Psalms Chapter 142 - Paipera Tapu 1868

1: (He makiri na Rawiri; he inoi i a ia i roto i te ana.) I karanga atu toku reo ki a Ihowa; i inoi atu toku reo ki a Ihowa.
2: Maringi a wai ana taku tangi ki tona aroaro: a whakaaturia atu ana e ahau toku matenga ki tona aroaro.
3: I te ngaromanga o toku wairua i roto i a au i matau koe ki taku ara: whakatakotoria pukutia ana e ratou te mahanga moku i te ara i haere ai ahau.
4: I titiro ahau ki te taha ki matau, kia kite ai: heoi kahore tetahi i matau ki au; kahore he piringa moku; kahore tetahi e mahara ana ki toku wairua.
5: I karanga atu ahau ki a koe, e Ihowa: i mea, Ko koe toku piringa, toku wahi i te whenua o te ora.
6: Tahuri mai ki taku karanga: kua whakaititia rawatia hoki ahau: whakaorangia ahau i oku kai tukino: he kaha rawa hoki ratou i a au.
7: Whakaputaina atu toku wairua i te whare herehere, kia whakamoemiti ai ahau ki tou ingoa: ka karapotia mai ahau e te hunga tika; nou ka atawhai nei i a au.