- 1
- Ko nga pononga katoa he rangatira o ratou, kia kiia iho e ratou nga honore katoa he mea tika mo o ratou rangatira ake, kei korerotia kinotia te ingoa o te Atua me tana whakaakoranga.
- 2
- Kaua te hunga i nga rangatira whakapono e whakahawea ki a ratou, no te mea he teina ratou; engari kia nui rawa te mahi, no te mea e whakapono ana ratou, e arohaina ana, e uru ngatahi ana ki te mahi pai. Me whakaako enei mea e koe, me whakahau atu.
- 3
- Ki te whakaako ke tetahi, a kahore e tahuri ki nga kupu ora, ki to tatou Ariki ki a Ihu Karaiti, ki te whakaakoranga ano hoki e rite ai te karakia pai,
- 4
- E whakakake ana ia, kahore ona matauranga ki tetahi mea, heoi e hawata ana ki nga uiuinga ki nga tautohetohenga, no reira nei te hae, te whawhai, nga korero kino, nga whakaaro kino,
- 5
- Nga whakahokihoki kupu a nga tāngata ngakau kino, kahore nei he pono i a ratou, e mea nei hei taonga te karakia pai: mawehe atu koe i era.
- 6
- He taonga nui ano ia te karakia pai hui tahi ki te ngakau tatu.
- 7
- Kahore hoki he mea i mauria mai e tatou ki te ao, a he mea mārama noa tenei e kore e ahei te mau atu e tatou tetahi mea.
- 8
- Na, ki te mea he kai ta tatou, he hipoki, kāti ano ko enei ma tatou.
- 9
- Na, te hunga e hiahia ana kia whai taonga, ka taka ratou ki te whakamatautauranga, ki te mahanga, ki te tini o nga hiahia kuare e raru ai, e totohu ai nga tāngata ki te whakangaromanga, a hunā iho.
- 10
- He putake hoki no nga kino katoa te aroha ki te moni; he minamina ki tenei i kotiti ke ai etahi i te whakapono, a werohia putia iho ratou e nga mamae maha.
- 11
- Ko koe ia, e ta te Atua tangata, oma atu i enei: a whaia te tika, te karakia pai, te whakapono, te aroha, te manawanui, te ngakau māhaki.
- 12
- Whawhaitia te whawhai pai o te whakapono, hopukia atu te oranga tonutanga, ko te mea hoki ia i karangatia ai koe, a whakaaetia ana e koe te whakaaetanga pai i te aroaro o nga kai titiro tokomaha.
- 13
- Ko taku ako atu tenei ki a koe i te aroaro o te Atua, nāna nei nga mea katoa i whai ora ai, o Ihu Karaiti ano hoki, nāna nei i whakapuaki te whakaaetanga pai i te aroaro o Ponotio Pirato;
- 14
- Puritia tenei ture, kei whai koha, kei whai hē, taea noatia te putanga mai o to tatou Ariki o Ihu Karaiti:
- 15
- Ko a ona wa ake ano whakakitea mai ai e ia, ko ia anake nei hoki te Mea kaha, te Mea koa, te Kingi o nga kingi, te Ariki o nga ariki;
- 16
- Nona anake te mate-kore, e noho ana ia i te māramatanga e kore e taea atu e tetahi; kahore ia e kitea e tetahi tangata, kahore ano hoki e ahei kia kitea: waiho atu i a ia te honore me te kaha, ake ake ake. Amine.
- 17
- Akona atu te hunga i nga taonga o tenei ao kia kaua e whakakake te ngakau, kia kaua e whakawhirinaki ki nga taonga pahuhu noa, engari ki te Atua ora, ko ia hoki hei homai nui i nga mea pai katoa hei mea ma tatou;
- 18
- Kia pai a ratou hanga, kia hua a ratou mahi pai, kia hihiko ki te ohaoha, ki te whakawhiwhi i etahi;
- 19
- Ko te turanga pai mo a mua ta ratou taonga e rongoa ai, kia mau ai i a ratou te oranga tonutanga.
- 20
- E Timoti, tiakina te mea kua tukua nei ki a koe; tahuri atu i nga korero whakarihariha, i nga kupu teka noa, i nga whakapu tanga ketanga a te mea e tekaia nei he matauranga:
- 21
- Kua waiho nei hei tikanga ma etahi, a hē ake ratou i te whakapono. Kia tau te aroha noa ki a koe. Amine.
Address: 
Phone: 
Email: