- 1
- He pono te korero, Ki te hiahia tetahi ki te mahi pihopa, e hiahia ana ia ki te mahi pai.
- 2
- Na, ko te tikanga tenei kia kaua te pihopa e ekengia e te kupu, he tahu no te wahine kotahi, kia whai mahara, kia whai whakaaro, kia ataahua ana tikanga, kia atawhai ki nga manuhiri, kia whai ngakau ki te whakaako:
- 3
- Kia kaua e kakai waina, kia kaua e patu, kia kaua e whaia e ia nga taonga hē; engari kia ngakau ngawari, kia kaua e whawhai, kia kaua e matenui ki te moni;
- 4
- Kia pai tana tohutohu i tona whare, e mea ana i ana tamariki kia ngohengohe ki a ia, kia nui to ratou whai mahara:
- 5
- (Ki te kore hoki tetahi tangata e mātau ki te tohutohu i tona whare ake, me pehea ka tiaki ai ia i te hahi a te Atua?)
- 6
- Ko te tauhou kauaka, kei whakakake pea, a ka taka ki to te rewera whakamatenga.
- 7
- Tetahi tikanga hoki, kia pai te korero mona a te hunga o waho; kei taka ia ki te whakahawea, ki ta te rewera mahanga ano hoki.
- 8
- Me nga rikona ano kia ahua kaumatua, kaua e korero rua, kaua e matenui ki te waina, kaua e whaia te taonga hē;
- 9
- Kia ma ano te hinengaro e mau ai i a ratou to te whakapono mea ngaro.
- 10
- Kia mātua whakamatautauria ano hoki anei; ko reira ratou meinga ai hei rikona, i te mea ka kore nei he whakahe mo ratou.
- 11
- Me nga wāhine hoki kia ahua kaumatua, kaua e ngautuara, kia whai mahara, kia pono i nga mea katoa.
- 12
- Kia kotahi tonu te wahine ma te rikona; kia pai te tohutohu i a ratou tamariki, i o ratou whare ake ano hoki.
- 13
- Ki te pai hoki ta ratou mahi rikona, ka whiwhi ratou ki te turanga pai mo ratou, ka nui hoki to ratou maia i runga i te whakapono ki a Karaiti Ihu.
- 14
- He tuhituhi atu tenei naku i enei mea ki a koe, e mea ana tera ahau e haere wawe atu ki a koe:
- 15
- A ki te roa ahau, kia mātau ai koe ki te tikanga mo to mahi, i roto i te whare o te Atua, ko te hahi nei ia o te Atua ora, ko te pou me te turanga o te pono.
- 16
- Na, takoto rawa te whakaae, ki te nui o te mea ngaro e karakiatia nei: Te Atua i whakakitea mai i roto i te kikokiko, he mea whakatika mai na te Wairua, i kitea e nga anahera, kua kauwhautia nei i roto i nga tauiwi, kua whakaponohia nei e te ao, a tangohia atu ana ki te kororia.
Address: 
Phone: 
Email: