- 1
- Na, ka timata a Horomona te hanga i te whare o Ihowa ki Hiruharama ki Maunga Moria, ki te wahi i puta mai ai a Ihowa ki tona pāpā, ki a Rawiri, ki te wahi i whakapaia e Rawiri ki te patunga witi a Oronana Iepuhi.
- 2
- No te rua o nga ra o te rua o nga marama i timata ai ia te hanga, no te wha o nga tau o tona kingitanga.
- 3
- Ko nga mea enei i whakaakona ai a Horomona mo te hanganga o te whare o te Atua. Te roa, (ko nga whatianga o te ruri tuatahi,) e ono tekau nga whatianga; a, te whanui, e rua tekau nga whatianga.
- 4
- A, te whakamahau i te aronga o te whare, tona roa, ko te whanui o te whare, e rua tekau nga whatianga; na, te tiketike, kotahi rau e rua tekau: he mea whakakikorua ano e ia a roto ki te koura para-kore.
- 5
- Na, te whare nui, he mea hipoki nana ki te rakau, ki te kauri, whakakikoruatia ana e ia ki te koura pai, whakanohoia iho hoki e ia he nikau, he mekameka.
- 6
- He mea whakapaipai hoki nana te whare ki nga kohatu utu nui, kia ahua pai ai. He koura hoki; no Parawaima te koura.
- 7
- Whakakikoruatia iho ano hoki e ia te whare, nga kurupae, nga pou, ona taha, me ona tatau, ki te koura; tuhia iho hoki e ia he kerupima ki nga taha.
- 8
- I hangā ano e ia te whare tapu rawa; tona roa, ko te whanui o te whare; e rua tekau nga whatianga; tona whanui e rua tekau nga whatianga. Whakakikoruatia iho e ia ki te koura pai, e ono rau nga taranata.
- 9
- Na, te taimaha o nga whao, e rima tekau nga hekere koura. I whakakikoruatia ano hoki e ia nga ruma o runga ki te koura.
- 10
- I hangā ano e ia i roto i te whare tino tapu e rua nga kerupima, he mea mahi ki te purupuru; whakakikoruatia iho ki te koura.
- 11
- Na, nga parirau o nga kerupima, e rua tekau nga whatianga te roa: te parirau kotahi, e rima nga whatianga, pa tonu ki te taha o te whare; a, tetahi parirau, e rima ano nga whatianga, pa tonu ki te parirau o tera kerupa.
- 12
- A, te parirau o tera kerupa, e rima nga whatianga, pa tonu ki te taha o te whare: tetahi parirau, e rima ano nga whatianga, he mea ungutu atu ki te parirau o tera kerupa.
- 13
- Na, roha tonu nga parirau o enei kerupima, e rua tekau nga whatianga. Tu ana o raua waewae ki runga; i anga ano o raua kanohi ki roto.
- 14
- I hangā ano e ia te arai ki te mea pūru, papura, whero, ki te rinena pai ano hoki; mahia iho hoki e ia ki nga kerupima.
- 15
- I hangā ano e ia etahi pou e rua ki mua i te whare, e toru tekau ma rima nga whatianga te roa, a, e rima nga whatianga o te whakapaipai i runga i tetahi, i tetahi.
- 16
- I hangā ano e ia he mekameka, he pera ano me o te ahurewa, whakanohoia iho ki nga pito ki runga o nga pou. I hangā ano e ia etahi pamekaranate kotahi rau, whakanohoia iho ki nga mekameka.
- 17
- Heoi whakaturia ana e ia aua pou ki te aronga o te temepara, kotahi ki te taha ki matau, kotahi ki te taha ki maui, a, huaina iho e ia te ingoa o tera ki matau ko Iakini, a te ingoa o tera ki maui, ko Poaha.
Address: 
Phone: 
Email: