- 1
- Whakawhetai atu ki a Ihowa; e pai ana hoki ia, e pumau tonu ana hoki tona mahi tohu.
- 2
- Kia mea a Iharaira, e pumau tonu ana tana mahi tohu.
- 3
- Kia mea te whare o Arona, e pumau tonu ana tana mahi tohu.
- 4
- Kia mea te hunga e wehi ana i a Ihowa, e pumau tonu ana tana mahi tohu.
- 5
- I karanga atu ahau ki a Ihowa i roto i te pouri: i whakahoki kupu mai a Ihowa ki a au, i whakatu hoki i a au ki te whai whanui.
- 6
- Kei toku taha a Ihowa; e kore ahau e wehi: he aha ta te tangata e mea ai ki a au?
- 7
- Ko Ihowa kei roto i oku kai awhina: a ka titiro atu ahau ki te hunga e kino mai ana ki a au.
- 8
- Te whakawhirinaki ki a Ihowa pai atu i te whakaaro atu ki te tangata.
- 9
- Te whakawhirinaki ki a Ihowa pai atu i te okioki ki nga rangatira.
- 10
- I karapotia ahau e nga iwi katoa: heoi whakangaromia ana ratou e ahau i runga i te ingoa o Ihowa.
- 11
- I karapotia ahau e ratou: ae, i karapotia mai ahau e ratou: heoi whakangaromia ana ratou e ahau i runga i te ingoa o Ihowa.
- 12
- Me te mea he pi ratou e mui mai ana ki ahau; kua pirau ratou, ano he ahi tataramoa: i whakangaromia hoki ratou e ahau i runga i te ingoa o Ihowa.
- 13
- Kaha pu tau turaki i a au, kia hinga ai ahau: na Ihowa ia ahau i awhina mai.
- 14
- Ko Ihowa toku kaha, me toku himene, ko ia ano hoki toku whakaoranga.
- 15
- He reo hari, he reo whakaoranga, kei nga tapenakara o te hunga tika: e maia ana nga mahi a te ringaringa matau o Ihowa.
- 16
- Kua whakanuia te ringaringa matau o Ihowa: e maia ana nga mahi a te ringaringa matau o Ihowa.
- 17
- E kore ahau e mate, tera ahau e ora, hei whakapuaki i nga mahi a Ihowa.
- 18
- I pakia rawatia ahau e Ihowa: otiia kihai ahau i tukua e ia kia mate.
- 19
- Whakatuwheratia ki a au nga kuwaha o te tika: ka tomo atu ahau ki roto, ka whakamoemiti atu ki a Ihowa.
- 20
- Ko te kuwaha tena o Ihowa: ka tomo te hunga tika ra reira.
- 21
- Ka whakamoemiti atu ahau ki a koe: mou i whakahoki kupu mai ki a au, mou hoki i whakaora i a au.
- 22
- Te kohatu i kapea e nga kai hanga, kua meinga hei upoko mo te kokonga.
- 23
- Na Ihowa tenei: he mea miharo ki o tatou kanohi.
- 24
- Ko te ra tenei i hangā e Ihowa: kia whakamanamana, kia koa tatou i tenei.
- 25
- Whakaorangia ra e Ihowa: tena ra, e Ihowa, meinga kia kake matou.
- 26
- Kia whakapaingia te tangata e haere mai ana i runga i te ingoa o Ihowa: kua whakapaingia koutou e matou i roto i te whare o Ihowa.
- 27
- Ko te Atua a Ihowa i mārama ai tatou: herea te patunga tapu ki nga aho, ki nga haona o te aata.
- 28
- Ko koe toku Atua, maku koe e whakamoemiti: toku Atua, maku koe e whakanui.
- 29
- Whakawhetai atu ki a Ihowa; e pai ana hoki ia: a e pumau tonu ana tana mahi tohu.
Address: 
Phone: 
Email: