Romans Chapter 16 - Paipera Tapu 1868 | Te Paipera Tapu 1868

Romans Chapter 16 - Paipera Tapu 1868

1
Tena to matou tuahine a Pipi te tukua atu e ahau ki a koutou, he kai mahi ia na te hahi i Kenekerea:
2
Hei manuhiri ia ma koutou i roto i te Ariki, kia rite ki ta te hunga tapu tikanga, a ki te matea e ia tetahi mea a koutou, ma koutou e atawhai: he tokomaha hoki ana i atawhai ai, me ahau ano hoki.
3
Oha atu ki a Pirihira raua ko Akuira, ki oku hoa mahi i roto i a Karaiti Ihu:
4
Na raua nei hoki o raua kakī i tuku atu kia ora ai ahau: ehara hoki i te mea ko ahau anake e whakawhetai atu ki a raua, engari ko nga hahi katoa hoki o nga tauiwi.
5
Oha atu ano ki te hahi i to raua whare. Oha atu ki a Epainetu ki taku i aroha ai, ko ia hoki ta te Karaiti matamua o Akaia.
6
Oha atu ki a Meri, i nui nei tana mahi ki a matou.
7
Oha atu ki a Anaroniku raua ko Hunia, oku whanaunga, oku hoa herehere ano hoki, he ingoa nunui nei o raua i roto i nga apotoro, no mua nei i a au to raua urunga ki roto ki a te Karaiti.
8
Oha atu kia Amapiria, ki taku i aroha ai i roto i te Ariki.
9
Oha atu ki a Urapane, ki to matou hoa mahi i roto i a te Karaiti, ki a Takuha ano hoki ki taku i aroha ai.
10
Oha atu ki a Apere e paingia ana i roto i a te Karaiti. Oha atu ki a Aritopuru ma.
11
Oha atu ki a Heroriona ki toku whanaunga. Oha atu ki a Nakihu ma, ki nga mea i roto i te Ariki.
12
Oha atu ki a Taripina raua ko Taripoha, e mahi nei i roto i te Ariki. Oha atu ki a Perahi e arohaina nei, he nui nei tana mahi i roto i te Ariki.
13
Oha atu ki a Rupuha i whiriwhiria i roto i te Ariki, ki tona whaea, ara, ki to maua tahi.
14
Oha atu ki a Ahunikiritu, ratou ko Perekona, ko Herama, ko Pataropa, ko Herami, ki nga teina ano hoki e noho ana i a ratou.
15
Oha atu ki a Piroroku, raua ko Huria, ki a Nireu, raua ko tona tuahine, ki a Orimapa ratou ko te hunga tapu katoa e noho ana i a ratou.
16
Oha atu tetahi ki tetahi hei te kihi tapu ano. Tenei te oha atu nei nga hahi o te Karaiti ki a koutou.
17
He tohe tenei naku ki a koutou, e aku teina, tirohia iho te hunga e mea ana i nga wehewehenga, i nga mea whakahinga, he mea puta ke i te whakaakoranga i whakaakona ai koutou, tahuri ke atu i a ratou.
18
Ehara hoki to tatou Ariki a Ihu Karaiti i ta ratou e mahi atu nei, engari ko o ratou kopu; a he whakapati he kupu pai ta ratou, hei tinihanga mo nga ngakau o te hunga kino kore.
19
Ko to koutou ngohengohetanga mai ia kua pakū ki nga tāngata katoa. Koia ahau ka hari nei ki a koutou: a e mea ana ano ahau kia whai whakaaro koutou ki te pai, kia atea hoki i te kino.
20
Na, tera te Atua o te rangimarie e hohoro te kuru i a Hatana ki raro i o koutou waewae. Kia tau ki a koutou te aroha noa o to tatou Ariki o Ihu Karaiti. Amine.
21
Tenei te oha atu nei ki a koutou a Timoti taku hoa mahi, a Ruhiu, a Hahona, a Hohipate, oku whanaunga.
22
Ko ahau tenei ko Teretiu, ko te kai tuhituhi o tenei pukapuka, te oha atu nei ki a koutou i roto i te Ariki.
23
Tenei te oha atu nei kia koutou a Kaiu te kai atawhai oku, o te hahi katoa ano hoki, Tenei te oha atu nei a Eratuha kai tiaki o nga mea o te pa, raua ko te teina ko Kuaratu.
24
Kia tau ki a koutou katoa te aroha noa o to tatou Ariki o Ihu Karaiti. Amine.
25
Waiho atu i te Atua e kaha ana ki te whakau i a koutou, i runga i nga ritenga o taku rongo pai, o te kauwhautanga hoki o Ihu Karaiti, o te whakakitenga mai ano hoki o te mea ngaro, kihai nei i rangona no te timatanga ra ano o te ao,
26
A kua whakamaramatia mai inaianei e nga Karaipiture a nga poropiti, he mea whakarite mai na te Atua ora tonu, a whakapuakina mai ana ki nga tauiwi katoa kia ngohengohe ai ratou ki ta te whakapono:
27
Waiho atu i te Atua, ko ia nei anake te Mea mātau, te kororia i roto i a Ihu Karaiti, ake ake ake. Amine.