- 1
- (Na Horomona.) E te Atua, homai au whakariteritenga ki te kingi, me tou tika ki te tamaiti a te kingi.
- 2
- Mana e whakawa tou iwi i runga i te tika, ou rawa-kore i runga i te whakarite whakawa.
- 3
- Ka kawea mai e nga maunga te rongo mau ki te iwi, e nga pukepuke hoki i runga i te tika.
- 4
- Ka whakarite whakawa ia mo nga ware o te iwi: ka whakaorangia e ia nga tamariki a te rawa-kore; mongamonga noa i a ia te kai tukino.
- 5
- Rite tahi ki te mau o te ra, o te marama, te roa o to ratou wehi ki a koe, a tena whakatupuranga, tena whakatupuranga.
- 6
- E heke iho ia, ano he ua ki runga ki te kotinga tarutaru, me nga ua e whakamakuku nei i te whenua.
- 7
- Ka tupu te tangata tika i ona ra. Tona roa ano hoki o te ata noho, a kore noa te marama.
- 8
- Ka kingi atu ia i tenei moana, a tae noa ki tetahi moana, i te awa, a, nga pito atu ano o te whenua.
- 9
- Ka piko iho ki tona aroaro te hunga o te koraha: a ka mitimiti ona hoa riri i te puehu.
- 10
- Ka maua mai he hakari e nga kingi o Tarahihi, o nga motu: ka kawea mai he tahua e nga kingi o Hepa, o Tepa.
- 11
- Ae, ka koropiko nga kingi katoa ki a ia: ka mahi nga iwi katoa ki a ia.
- 12
- Mana hoki e whakaora te rawa-kore ua tangi atu, te ware hoki me te tangata kahore ona kai awhina.
- 13
- E tohu ia i te tangata iti, i te rawa-kore; ka ora ano i a ia nga wairua o nga rawa-kore.
- 14
- Ka hokona e ia to ratou wairua i roto i te hangarau, i te tutu, a he mea utu nui o ratou toto ki tana titiro.
- 15
- A e ora ia, ka hoatu ano ki a ia he koura no Hepa: ka tukua tonutia hoki te inoi mona; ka whakapaingia ia i tenei ra, i tenei ra.
- 16
- He kutanga witi tera i runga i te whenua, i runga i te tihi o nga maunga; oioi ana ona hua, ano ra ko Repanona, a ka rite te tupu o nga tangata o te pa ki to te tarutaru o te whenua.
- 17
- Ka mau tonu tona ingoa ake ake; ka rite ano tona ingoa ki te ra te pumau: kei roto i a ia te manaakitanga; ka korerotia tona koa e nga iwi katoa.
- 18
- Ka whakapaingia a Ihowa te Atua, te Atua o Iharaira: ko ia nei anake hei mahi i nga mahi whakamiharo;
- 19
- Kia whakapaingia ano tona ingoa kororia mo ake tonu atu; kia ki katoa hoki te whenua i tona kororia. Amine, ae Amine.
- 20
- Ko te mutunga tenei o nga inoi a Rawiri, tama a Hehe.
Address: 
Phone: 
Email: