Psalms Chapter 67 - Paipera Tapu 1868

1: (Ki te tino kai whakatangi Nekinoto. He himene, he waiata.) Ma te Atua tatou e atawhai, mana tatou e manaaki; mana e mea kia tiaho mai tona mata ki a tatou; Hera.
2: Kia matauria ai to ara ki runga ki te whenua, tau whakaoranga i roto i nga tauiwi katoa.
3: Kia whakamoemiti nga iwi ki a koe, e te Atua, kia whakamoemiti nga iwi katoa ki a koe.
4: Kia koa nga tauiwi, kia waiata i te hari: no te mea hoki ka tika tau whakaritenga whakawa mo nga iwi, a ka kawana koe i nga tauiwi o te whenua. Hera.
5: Kia whakamoemiti nga iwi ki a koe, e te Atua, kia whakamoemiti nga iwi katoa ki a koe.
6: Ka tuku mai te whenua i ona hua; a ka manaaki te Atua, to tatou Atua, i a tatou.
7: Ka manaaki te Atua i a tatou; a ka wehi nga pito katoa o te whenua i a ia.