- 1
- (He himene na Rawiri, hei whakamahara.) E Ihowa, kaua e whakatupehupehu mai ki a au ina riri koe, kaua ano hoki ahau e pakia ina arita mai koe.
- 2
- Titi tonu hoki au pere ki a au: kaha rawa te pehanga a tou ringa ki a au.
- 3
- Kahore he wahi ora o oku kikokiko, na to riri hoki: kahore ano e ata takoto oku wheua, noku i hara nei.
- 4
- Kua taupokina iho hoki toku mahunga e oku kino: ano he pikaunga taimaha e pehi rawa ana i a au.
- 5
- E piro ana oku whiunga, kua pirau i taku mahi poauau.
- 6
- E whakawiria ana ahau; piko rawa; e tangi haere ana i te roa o te ra.
- 7
- Kua kapi toku hope i te mate whakarihariha: kahore hoki he wahi ora o oku kikokiko.
- 8
- Kua kore oku kaha, marū rawa ahau: aue ana ahau i te mamae o toku ngakau.
- 9
- E te Ariki, kei to aroaro aku hiahia katoa; kahore hoki e ngaro i a koe taku auetanga.
- 10
- Kihakiha kau toku ngakau, kua hemo toku kaha: me te māramatanga o oku kanohi, kua kore hoki tena mea oku.
- 11
- Matara noa atu i toku mate te turanga mai o nga tangata i aroha mai ki a au, o oku hoa hoki; i tawhiti ano oku whanaunga e tu ke mai ana.
- 12
- E whakatakoto mahanga ana moku te hunga e whai ana i a au kia whakamatea; he nanakia ano nga kupu a te hunga e rapu ana i te he moku; he whakaaro tinihanga ano hoki a ratou i te roa o te ra.
- 13
- Ko au ia, i rite ki te turi, kihai i rongo, i rite ano hoki ki te tangata wahangu, kahore nei e hamumu tona mangai.
- 14
- Na, rite tonu ahau ki te tangata kahore nei e rongo, kahore nei he whakatupehupehu i tona mangai.
- 15
- E tumanako atu nei hoki ahau ki a koe, e Ihowa: ka whakahoki kupu mai ano koe, e te Ariki, e toku Atua.
- 16
- I mea hoki ahau, Kei koa mai ratou ki a au: ka paheke toku waewae, ka whakahihi mai ratou ki a au.
- 17
- Meake hoki au kopa, kei mua ano i a au aku mea whakapouri.
- 18
- Ka whaki atu hoki ahau i taku kino, ka pouri mo toku hara.
- 19
- Oku hoa riri ia hauhau tonu, kaha tonu; kua tokomaha ano te hunga e kino noa mai ana ki a au.
- 20
- He hoa riri ano ki a au te hunga e utu ana i te pai ki te kino: moku e whai ana i te pai.
- 21
- Kaua ahau e whakarerea, e Ihowa, e toku Atua, kei mamao atu koe i a au.
- 22
- Hohoro mai koe ki te awhina i a au: e te Ariki, e toku whakaoranga.
Address: 
Phone: 
Email: