- 1
- (Ki te tino kai whakatangi. He himene na Rawiri.) E Ihowa, kua tirotirohia mai ahau, kua mohiotia ano hoki e koe:
- 2
- E matau ana koe ki aku nohoanga iho, ki aku whakatikanga ake; e mohio ana koe ki oku whakaaro i tawhiti.
- 3
- Toku ara, me taku takotoranga iho kitea putia iho e koe: oku huarahi katoa matau tonu i a koe.
- 4
- Kahore rawa hoki he kupu i toku arero, i toe i a koe te mohio, e Ihowa.
- 5
- Kua hangā a muri, a mua, oku e koe: kua pa mai ano tou ringa ki a au.
- 6
- He mea whakamiharo rawa, kei tawhiti atu hoki i a au, tenei matauranga: kei runga noa atu, e kore e taea atu e ahau.
- 7
- Me haere ahau ki hea i tou Wairua? me oma ranei ki hea i tou aroaro?
- 8
- Ki te kake atu ahau ki te rangi, kei reira koe: ki te wharikitia e ahau taku moenga i roto i te rua tupapaku, na, kei reira ano koe.
- 9
- Ki te tango ahau ki nga pakau o te ata: a noho ana i te whakamutunga mai o te moana;
- 10
- Kei reira ano hoki tou ringaringa hei arataki i a au, to ringaringa matau hei pupuru i a au.
- 11
- Ki te mea ahau, Tera ahau e ngaro i te pouri; na kua mārama te po i tetahi taha oku, i tetahi taha.
- 12
- Ae, e kore te pouri e pouri ki a koe, engari rite tahi te po me te ao te mārama: ki a koe rite tahi te pouritanga me te māramatanga.
- 13
- I a koe hoki oku whatumanawa: nau hoki ahau i hipoki i roto i te kopu o toku whaea.
- 14
- Ka whakawhetai atu ahau ki a koe; he mea whakawehi, he mea whakamiharo toku hanganga; he mahi whakamiharo au mahi, mohio rawa ano hoki toku wairua ki tena.
- 15
- Kihai i ngaro oku wahi i a koe, i a au e hangā ana i roto i te wahi ngaro, e ata whakairohia ana i raro rawa i te whenua.
- 16
- I kite ou kanohi i a au kahore ano kia ahua noa: i tuhituhia katoatia ano hoki oku wahi ki to pukapuka i nga rangi i whakaahua ai, i te mea kahore ano tetahi i oti noa.
- 17
- Ano te nui o au whakaaro ki a au, e te Atua; koia ano te ranea, ina huihuia!
- 18
- Ki te tāua e ahau, maha atu i nga onepu: ka oho ake ahau, kei a koe tonu ahau.
- 19
- He pono ka patua e koe, e te Atua, te tangata kino: mawehe atu i a au, e nga tangata toto.
- 20
- Mo te kino hoki o a ratou kupu mou: e whakahuatia noatia ana e ou hoa riri tou ingoa.
- 21
- E Ihowa, e kore ianei ahau e kino ki te hunga e kino ana ki a koe? e whakarihariha hoki ki te hunga e whakatika mai ana ki a koe?
- 22
- He tino kino taku kino ki a ratou: waiho iho ratou e ahau hei hoa riri moku.
- 23
- Tirohia iho ahau, e te Atua kia matau mai hoki koe ki toku ngakau: whakamatautauria ahau, kia matau mai hoki koe ki oku whakaaro.
- 24
- Kia kite me kahore aku ara kino: ka arahi ai i a au i te ara pumau.
Address: 
Phone: 
Email: