- 1
- (Ki te tino kai whakatangi Airete Tahara. He himene na Rawiri.) E toku atua, e toku Atua, he aha koe i whakarere ai i a au? he aha i matara atu ai ki te whakaora i a au, ki nga kupu o toku hamamatanga?
- 2
- E toku Atua, e karanga atu nei ahau i te awatea, heoi kahore koe e rongo mai, i te po ano kahore hoki e wahangu.
- 3
- Otiia e tapu ana koe, e noho nei i roto i nga whakamoemititanga a Iharaira.
- 4
- I whakawhirinaki o matou mātua ki a koe, i whakawhirinaki ratou, a whakaorangia ana ratou e koe.
- 5
- I karanga atu ratou ki a koe, a whakaorangia ake, i whakawhirinaki ratou ki a koe, a kihai i whakama.
- 6
- Ko au ia he toke, ehara hoki i te tangata: e tawaia ana e te tangata, e whakahaweatia ana e te iwi.
- 7
- Kataina iho ahau e te hunga katoa e kite ana i a au, kō ana o ratou ngutu, oioi ana o ratou mātenga, e ki mai ana,
- 8
- I whakawhirinaki ia ki a Ihowa, kia whakaorangia ai e ia, mana ia e whakaora, ina hoki ia ka pai atu ki a ia.
- 9
- Nau ia ahau i whakawhanau mai i roto i te kopu, i mea hoki kia tumanako atu ahau, i a au ano i nga u o toku whaea.
- 10
- He mea whakarere atu ahau i runga i a koe no te kopu mai ano; ko koe ano toku Atua no te kopu mai ano o toku whaea.
- 11
- Kei mamao atu koe i a au, e tata ana hoki te hē, kahore hoki he kai awhina mai.
- 12
- He tini nga puru e karapoti nei i a au: e whakapaea ana ahau e nga mea kaha o Pahana.
- 13
- E hamama mai ana o ratou mangai ki a au, me te mea he raiona e haehae ana, e hamama ana.
- 14
- E ringihia ana ahau, ano he wai, kua takoki katoa oku iwi; me te ware pi toku ngakau, e rewa ana i waenganui i oku whekau.
- 15
- Kua maroke toku kaha, ano he maramara rīhi, piri tonu toku arero ki oku kauae; kua whakatakotoria ano au e koe ki roto ki te puehu o te mate.
- 16
- E karapotia nei hoki ahau e nga kirehe, e muia ana ahau e te whakaminenga o nga tangata hara: e pokaia ana e ratou oku ringaringa me oku waewae.
- 17
- E taea e au te tatau oku iwi katoa: e titiro mai ana, e matakitaki mai ana ki a au.
- 18
- E wehewehea ana oku kakahu mo ratou, e maka rota ana mo toku weruweru.
- 19
- Kaua ra ia koe e matara atu, e Ihowa, e toku kaha, hohoro mai hei awhina moku.
- 20
- Whakaorangia toku wairua i te hoari, taku hoki e matenui nei i te kuri.
- 21
- Whakaorangia ahau i te mangai o te raiona: whakarongo mai hoki ki a au, kei mate i nga haona o nga unikanga.
- 22
- Ka korerotia e ahau to ingoa ki aku teina, ka whakamoemititia koe e ahau i waenganui i te whakaminenga.
- 23
- E te hunga e wehi ana ki a Ihowa, whakamoemiti atu ki a ia; whakakororiatia ia, e te uri katoa o Hakopa, kia wehi hoki ki a ia, e te uri katoa o Iharaira.
- 24
- Mona hoki kihai i whakahawea, kihai i whakarihariha, ki te auetanga o te ngakau mamae; kihai ano hoki i huna i tona mata ki a ia, engari i tana karangatanga ki a ia i whakarongo mai ia.
- 25
- Ko koe taku e whakamoemiti ai i waenganui o te whakaminenga nui, ka whakamanā e au aku kupu taurangi ki te aroaro o te hunga e wehi ana ki a ia.
- 26
- Ka kai te hunga mahaki, a ka makona: ka whakamoemiti ki a Ihowa te hunga e rapu ana ki a ia; ka ora tonu o koutou ngakau.
- 27
- E mahara nga pito katoa o te whenua, a ka tahuri ki a Ihowa: ka koropiko ano nga hapu katoa o nga iwi ki to aroaro.
- 28
- No Ihowa hoki te rangatiratanga, ko ia ano te Kawana i waenganui o nga iwi.
- 29
- Ka kai, a ka koropiko ki a ia nga tangata tetere katoa o te whenua: ka tuohu iho ki tona aroaro te hunga katoa e heke atu ana ki te puehu; e kore hoki e ahei i tetahi te whakaora tona wairua.
- 30
- Tera e mahi tetahi uri ki a ia; ka waiho ki te Ariki hei whakatupuranga.
- 31
- E haere mai ratou, e kauwhau i tona tika ki te iwi e whanau a mua, He meatanga tenei nana.
Address: 
Phone: 
Email: