- 1
- Kua tae mai ahau ki taku kari, e taku tuahine, e taku hoa; kua oti taku maira me taku kinaki kakara te kohi, kua kainga e ahau taku honikoma me taku honi; kua inumia e ahau taku waina me taku waiu. E kai, e oku hoa, e inu, ina, kia nui te inu, e oku hoa aroha.
- 2
- E moe ana ahau, ko taku ngakau ia e ara ana. Ko te reo tenei o taku e aroha nei e patuki ana, e mea ana, Te tatau ki a au, e taku tuahine, e taku hoa, e taku kukupa, e taku mea pai rawa; kapi tonu hoki toku mahunga i te tomairangi, oku makawe ano hoki i nga pata o te po.
- 3
- Kua oti toku koti te unu e au: me pehea e kakahuria ai ano? Kua oti oku waewae te horoi, kia whakaparua ano koia e ahau?
- 4
- I kuhua mai tona ringa e taku e aroha nei i te kohao o te tatau, a oho ana oku whekau ki a ia.
- 5
- I ara atu ahau ki te uaki i te tatau ki taku i aroha ai; maturuturu ana te maira i oku ringaringa, te maira reka i oku maihao ki runga ki nga puritanga o te tutaki.
- 6
- Uakina ana e ahau ki taku i aroha ai, heoi kua kore taku i aroha ai, kua haere atu: taku wairua riro pu i tana kupu: i rapu ahau i a ia; heoi kihai i kitea; i karangatia atu ia e ahau, kihai ano ia i whakahoki kupu mai.
- 7
- I tutaki ki a au nga kai tiaki e kopikopiko nei i te pa; patua ana ahau e ratou, mamae ana ahau i a ratou; tangohia ana toku arai i a au e nga kai tiaki o nga taiepa.
- 8
- He tohe atu tenei naku ki a koutou, e nga tamahine o Hiruharama, ki te tutaki koutou ki taku e aroha nei, ki atu ki a ia, e mate ana ahau i te aroha.
- 9
- E te ataahua rawa o nga wahine, he aha te nuinga ake o tau i aroha ai i tetahi atu e arohaina ana? He aha te nuinga ake o tau i aroha ai i tetahi atu e arohaina ana, i pena ai to tohe ki a matou?
- 10
- He ma taku i aroha ai, he kiri whewhero, nui atu i nga mano kotahi tekau.
- 11
- He tino koura, he mea para-kore tona mahunga, he mawhatu ona makawe, mangu tonu, ano he rawena.
- 12
- Ona kanohi kei o nga kukupa i te taha o nga awa wai, he mea horoi ki te waiu, pai rawa te whakanoho.
- 13
- Ona paparinga ano he tupuranga kinaki kakara, ano he puawai pai; ona ngutu, me te mea he maira reka e maturuturu iho ana i nga rengarenga.
- 14
- Ona ringa, ano he mowhiti koura kua oti nei he perira te whakanoho ki roto: tona kopu, te rite, kei te rei pai rawa, he mea whakakikorua ki nga hapira.
- 15
- Ona waewae, rite tonu ki nga pou mapere, he mea whakatu ki runga ki nga turanga koura pai rawa; tona ahua koia ano kei a Repanona, pai rawa, me nga hita.
- 16
- Te mea a tona mangai reka rawa; ahuareka katoa ia. Ko taku tenei i aroha ai, ko toku hoa ano tenei, e nga tamahine o Hiruharama.
Address: 
Phone: 
Email: