1st Peter Chapter 2 - Paipera Tapu 1868 | Te Paipera Tapu 1868

1st Peter Chapter 2 - Paipera Tapu 1868

1
Na, whakarerea atu nga mauahara katoa, nga hianga katoa, nga tinihanga, nga hae, me nga kupu ngautuara katoa,
2
Kia rite ki nga tamariki whanau hou, hiahiatia atu te waiu tinihanga kore o te kupu, ko te mea hoki ia e tupu ai koutou:
3
Ki te mea kua whakamatautau koutou he tikanga ngawari ta te Ariki.
4
To koutou haerenga mai ki a ia ki te kohatu ora, i whakakahoretia nei e nga tāngata, he mea whiriwhiri ia na te Atua, he mea utu nui;
5
Ka hangā hoki koutou, ano he kohatu ora hei whare, ara, hei mea wairua, hei tohunga tapu, hei tapae atu i nga patunga tapu, ara, i nga mea wairua, he mea e manakohia ana e te Atua i runga i a Ihu Karaiti.
6
Mo reira tera wahi o te Karaipiture, Na, ka whakatakotoria e ahau ki Hiona te tino kamaka o te kokonga, he mea whiriwhiri, he mea utu nui, a, te tangata e whakapono ana ki a ia e kore e whakama.
7
Ki a koutou e whakapono na he mea utu nui ia: ki te hunga whakapono kore ia, te kamaka i whakakahoretia e nga kai hanga, kua meinga tenei hei upoko mo te kokonga,
8
Hei kamaka tūtukitanga waewae ia, hei toka whakahinga, ki te hunga e tūtuki ana ki te kupu, ki te hunga whakapono kore: i whakaritea mai hoki ratou hei penei.
9
Ko koutou ia he whakatupuranga whiriwhiri, he tohunga, he kingi, he iwi tapu, he iwi kua riro pu mai; hei whakapuaki i nga pai o te kai karanga i a koutou i roto i te pouri ki tana maramatanga whakamiharo:
10
I mua, ehara i te iwi, inaianei ia he iwi na te Atua: kihai nei i tohungia i mua, inaianei ia ka tohungia.
11
E aku hoa aroha, ko taku whakahau atu tenei, he hunga noho noa he konene hoki koutou, mawehe atu i nga hiahia kikokiko e whawhai nei ki te wairua;
12
Kia pai ta koutou whakahaere i roto i nga tauiwi, mo ta ratou whakapae ki a koutou, he kai mahi koutou i te kino, na kia whakakororia ratou i te Atua i te ra o te tirohanga mai, ina kite i ā koutou mahi pai.
13
Na, kia ngohengohe koutou ki nga tikanga katoa a te tangata he whakaaro ki te Ariki: ahakoa na te kingi, na te mea nui rawa;
14
Na nga kawana ranei, na te hunga i tonoa mai e ia hei whiu i nga kai mahi i te kino, hei whakamoemiti ia mo te hunga e mahi ana i te pai.
15
Ko ta te Atua hoki tenei i pai ai, kia ai a koutou mahi pai hei puru mo nga mangai kuare o nga tāngata whakaaro kore:
16
He hunga ehara nei i te herehere, otiia e kore e waiho to koutou herekoretanga hei hipoki mo te mauahara, engari kia rite ki nga pononga a te Atua.
17
Whakahonoretia nga tāngata katoa. Arohaina nga teina nga tuakana. E wehi ki te Atua. Whakahonoretia te kingi.
18
E nga pononga, kia ngohengohe ki o koutou rangatira kia nui te wehi; he teka ki te hunga pai ki te hunga ngawari anake, ki te hunga whanoke ano hoki.
19
He mea whai whakapainga hoki tenei, ki te mea na te maharatanga ki te Atua ka whakamanawanui ai tetahi ki nga mea whakapouri, i a ia ano hoki e whakamamaetia hetia ana.
20
He aha hoki te kororia, ki te mea ka whakamanawanui koutou, i te mea kua hara koutou a ka motokia? tena ka whakamanawanui koutou, i te mea ka mahi pai a ka whakamamaetia, he mea whai whakapainga tenei ki te Atua.
21
I karangatia hoki koutou ki tenei: i whakamamaetia hoki a te Karaiti mo tatou, a waiho iho e ia he tauira ma tatou, kia aru ai koutou i ona tapuae:
22
Kihai nei ia i mea i te hara, kahore ano hoki i kitea te tinihanga i tona mangai:
23
Ka taunutia, kihai ia i taunu atu; ka whakamamaetia, kihai ia i whakatuma; engari i tuku atu i a ia ki te kai whakarite tika o te whakawa:
24
Nāna ake i waha o tatou hara, na tona tinana ake, i runga i te rakau, kia whakatupapaku ai tatou ki te hara, kia ora ai ki te tika: na ona karawarawa i ora ai o koutou mate.
25
I rite hoki koutou ki te hipi kua kotiti ke; heoi kua hoki tenei koutou ki te Hepara ki te Pihopa o o koutou wairua.