Psalms Chapter 144 - Paipera Tapu 1868 | Te Paipera Tapu 1868

Psalms Chapter 144 - Paipera Tapu 1868

1
(Na Rawiri.) Kia whakapaingia a Ihowa toku kaha: e whakaako nei i aku ringaringa ki te whawhai, i oku maihao ki te tatau.
2
Te atawhai moku, toku pa, toku pourewa, me toku kai whakaora; toku whakangungu rakau, taku e whakawhirinaki ai; te kai pehi ano o taku iwi ki raro i a au.
3
E Ihowa, he aha te tangata i maharatia mai ai e koe? te tama ranei a te tangata, i whakaaroa ai e koe?
4
Te rite o te tangata kei te mea memeha noa: ona ra me te mea he atarangi e rere atu ana.
5
Whakapikoa iho ou rangi e Ihowa, a heke iho: pa atu ki nga maunga, a ka pongere.
6
Kokiritia mai he uira hei whakamarara i a ratou: koperea mai o pere, hei whakangaro i a ratou.
7
Torona iho tou ringaringa i runga: tangohia atu ahau, whakaorangia ahau i nga wai nunui, i te ringaringa o nga tamariki ke;
8
E korero teka nei o ratou mangai, a he ringaringa matau teka o ratou ringaringa matau.
9
Ka waiatatia atu e ahau he waiata hou ki a koe, e te Atua: ka himene atu ahau ki a koe i runga i te hatere, i te aho-tekau.
10
Ko ia te kai homai i te whakaoranga ki nga kingi, te kai whakaora i a Rawiri i tana pononga i te hoari whakamate.
11
Tangohia atu ahau, whakaorangia hoki i nga ringaringa o nga tamariki he, e korero teka nei o ratou mangai, a he ringaringa matau teka o ratou ringaringa matau.
12
Kia rite ai a matou tamariki i to ratou taitamarikitanga ki nga mahuri e tupu ake ana, a matou tamahine ki nga kohatu kokonga, whakapaipai rawa, me te mea he whare rangatira te tauira.
13
Kia ki ai a matou toa, mo te tiki noa atu i tena mea, i tena mea: kia mano, kia tini ai nga hua o a matou hipi i o matou parae.
14
Kia nunui ai a matou kau; kore iho he pakarutanga mai ki roto: kahore hoki he whatinga atu ki waho; kahore he auetanga i o matou huarahi.
15
Ka hari te iwi e pena ana: ae, ka hari ano te iwi ko to ratou Atua ko Ihowa.