Revelation Chapter 2 - Paipera Tapu 1868 | Te Paipera Tapu 1868

Revelation Chapter 2 - Paipera Tapu 1868

1
Tuhituhia atu ki te anahera o te hahi i Epeha; Ko nga kupu enei a te kai pupuri i nga whetu e whitu i tana ringa matau, a e haereere ana i waenganui o nga turanga rama koura e whitu;
2
Ka mātau ahau ki aū mahi, ki tou uaua, ki tou manawanui, a e kore koe e ata hanga ki te hunga kino: kua whakamatautauria hoki e koe te hunga e mea nei he apotoro ratou, a ehara, kua mau ano hoki i a koe he hunga teka ratou:
3
I pēhia koe, heoi whakamanawanui tonu, mahi ana koe he whakaaro hoki ki toku ingoa, kahore hoki i hoha.
4
Otira he mea ano toku ki a koe, no te mea kua whakarerea e koe tou aroha tuatahi.
5
Na, kia mahara ki te wahi i taka iho ai koe, ripeneta, mahia hoki nga mahi o mua; ki te kahore, ka hohoro taku haere atu ki a koe, ka nekehia atu e ahau tou turanga rama i tona wahi, ki te kore koe e ripeneta.
6
Ko tenei ia tau na, e kino ana koe ki nga hanga a nga Nikoraiti, e kinongia nei e ahau.
7
Te tangata he taringa ona, kia rongo ia ki ta te Wairua e mea nei ki nga hahi; Te tangata i a ia te wikitoria, ka hoatu e ahau māna e kai ta te rakau o te ora, e tu ana i waenganui o te pararaiha o te Atua.
8
Tuhituhia ano hoki ki te anahera o te hahi i Hamurana; Ko nga kupu enei a te tuatahi a te whakamutunga, i mate nei a kua ora;
9
Ka mātau ahau ki āu mahi, ki tou tukinotanga, ki tou rawakoretanga, (heoi e whai taonga ana ano koe,) e mātau ana ano ahau ki te korero kino a te hunga e mea nei he Hurai ratou, a ehara, engari ko te whakamenenga ratou o Hatana.
10
Kaua e wehi ki nga mamae meake nei pa ki a koe, na, tera e makā etahi o koutou e te rewera ki te whare herehere, kia whakamatautauria ai koutou; a ka whakamamaetia koutou kotahi tekau nga ra: kia pono koe a mate noa, a maku e hoatu ki a koe te karauna o te ora.
11
Te tangata he taringa ona, kia rongo ia ki ta te Wairua e mea nei ki nga hahi; Te tangata i a ia te wikitoria, e kore ia e kino i te matenga tuarua.
12
Tuhituhia ano hoki ki te anahera o te hahi i Perekamu; Ko nga kupu enei a te kai mau i te hoari koi e rua nei nga mata;
13
Ka mātau ahau ki āu mahi, ki te wahi hoki e noho na koe, ko te wahi ia i te torona o Hatana: a e mau ana koe ki toku ingoa, kahore hoki koe i whakakahore ki toku whakapono, i nga ra hoki i a Anatipa taku kai whakaatu pono, i whakamatea nei i roto i a koutou i te wahi e noho na a Hatana.
14
Tenei ia etahi mea aku ki a koe, no te mea kei a koe te hunga e mau ana ki te whakaakoranga a Paraama, nāna nei i whakaako a Paraka ki te maka tūtukitanga-waewae ki te aroaro o nga tamariki a Iharaira, e kai ai ratou i nga mea i patua ma te whakapakoko, e puremu ai hoki.
15
Kei a koe ano hoki te hunga e mau ana ki te whakaakoranga a nga Nikoraiti, ki taku e whakarihariha atu nei.
16
Ripeneta; na, ki te kahore, ka hohoro taku haere atu ki a koe, a ka whawhaitia ratou e ahau ki te hoari o toku mangai.
17
Te tangata he taringa ona, kia rongo ia ki ta te Wairua e mea nei ki nga hahi; Te tangata i a ia te wikitoria, ka hoatu e ahau te mana huna, māna e kai, ka hoatu ano e ahau ki a ia he kohatu ma, me te ingoa hou, he mea tuhituhi ki te kohatu, e kore nei e matauria e tetahi e te tangata anake kua whiwhi.
18
Na, tuhituhia atu ki te anahera o te hahi o Taiataira; Ko nga kupu enei a te Tama a te Atua, nona nei nga kanohi i rite ki te mura ahi, ona waewae ano hoki rite tonu ki te parahi pai;
19
E mātau ana ahau ki āu mahi, ki tou aroha, ki tou mahi minita, ki tou whakapono, ki tou manawanui, ki āu mahi; nga mea ano hoki o muri nui atu i o mua.
20
Tenei ano ia etahi mea aku ki a koe, no te mea e tukua ana e koe taua wahine a Ietepere, e mea nei he poropiti ia, ki te whakaako ki te kukume i aku pononga kia moe tahae, kia kai ano hoki i nga mea e patua ana ma nga whakapakoko.
21
I hoatu ano e ahau ki a ia he taima e ripeneta ai ia ki tana moe tahae; a kihai ia i ripeneta.
22
Na, ka makā ia e ahau ki tetahi moenga, me te hunga ano hoki e puremu ana ki a ia, ki roto ki te tukinotanga nui, ki te kore ratou e ripeneta ki a ratou mahi.
23
Ka whakamatea ano hoki e ahau ona tamariki kia mate rawa; a ka mātau nga hahi katoa ko ahau te kai rapu i ta nga whatumanawa i ta nga ngakau: ka rite hoki ki a koutou mahi taku e hoatu ai ki tenei ki tenei o koutou.
24
Ko taku kupu ia tenei ki a koutou, ki era atu hoki i Taiataira, ki te hunga kahore nei i a ratou tenei whakaakoranga, a kahore ano kia mātau ki nga hohonutanga o Hatana, ki a ratou mea e korero nei; E kore e whakawaha atu e ahau tetahi atu mea whakataimaha ki a koutou.
25
Ko tera ia i a koutou, puritia kia tae atu ra ano ahau.
26
Na, te tangata i a ia te wikitoria, a e puritia ana e ia aku mahi taea noatia te mutunga, maku e hoatu ki a ia he mana ki nga tauiwi:
27
A he rino te tokotoko e whakahaere tikanga ai ia mo ratou; ka pākarua ratou, ano he oko na te kai pokepoke paru: ka rite ki ta taku Matua i homai ai ki a au.
28
Ka hoatu ano e ahau ki a ia te whetu o te ata.
29
Te tangata he taringa ona, kia rongo ia ki ta te Wairua e mea nei ki nga hahi.