Psalms Chapter 15 - Paipera Tapu 1868 | Te Paipera Tapu 1868

Psalms Chapter 15 - Paipera Tapu 1868

1
(He himene na Rawiri.) E Ihowa, ko wai e noho ki to tapenakara? ko wai e noho ki to maunga tapu?
2
Ko ia ano e tapatahi ana te haere, e tika ana hoki te mahi, a e korero pono ana i roto i tona ngakau.
3
Kahore nei e ngau tuara tona arero, kahore e kino te mahi ki tana hoa, kahore ano hoki e anga e whakahe i tana hoa.
4
E whakahengia ana te tangata kino e ona kanohi, a e whakahonoretia ana e ia te hunga e wehi ana ki a Ihowa. A ahakoa mate noa ia i tana oati, kahore e whakapaheketia e ia.
5
Kahore e tuku atu i tana moni hei moni whakatuputupu; kahore hoki e tango i te moni hei utu mate mo te tangata hara-kore. Ki te penei te mahi a tetahi tangata, e kore ia e whakakorikoria ake ake ake.