Ruth Chapter 4 - Paipera Tapu 1868 | Te Paipera Tapu 1868

Ruth Chapter 4 - Paipera Tapu 1868

1
Na, ka haere a Poaha ki te kuwaha, a noho ana i reira; na, ko te whanaunga i korerotia ra e Poaha e haere atu ana. Katahi tera ka mea atu, E mea, e mea, peka mai nei ki konei noho ai. Na, ka peka atu ia, a noho ana.
2
Katahi ka tikina e ia etahi tangata o nga kaumatua o te pa, kotahi tekau, a ka mea, E noho ki konei. Na, noho ana ratou.
3
Na, ko tana meatanga mai ki taua whanaunga, E hokona ana e Naomi, i haere mai nei i te whenua o Moapa, te wahi o te māra i to tatou tuakana i a Erimereke:
4
Na, i mea ahau kia whakaatu atu ki a koe, kia mea atu, Mau e hoko i te aroaro o nga tangata, i te aroaro ano hoki o nga kaumatua o toku iwi. Ki te hokona e koe, hokona: a ki te kahore e hokona, korerotia mai ki a au, kia mohio ai ahau: kahore hoki he tangata hei hoko, ko koe anake, a no muri ahau i a koe. Na, ko te meatanga atu a tera, Maku e hoko.
5
Katahi a Poaha ka mea mai, I te ra e hokona ai te māra ki a koe e te ringa o Naomi, me hoko ano e Rutu ki a koe, e taua Moapi, e te wahine a te tupapaku, hei whakaara ingoa ake mo te tupapaku ki tona wahi tupu.
6
Na, ko te meatanga atu a taua whanaunga, E kore e taea te hoko e ahau maku; kei he toku kāinga tupu: mau taku hokonga e hoko; e kore hoki e taea te hoko e ahau.
7
Na, i mua ko te tikanga tenei i roto i a Iharaira mo nga utunga e hoki mai ana, mo nga whakawhitiwhitinga, hei whakamau mo nga kupu katoa; I unuhia e tetahi tona hu, a hoatu ana ki tona hoa: a hei kai whakaatu tenei i roto i a Iharaira.
8
Na, ka mea taua whanaunga ki a Poaha, Hokona mau. A unuhia ake e ia tona hu.
9
Na, ko te meatanga atu a Poaha ki nga kaumatua ratou ko te iwi katoa, He kai titiro koutou i tenei ra ki taku hokonga i nga mea katoa a Erimereke, i nga mea katoa ano hoki a Kiriono, a Maharono, i roto i te ringa o Naomi.
10
Me Rutu ano hoki te Moapi, te wahine a Maharono, kua hokona ia e ahau hei wahine maku, hei whakaara ingoa ake mo te tupapaku ki runga ki tona kāinga tupu, kei hautopea atu te ingoa o te tupapaku i roto i ona teina, i te kuwaha ano hoki o tona wahi; ko koutou nga kai titiro i tenei ra.
11
Na, ka mea mai nga tangata katoa i te kuwaha, ratou ko nga kaumatua, He kai titiro matou. Ma Ihowa e mea tena wahine e haere mai na ki tou whare kia rite ki a Rahera raua ko Rea i tu ai te whare o Iharaira: kia nui ano hoki te mahi i Eparata, kia whai ingoa ki Pete-rehema:
12
Hei te whare o Parete, whanau o Tamara raua ko Hura, he rite mo tou whare, ara, mo te uri e homai e Ihowa ki a koe i roto i tenei kotiro.
13
Na, ka tango a Poaha i a Rutu, a waiho iho ia hei wahine māna: na, ka tae atu ki a ia, a ka meinga e Ihowa kia hapu; na, kua whanau tana tamaiti.
14
Na, ka mea nga wahine ki a Naomi, Kia whakapaingia a Ihowa, kihai nei i whakatiki i a koe i tenei ra ki te whanaunga: ka karangatia ano hoki tona ingoa i roto i a Iharaira.
15
Māna hoki tou wairua e whakahoki ake, ko ia hoki hei atawhai mo tou ruruhitanga: he whanau hoki ia na to hunaonga e aroha nei ki a koe, e nui nei tona pai ki a koe i to nga tama tokowhitu.
16
Na, ka tango a Naomi i taua tamaiti, a whakatakotoria ana ki tona uma, a ko ia hei kai hikihiki mona.
17
Na, huaina ana he ingoa mona e nga wahine e noho tata ana; i mea ratou, Kua whanau tetahi tamaiti ma Naomi; na huaina ana e ratou tona ingoa ko Opere. Ko te pāpā tenei o Hehe, pāpā o Rawiri.
18
Na, ko nga whakatupuranga enei o Parete: whanau ake ta Parete ko Heterono,
19
Whanau ake ta Heterono ko Rame, whanau ake ta Rame ko Aminarapa,
20
Whanau ake ta Aminarapa ko Nahahona, whanau ake ta Nahahona ko Haramono,
21
Whanau ake ta Haramono ko Poaha, whanau ake ta Poaha ko Opere,
22
Whanau ake ta Opere ko Hehe, whanau ake ta Hehe ko Rawiri.