- 1
- (Ki te tino kai whakatangi. He himene na Rawiri.) E Ihowa, ko koe taku e whakawhirinaki atu nei; kei whakama ahau ake ake: whakaorangia ahau, he tika nei hoki koe.
- 2
- Anga mai tou taringa ki a au; hohoro te whakaora i a au: kia ai koe hei kohatu kaha moku, hei whare tiaki moku.
- 3
- Ko koe hoki toku kohatu me toku pa: na, kia mahara ki tou ingoa, a arahina ahau, tohutohungia hoki ahau.
- 4
- Whakaputaina ake ahau i roto i te kupenga i hunā e ratou moku; ko koe hoki toku kaha.
- 5
- Tenei toku wairua te tukua atu nei e ahau ki to ringaringa; nau ahau i hoko, e Ihowa, e te Atua o te pono.
- 6
- E kino ana ahau ki te hunga e whakaaro ana ki nga mea tekateka noa; e whakawhirinaki ana hoki ahau ki a Ihowa.
- 7
- Ka whakamanamana ahau, ka hari ki tou atawhai; mou hoki i titiro mai ki taku tangihanga; i matau hoki koe ki toku wairua i nga wa o te hē.
- 8
- A kihai i tukua kia kopia ahau ki roto ki te ringaringa o te hoa riri: kua whakaturia e koe oku waewae ki te wahi nui.
- 9
- Tohungia ahau, e Ihowa, kei te he hoki ahau, pakoko kau toku mata i te pouri, toku wairua me toku kopu.
- 10
- Ka hemo nei hoki toku ora i te tangihanga, me aku tau i te aue; poto iho toku kaha i toku he, kurupopo ana oku iwi.
- 11
- He tawainga ahau na oku hoa riri katoa; ko te tino mahi ia tena a oku hoa noho tata, he mea wehi ahau na nga tangata i mohio ki a au: te kitenga o etahi i a au i waho, rere ana ratou i a au.
- 12
- Kua warewaretia ahau me te tupapaku kua ngaro atu i te ngakau, kua rite ahau ki te oko pakaru.
- 13
- I rongo hoki ahau i te ngaungatuaratanga a te tini; i karopotia ahau e te wehi: i a ratou e runanga ana ki te he moku, i mea ratou, kia whakamatea ahau.
- 14
- Otiia e whakawhirinaki ana ahau ki a koe, e Ihowa: e mea nei ahau, Ko koe ano toku Atua.
- 15
- Kei tou ringaringa oku taima, whakaorangia ahau i nga ringaringa o oku hoa riri, i te hunga hoki e tukino ana i a au.
- 16
- Kia whiti iho tou mata ki to pononga; whakaorangia ahau he mahi tohu hoki tau.
- 17
- Kei whakama ahau, e Ihowa; kua karanga atu hoki ahau ki a koe: kia whakama te hunga kino, kia takoto puku i roto i te rua tupapaku.
- 18
- Whakamutua te korero a nga ngutu teka, he kino nei a ratou korero mo te tangata tika; na to ratou whakapehapeha hoki, na to ratou whakahihi.
- 19
- Ano te nui o tau pai i rongoatia atu e koe mo te hunga e wehi ana ki a koe, i mahia nei e koe mo te hunga e whakawhirinaki ana ki a koe i te aroaro o nga tamariki a te tangata!
- 20
- Ka hunā ratou e koe ki te wahi ngaro i tou aroaro i te whakapakari a te tangata; ka hunā ratou e koe ki roto ki te teneti, kei tata ki te ngangautanga a nga arero.
- 21
- Kia whakapaingia a Ihowa, mona i mea kia miharotia tana mahi tohu ki a au i te pa kaha.
- 22
- I ki hoki ahau i taku potatutatunga, kua motuhia atu ahau i mua i ou kanohi: ahakoa ra i rongo mai ano koe ki toku reo inoi i taku karangatanga atu ki a koe.
- 23
- Arohaina a Ihowa, e tona hunga tapu katoa: e tiakina ana hoki e Ihowa te hunga pono, a he nui tana utu ki te kai mahi whakapehapeha.
- 24
- Kia maia, a mana e whakakaha o koutou ngakau, e te hunga katoa e tumanako atu ana ki a Ihowa.
Address: 
Phone: 
Email: