Psalms Chapter 59 - Paipera Tapu 1868 | Te Paipera Tapu 1868

Psalms Chapter 59 - Paipera Tapu 1868

1
(Ki te tino kai whakatangi, ko Ara-takiti. He Mikitama, na Rawiri, i a Haora i tono tangata atu ra, a tiakina ana e ratou te whare hei whakamate mona.) Whakaorangia ahau, e toku Atua, i oku hoa riri: araia atu i a au te hunga e whakatika mai ana ki a au.
2
Whakaorangia ahau i nga kai mahi i te kino: kia ora ahau i te hunga toto.
3
Kei te whanga nei hoki ratou kia patua ahau: e whakamine mai ana te hunga kaha ki te whawhai ki a au; kahore nei ano oku tutū, kahore oku hara, e Ihowa.
4
Hore aku kino, oma ana ratou, kei te takataka: e ara hei awhina moku, titiro mai hoki.
5
Ae ra, maranga, e Ihowa, e te Atua o nga mano, e te Atua o Iharaira, tirohia iho nga tauiwi katoa: kaua e tohungia tetahi o nga kai mahi i te kino. Hera.
6
Hoki ana ratou i te ahiahi: kei te tau, ano he kuri, taiawhiotia ana e ratou te pa.
7
Nana kei te kupa o ratou mangai, he hoari kei o ratou ngutu: ki ta ratou, ko wai hei whakarongo mai?
8
Tāu ia, e Ihowa, he kata ki a ratou: hei tawainga mau nga tauiwi katoa.
9
E toku kaha, ka tatari atu ahau ki a koe: ko te Atua hoki toku pa.
10
Kei mua i a au toku Atua aroha: ma te Atua ahau ka titiro ai ki oku hoa riri.
11
Kaua ratou e whakamatea, kei wareware oku tangata: kia whakamararatia ratou e tou kaha; whakatakā iho ratou, e te Ariki, e to matou whakangungu rakau.
12
Utua te hara o to ratou mangai, nga kupu a o ratou ngutu, kia hopukia hoki ratou i runga i to ratou whakakake, hei utu ano mo te kanga hoki, mo nga mea teka e korero nei ratou.
13
Whakamotitia ratou i runga i te riri, kia kahore ai ratou: a kia matau ratou ko te Atua te Kawana o Hakopa puta noa ki nga pito o te whenua. Hera.
14
Hoki ana ratou i te ahiahi: kei te tau, ano he kuri, taiawhiotia ana e ratou te pa.
15
Kia kopikopiko noa ratou ki te rapu kai: a, te korenga e makona ngengere tonu iho.
16
Ko ahau ia ka waiatatia e ahau tou kaha; ae, i te ata ka hamamatia e ahau tau mahi tohu: ko koe hoki toku pa, me toku piringa i te ra o taku pouritanga.
17
Ka himene atu ahau ki a koe, e toku kaha: ko te Atua nei hoki toku pa, toku Atua aroha.