Revelation Chapter 4 - Paipera Tapu 1868 | Te Paipera Tapu 1868

Revelation Chapter 4 - Paipera Tapu 1868

1
Muri iho i enei mea ka kite ahau, na, he tatau kua oti te whakapuare i te rangi: a ko te reo tuatahi i rongo ai ahau me te mea no tetahi tētere e ki mai ana ki a au, e mea ana, Haere mai ki runga nei, a e whakakitea e ahau ki a koe nga mea kua takoto mo muri i enei.
2
I reira pu ano kua nohoia ahau e te Wairua: na, he torona kua tu ki te rangi, a i runga i te torona ko tetahi e noho ana.
3
A te ahua o tera i noho ra rite tonu ki te kamaka hahapa, ki te hararina: he aniwaniwa ano i nga taha katoa o te torona, te ahua kei to te emerara.
4
A i nga taha katoa o te torona etahi torona e rua tekau ma wha: i kitea ano e ahau i runga i nga torona e rua tekau ma wha nga kaumatua e noho ana, he mea whakakakahu ki te kakahu ma; a he karauna koura ano a ratou i runga i o ratou mātenga.
5
Me te puta mai ano i roto i te torona he uira, he whatitiri, he reo: e whitu ano hoki nga rama ahi e ka ana i mua i te torona; ko nga Wairua e whitu enei o te Atua.
6
I mua ano o te torona he moana karahi, te rite kei te haupapa: a i waenganui o te torona, i nga taha katoa o te torona, ko nga mea ora e wha, kapi tonu a mua a muri o ratou i te kanohi.
7
Te tuatahi o nga mea ora i rite ki te raiona, te tuarua o nga mea ora i rite ki te kuao kau, na, te mata o te tuatoru o nga mea ora i rite ki to te tangata, a, te wha o nga mea ora i rite ki te ekara e rere ana.
8
Na, aua mea ora e wha e ono nga parirau o tetahi o tetahi i nga taha katoa; kī tonu ano hoki a roto o ratou i te kanohi: a kahore e mutu ta ratou i te ao i te po, he mea tonu ta ratou, Tapu, tapu, tapu te Ariki te Atua Kaha rawa, i mua nei ia, tenei ano inaianei, a e haere mai ana ano a mua.
9
A i te mea ka hoatu e nga mea ora te kororia, te honore, me te whakawhetai, ki tera e noho ana i runga i te torona, e ora ana ake ake ake,
10
Ka hinga iho nga kaumatua e rua tekau ma wha ki te aroaro o tera e noho ana i runga i te torona, a ka koropiko ki a ia e ora tonu nei ake ake ake, ka panga hoki i o ratou karauna ki mua o te torona, ka mea,
11
Tika tonu, e te Ariki, kia riro i a koe te kororia te honore te kaha: i hangā hoki e koe nga mea katoa, nau ano i pai ake i takoto ai aua mea, na reira ano hoki i hangā ai.