- 1
- (He himene na Rawiri, i a ia i te koraha o Hura.) E te Atua, noku koe Atua: ka moata taku rapu i a koe. E hiainu ana toku wairua ki a koe, e hiahia ana oku kokokiko ki a koe: i te whenua maroke, hiainu, kahore nei he wai.
- 2
- Kia kite i tou kaha, i tou kororia; me au nei i kite i a koe i te wahi tapu.
- 3
- Pai atu tou aroha i te ora: mo reira ka whakamoemiti oku ngutu ki a koe.
- 4
- Ina ka whakapai atu ahau ki a koe i a au ano e ora nei; ka torona atu oku ringaringa ki tou ingoa.
- 5
- Ka makona toku wairua, ano i te hinu wheua, i te ngako, a ka hari oku ngutu ina whakamoemiti atu taku mangai ki a koe.
- 6
- Ina mahara ahau ki a koe i runga i toku moenga, ina whakaaro ki a koe i nga mataaratanga o te po.
- 7
- Ko koe toku kai awhina: na ka hari ahau ki te taumarumarutanga iho o ou pakau.
- 8
- Piri tonu toku wairua ki a koe: e tautoko ake ana tou ringa matau i a au.
- 9
- Te hunga e whai ana i a au kia whakamatea, ka riro ratou ki nga wahi o raro rawa o te whenua.
- 10
- Ka hinga ratou i te hoari; hei wahi ratou ma nga pokiha.
- 11
- Tena ko te kingi, ka hari ia ki te Atua; ka whakamanamana nga tangata katoa ko ia nei ta ratou oati: a ka kopia te mangai o te hunga katoa e korero teka ana.
Address: 
Phone: 
Email: