Zechariah Chapter 9 - Paipera Tapu 1868 | Te Paipera Tapu 1868

Zechariah Chapter 9 - Paipera Tapu 1868

1
Te poropititanga o te kupu a Ihowa i te whenua o Hararaka. Na, tona taunga atu ko Ramahiku; i te mea e anga ana nga kanohi o te tangata o nga hapu katoa ano o Iharaira ki a Ihowa.
2
To Hamata rohe ano hoki kei reira, to Taira, to Hairona to te pa whakaaro nui.
3
I hanga ano e Taira he pa kaha mona, i opehia ano e ia te hiriwa ano ko te puehu, te koura para-kore ano ko te paru o nga waharoa.
4
Nana, ma te Ariki ia e pei atu, ka patua ano hoki e ia tona kaha i te moana; ka pau ano ia i te ahi.
5
Ka kite a Ahakerono, a ka wehi, a Kaha ano hoki, a nui atu te mamae, me Ekerono ano hoki; no te mea he whakama to tana tumanakohanga atu; ka ngaro atu ano hoki te kingi i roto i a Kaha, e kore ano a Ahakerono e nohoia.
6
Ka nohoia ano hoki a Aharoro e te poriro, ka hatepea atu ano e ahau te whakapehapeha o nga Pirihitini.
7
Ka kore ano i a au ana toto i roto i tona mangai, ana mea whakarihariha ano hoki i waenganui i ona niho: na, te morehu, mo to tatou Atua ano ia, ka rite ano ki te kawana i roto i a Hura, ka rite ano a Ekerona ki te Tepuhi.
8
Ka nohoia ano hoki e ahau nga taha o toku whare, he whakaaro ki te taua, ki te tangata ano e tika ana na reira, ki te tangata ano e hoki ana; e kore ano te kai tukino e tika na waenga i a ratou a muri ake nei: kua kite nei hoki oku kanohi inaianei.
9
Kia nui te whakamanamana, e te tamahine o Hiona, hamama, e te tamahine o Hiruharama, nana, to Kingi e haere mai na ki a koe: he tika tona, he whakaoranga, he ngakau mahaki tona, e noho ana i runga i te kaihe, i runga ano hoki i te kuao, i te tamaiti a te kaihe.
10
Ka hatepea atu ano e ahau te hariata o Eperaima, me te hoiho ano o Hiruharama; ka hatepea atu ano te kopere o te whawhai: mo te rongo mau ano ana kupu ki nga tauiwi; ka kingi ano ia i tetahi moana, a tae noa ki tetahi moana, i te awa, a tae noa ki nga pito o te whenua.
11
Me koe ano hoki, na te toto o to kawenata i ungā atu ai e ahau o herehere i roto i te poka kahore nei ona wai.
12
Tahuri atu ki te pa kaha, e nga herehere, e te hunga e tumanako ana: i tenei rangi nei ano, me whakaatu atu e ahau e rua aku whakautu ki a koe;
13
Ina whakapikoa e ahau a Hura maku, ina whakanohoia te kopere a Eperaima, ina oho ano i a au o tamariki, e Hiona, ki te whawhai ki o tamariki, e Kariki, a ka meinga koe e ahau kia rite ki te hoari a te marohirohi.
14
A ka kitea a Ihowa i runga i a ratou, ka puta atu ano hoki tana pere, ano he uira: ka whakatangihia ano hoki te tētere e te Ariki e Ihowa, a ka haere ia i runga i nga tukauati o te tonga.
15
Ma Ihowa o nga mano ratou e tiaki; a ka kai ratou, ka riro iho ano hoki i a ratou nga kohatu o te kopere; ka inu ano ratou, ka hamama me te mea na te waina; ka whakakīa ano ratou ano he peihana, ano ko nga koki o te aata.
16
Ka whakaora ano hoki a Ihowa to ratou Atua i a ratou i taua ra; he hipi hoki no tona iwi: ka rite hoki ratou ki nga kohatu o te karauna, ano he kara i runga i tona whenua.
17
Na, koia ano tona pai, koia ano tona ataahua! ka tupu ake nga tamariki i te witi, nga kotiro i te waina hou.