Psalms Chapter 88 - Paipera Tapu 1868 | Te Paipera Tapu 1868

Psalms Chapter 88 - Paipera Tapu 1868

1
(He waiata, he himene ma nga tama a Koraha. Ki te tino kai whakatangi o Maharata Reanoto. He Makiri na Hemana Eterahi.) E Ihowa, e te Atua o toku whakaoranga, he tangi atu taku ki tou aroaro i te ao, i te po.
2
Kia tae atu taku inoi ki tou aroaro: whakatitahatia mai to taringa ki taku tangi.
3
Kua ki hoki toku wairua i te pouri, a e whakatata ana toku ora ki te rua tupapaku.
4
Kua tāua tahitia ahau me te hunga e heke atu ana ki te rua; e rite ana ahau ki te tangata kahore ona kaha.
5
E takoto noa ana ahau i roto i nga tupapaku, e rite ana ki nga tangata i patua e takoto ana i te urupa, kahore nei e maharatia e koe i muri iho, he mea momotu ke atu na tou ringa.
6
Kua whakatakotoria ahau e koe ki te rua i raro riro, ki te pouritanga, ki nga rire.
7
E pehia ana ahau e tou riri, e pakia ana hoki e koe ki au ngaru katoa. Hera.
8
Kua whakamataratia atu e koe i a au oku hoa: kua meinga ahau e koe hei mea whakarihariha ki a ratou: kua uakina mai ahau, a kahore hoki e puta atu ki waho.
9
Kua he oku kanohi i te tangihanga: e Ihowa, e karanga atu ana ahau ki a koe i nga ra katoa, kua torona atu oku ringaringa ki a koe.
10
Tera ranei koe e mahi merekara ki nga tupapaku? e ara ake koia nga tupapaku ki te whakamoemiti atu ki a koe? Hera.
11
Ka kauwhautia ranei tou aroha i roto i te urupa? tou pono i roto i te whakangaromanga?
12
E matauria koia au mea whakamiharo i roto i te pouri? tou tika i te whenua o te warewaretanga?
13
Heoi, taku nei he karanga ki a koe, e Ihowa: i te ata ano ka tae taku inoi ki tou aroaro.
14
He aha e Ihowa, i pangā ai toku wairua e koe? he aha i huna ai to mata ki a au?
15
No taku tamarikitanga ake ano i pakia ai ahau, i whakahemohemo ai: e pehia ana ahau e au whakawehi, a, potatutatu noa iho.
16
E tika ana to riri ki runga i a au: ngaro iho ahau i au mea whakawehi.
17
Ano he wai ratou e karapoti nei i a au i nga ra katoa: rupeke ana ratou ki te mui mai ki a au.
18
Kua whakamataratia atu e koe i a au te tangata hei aroha mai, me oku hoa, kei te pouritanga oku hoa ake.