- 1
- (Ki te tino kai whakatangi. He himene, he waiata na Rawiri.) E taria ana koe, e te Atua, e te whakamoemiti i Hiona: a ka whakamanā te kupu taurangi ki a koe.
- 2
- E te kai whakarongo inoi, e haere katoa mai nga kikokiko ki a koe.
- 3
- E kaha ake ana i a au nga kino: a matou mahi tutu, māu ena e hipoki.
- 4
- Ka hari te tangata e whiriwhiria e koe, e meatia e koe kia tata atu, kia noho i roto i ou marae: ka makona matou i te pai o tou whare, o tou temepara tapu.
- 5
- He mea whakawehi, he tapu, tau utu kupu ki a matou, e te Atua o to matou whakaoranga, e te okiokinga o nga pito katoa o te whenua, o te moana, o te hunga hoki o tawhiti.
- 6
- E whakau nei i nga maunga, he kaha hoki nona; tona whitiki nei he kaha.
- 7
- E whakamarie nei i te harurutanga o nga moana, i te harurutanga o o ratou ngaru, me te ngangau o nga iwi.
- 8
- Ka wehi ano ki āu tohu te hunga e noho ana i nga pito rawa: hari ana i a koe nga putake o te ata, o te ahiahi.
- 9
- E tirotirohia mai ana e koe te whenua, e whakamakukuria ana, e whakamomonatia nuitia ana e koe ki te awa o te Atua, e ki nei i te wai: oti rawa ake te whakapai e koe, kua rite mai i a koe he witi mo aua wahi.
- 10
- Makuku rawa i a koe ona moa, pe ana i a koe ona awaawa: e whakangawaritia ana e koe ki nga ua: e manaakitia ana e koe tona pihinga ake.
- 11
- E karaunatia ana e koe te tau ki tou pai; e maturuturu ana hoki te momonatanga o o huarahi.
- 12
- E maturuturu ana ki runga ki nga wahi kai o te koraha: a whitikiria ana nga pukepuke ki te koa.
- 13
- He hipi te kakahu o nga wahi kai; ngaro ana nga raorao i te witi; hamama ana ratou i te hari, waiata ana.
Address: 
Phone: 
Email: