou e manaaki: mana e manaaki te whare o Iharaira, mana e manaaki te whare o Arona.
- 13
- Ka manaakitia e ia te hunga e wehi ana i a Ihowa, te iti me te rahi.
- 14
- Ka tapiritia mai ano e Ihowa ki a koutou, ki a koutou tahi ko a koutou tamariki.
- 15
- He manaakitanga koutou na Ihowa, na te kai hanga o te rangi, o te whenua.
- 16
- No Ihowa nga rangi, ae ra, nga rangi: na, te whenua he mea homai nana ki nga tamariki a te tangata.
- 17
- E kore nga tupapaku e whakamoemiti atu ki a Ihowa: me te hunga katoa ano e heke atu ana ki te wahangutanga.
- 18
- Ko matou ia ka whakapai atu ki a Ihowa: aianei, a, ake ake ake. Whakamoemititia a Ihowa.
Address: 
Phone: 
Email: