- 1
- Koia ahau ka akiaki atu nei ia koutou, e aku teina, kia whakaaora nga mahi tohu a te Atua, kia tapaea atu o koutou tinana hei whakahere ora, e tapu ana, e manakohia ana e te Atua, he mahi na to koutou hinengaro.
- 2
- A kaua to koutou ahua e rite ki to tenei ao: engari kia rere ke, ara kia whakahoutia koutou hinengaro, kia whakamatautauria ai e koutou ta te Atua e pai ai, te mea e pai ana, e manakohia ana, e tino rite ana.
- 3
- Ko taku kupu hoki tenei ki nga tāngata katoa i roto i a koutou, he mea na te aroha noa i homai nei ki a au, Kaua te whakaaro e kake ki runga ake i te mea i tika kia whakaaro; engari kia ata whakaaro, kia rite ki ta te Atua wahi whakapono i tuwha ai ki tetahi ki tetahi,
- 4
- E rite ana hoki ki o tatou wahi ka maha nei i te tinana kotahi, a aua wahi katoa kihai i kotahi te mahi ma ratou:
- 5
- Whaihoki ko tatou tokomaha, he tinana kotahi i roto i a te Karaiti, ko tatou takitahi ia hei wahi no tatou tahi.
- 6
- Na, ka rere ke nei nga mea i homai ki a tatou, he mea e rite ana ki te aroha noa i homai ki a tatou, ki te mea he mahi poropiti, kia rite nga tikanga ki te whakapono;
- 7
- He mahi minita, kia u ki te mahi minita; te kai whakaako, kia u ki te whakaako;
- 8
- Te kai whakahauhau, kia u ki te whakahauhau; te kai hoatu, kia tapatahi te ngakau; te kai tohutohu, kia uaua; te kai atawhai, kia mārama te ngakau.
- 9
- Te aroha hei te mea tinihanga kore. Whakariharihangia te kino; kia u ki te pai.
- 10
- Te ngakau aroha o tetahi ki tetahi, kia rite ki to te tuakana tuna ko te teina; kia nui te whakahonore a tetahi i tetahi;
- 11
- Kia uaua, kaua e mangere; kia toko tonu ake te wairua; me te mahi ano ki te Ariki;
- 12
- Kia hari i runga i te tumanako; kia manawanui ki te whakapawera; kia u ki te inoi;
- 13
- Whakawhiwhia te hunga tapu ina rawakore; kia mau ki te atawhai manuhiri.
- 14
- Manaakitia, te hunga e tukino ana i a koutou: manaakitia, kaua e kanga.
- 15
- Kia hari tahi me te hunga hari, tangi tahi me te hunga tangi.
- 16
- Kia kotahi ta koutou whakaaro tetahi ki tetahi. Kaua e whakakake te whakaaro, engari me whakauru ki roto ki te hunga iti. Kei mea ake koutou he mohio koutou.
- 17
- Kaua e utua ta tetahi kino ki te kino. Whakaaroa wawetia he pai ki te aroaro o nga tāngata katoa.
- 18
- Ki te taea, whakapaua ta koutou kia mau te rongo ki nga tāngata katoa.
- 19
- Aua e rapu utu mo koutou, e aku hoa aroha, engari neke atu i te riri: kua oti hoki te tuhituhi, Maku te rapu utu; maku te hoatu utu, e ai ta te Ariki.
- 20
- Na, ki te mate hiakai tou hoa riri, whangainga; ki te mate wai, whakainumia: ki te penei hoki to mahi, ka purangatia e koe nga waro kapura ki runga ki tona mātenga.
- 21
- Kei hinga koe i te kino, engari kia hinga te kino i te pai.
Address: 
Phone: 
Email: